¹ Awo Samwiri n'afa; Isiraeri yenayena ni bakuŋaana ne bamukungira, ne bamuziika mu nyumba ye e Laama. Dawudi n'agolokoka n'aserengeta n'ayaba mu idungu Palani. ² Awo yabbaireyo omusaiza e Mawoni ebintu bye nga biri e Kalumeeri; era omusaiza oyo yabbaire mukulu inu, era yabbaire n'e ntama enkumi isatu n'e mbuli lukumi: awo yabbaire ng'a sala ebyoya by'e tama gye e Kalumeeri. ³ Era eriina ly'o musaiza Nabali; no mukali we eriina lye Abbigayiri: n'o mukali yabbaire mutegeevu n'a maiso ge nga masa: naye omusaiza yabbaire we ikabyo era mubbiibi mu bikolwa bye; era yabbaire wo nyumba ya Kalebu. ⁴ Awo Dawudi n'awulira mu idungu Nabali ng'a sala ebyoya by'e ntama gye. ⁵ Awo Dawudi n'atuma abaisuka ikumi, Dawudi n'akoba abaisuka nti Mwambuke e Kalumeeri mwabe eri Nabali mu munsugirye: ⁶ era mutyo bwe mubba mukoba oyo atyama ng'abona (omukisa) nti Emirembe gibbe gy'oli, era emirembe gibbe ku nyumba yo, era emirembe gibbe ku byonabyona by'olina. ⁷ Era mpuliire ng'olina abasala ebyoya by'e ntama: abasumba bo baabbanga naife ni tutabakola kubbiibi, so tewaabbanga ekyabagotere, ebiseera byonabyona nga bali e Kalumeeri. ⁸ Bulya abaisuka bo, bakukobera: kale abaisuka baganje mu maiso go; kubanga twiziire ku lunaku olusa: waayo, nkwegayiriire, kyonakyona ekyaiza mu mukono gwo eri abaidu bo n'eri mutaane wo Dawudi. ⁹ Awo abaisuka ba Dawudi bwe baizire, ne batumula no Nabali mu liina lya Dawudi ng'e bigambo ebyo byonabyona bwe biri, ni basirika. ¹⁰ Awo Nabali n'airamu abaidu ba Dawudi n'atumula nti Dawudi niiye ani? n'o mutaane wa Yese niiye ani? mu biseera bino wabbairewo abaidu bangi abajeemeire buli muntu mukama we. ¹¹ Kale naatoola emigaati gyange n'a maizi gange n'e nyama yange gye ngitiire abasaiza bange abasala ebyoya, ni mbiwa abasaiza be timaiteku gye baviire? ¹² Awo abaaisuka ba Dawudi ni bakyuka ni bakwata engira ne bairayo ni baiza ne bamukobera ng'e bigambo ebyo byonabyona bwe biri. ¹³ Awo Dawudi n'akoba abasaiza be nti Mwesibe buli muntu ekitala kye. Ni beesiba buli muntu ekitala kye; no Dawudi yeena ni yeesiba ekitala kye: ni wayambuka okusengererya Dawudi abasaiza nga bina; ebibiri ni basigala ku bintu. ¹⁴ Naye omumu ku baisuka n'a kobera Abbigayiri mukali wa Nabali ng'atumula nti bona, Dawudi yatumire ababaka ng'a yema mu idungu okusugirya mukama waisu; n'abagwaku. ¹⁵ Naye abasaiza abo batukolanga kusa inu, so tetukolwanga kubbiibi, so titubulwanga kintu kyonakyona eibbanga lyonalyona lye twamalire nga tubba nabo, bwe twabbaire mu nsiko: ¹⁶ baabbanga bugwe gye tuli emisana n'o bwire ekiseera kyonakyona kye twamalire nabo nga tulunda entama. ¹⁷ Kale atyanu tegeera olowooze ky'e wakola: kubanga bamaliriire obubbiibi ku mukama waisu n'o ku nyumba ye yonayona: kubanga omwana wa Beriali eyenkaniire