¹ Awo olwatuukiire Sawulo bwe yairirewo ng'amalire okugoberera Abafirisuuti, ni bamukobera nti bona, Dawudi ali mu idungu erye Engedi. ² Awo Sawulo n’atwala abasaiza enkumi isatu abalondeibwe mu Isiraeri yenayena, n'ayaba okusagira Dawudi n'a basaiza be ku njazi egy'e mbulabuzi. ³ N'a iza ku bisibo by'e ntama mu ngira awali eikookooma; Sawulo n'ayingira okubiika ku bigere bye. Era Dawudi n’abasaiza be babbaire batyaime mu bifo eby'o mu mpuku ebyakomereireyo munda. ⁴ Abasaiza ba Dawudi ni bamukoba nti bona, olunaku Mukama lwe yakukobereku nti bona, ndigabula omulabe wo mu mukono gwo, era olimukola nga bw'olisiima. Awo Dawudi n'a golokoka n’asala ku kirenge ky'e kivaalo kya Sawulo mu kyama. ⁵ Awo olwatuukire oluvanyuma Dawudi n'alumwa omwoyo, kubanga yasalire ku kirenge kya Sawulo. ⁶ N'akoba abasaiza be nti Mukama akiirirye eri nze okukola mukama wange Mukama gwe yafukireku amafuta ekigambo kino, okumusengererya omukono gwange kubanga niiye oyo Mukama gwe yafukireku amafuta. ⁷ Awo Dawudi n’aziyizya abasaiza be n'e bigambo ebyo, n'atabaganya kumugolokokeraku Sawulo. Awo Sawulo n'a golokoka n'ava mu mpuku n’ayaba. ⁸ Awo no Dawudi n'agolokoka oluvanyuma n'ava mu mpuku n'a koowoola Sawulo ng'atumula nti Mukama wange kabaka. Awo Sawulo bwe yakebukire, Dawudi n'avuunama amaiso ge ne yeebalya. ⁹ Dawudi n'akoba Sawulo nti kiki ekikuwulirya ebigambo by'a bantu nga batumula nti bona, Dawudi ataka okukukola akabbiibi? ¹⁰ Bona, Atyanu amaiso go gaboine Mukama bw'abbaire akugabwire mu mukono gwange atyanu mu mpuku: era wabbairewo abakobere okukwita: naye eriiso lyange ni likusaasira; ne nkoba nti tinjaba kugolola mukono gwange ku mukama wange; kubanga niiye oyo Mukama gwe yafukireku amafuta. ¹¹ Era, itawange, bona, niiwo awo, bona, ekirenge ky'ekivaalo kyo mu ngalo gyange; kale kubanga nsalire ku kirenge ky'ekivaalo kyo ni ntakwita, tegeera obone nga wabula kabbiibi waire ekyonoono mu mukono gwange; so tinkusoberye waire ng'oyiganya obulamu bwange okubukwata: ¹² Mukama asale omusango wakati wange naiwe, Mukama akuwalaneku eigwanga lyange: naye, omukono gwange tigulibba ku iwe. ¹³ Ng'o lugero olw'ab'e ira bwe lutumula nti mu babbiibi niimwo muva obubbiibi: naye omukono gwange tigulibba ku iwe. ¹⁴ Kabaka wa Isiraeri atabaire yani? osengererya yani? Osengererya embwa enfu, enkukuni. ¹⁵ Kale Mukama abbe mulamuli, asale omusango gwange n'o gugwo, abone awozye ensonga yange andokole mu mukono gwo. ¹⁶ Awo olwatuukiire Dawudi bwe yamalire okukoba Sawulo ebigambo ebyo, Sawulo n'atumula nti lino niiryo eidoboozi lyo, mwana wange Dawudi? Sawulo n'ayimusya eidoboozi lye n'akunga amaliga. ¹⁷ N'akoba Dawudi nti niiwe onsinga obutuukirivu: kubanga onsaswire kusa, naye nze nkusaswire kubbiibi. ¹⁸ Era oyatwire atyanu bw'onkolere okusa: kuba Mukama ng'a ngabwiire mu mukono gwo n'otongita. ¹⁹ Kubanga omuntu bw'asanga omulabe we, tamuganya okwaba nga mulamu? Kale Mukama akuwe empeera ensa olw'ekyo ky'onkolere atyanu. ²⁰ Era, bona, maite nga tolireka kubba kabaka, era ng'o bwakabaka bwa Isiraeri bulinywezebwa mu mukono gwo. ²¹ Kale atyanu ndayirira Mukama nga tolizikirirya eizaire lyange eririirawo, so nga tolimalawo liina lyange okulitoola mu nyumba ya itawange. ²² Dawudi n'alayirira Sawulo. Sawulo n'airayo eika; naye Dawudi n'a basaiza be ni bayambuka mu mpuku.