awo n'o kusobola omuntu n'atasobola kutumula naye. ¹⁸ Awo Abbigayiri kaisi n'ayanguwa n’airira emigaati bibiri n'ebideku bibiri eby'omwenge n'e ntama itaanu enfumbire dala, n'ebigero bitaanu eby'eŋaanu ensiike, n'ebiyemba kikumi eby'e izabbibu enkalu, n'e bitole bibiri eby'e itiini, n'abitiika endogoyi. ¹⁹ N'akoba abaisuka be nti Muntangire mwabe; bona mbavaaku nyuma. Naye n'atakobera ba Nabali. ²⁰ Awo olwatuukire nga yeebagala endogoyi ye n'a serengeta awaali ekifo ekyegisirwamu eky'o ku lusozi, awo, bona, Dawudi N'abasaiza be ni baserengeta okumwolekera; n'asisinkana nabo. ²¹ Era Dawudi yabbaire atumwire nti mazima nkuumiire bwereere byonabyona olusaiza luno bye lulina mu idungu, ekintu kyonakyona ne kitabula ku byalwo byonabyona bwe byekankana: kale lunsaswire okubbiibi olw'o busa. ²² Katonda akole atyo abalabe ba Dawudi n'okusingawo, bwe ndisigalyawo ku babe bonabona bwe bekankana n'o mwana omu ow'o bwisuka. ²³ Awo Abbigayiri bwe yaboine Dawudi, n'ayanguwa n'ava ku ndogoyi ye n’avuunamira Dawudi amaiso ge, n'akutama ku itakali. ²⁴ N'agwa ku bigere bye n'atumula nti obutali butuukirivu obwo bubbe ku nze mukama wange, ku nze: era muzaana wo atumule mu matu go, nkwegayiriire, era wulira ebigambo by'o muzaana wo. ²⁵ Nkwegayiriire, mukama wange aleke okuteekayo omwoyo eri omuntu oyo owa Beriali, Nabali: kuba eriina lye nga bwe liri, yeena bw'ali atyo; Nabali niilyo liina lye n'o busirusiru buli naye; naye nze omuzaana wo tinaboine baisuka ba mukama wange be watumire. ²⁶ Kale atyanu, mukama wange nga Mukama bw'ali omulamu wena nga bw'oli omulamu, kubanga Mukama akuziyizirye okukola omusango gw'o musaayi n'o kwewalanira eigwanga n'o mukono gwo iwe, kale abalabe bo n’abo abasagiriira mukama wange akabbiibi, babbe nga Nabali. ²⁷ Era ekirabo kino omuzaana wo ky'aleeteire mukama wange, kiweebwe abaisuka abasengererya mukama wange. ²⁸ Nkwegayiriire, sonyiwa ekyonoono ky’o muzaana wo: kubanga Mukama talireka kukolera mukama nyumba ey'e nkalakalira kubanga Mukama wange alwana entalo gya Mukama; so n'akabbiibi tekaliboneka ku iwe enaku gyo gyonagyona. ²⁹ Era waire ng'abantu bagolokokere okukuyiganya n'okusagira obulamu bwo, naye obulamu bwa mukama wange bulisibirwa mu muganda gw'o bulanu wamu n'o Mukama Katonda wo; n'o bulamu bw'a balabe bo alibuvuumuula ng'ebiva mu kida lw'e nvuumuulo. ³⁰ Awo olulituuka Mukama bw'alibba ng'akolere mukama wange ng'o busa bwonabwona bwe buli bwe yakutumwireku era ng'a kuteekereku okubba omukulu wa Isiraeri: ³¹ kale kino tekirikulumya mwoyo, so omwoyo gwange tigulyesiitalya mukama wange kubanga wayiwire omusaayi ogubulaku nsonga waire kino nga mukama wange yeewalanira eigwanga yenka: awo Mukama bw'alibba ng'akolere kusa mukama wange, kale oijukiranga omuzaana wo. ³² Dawudi n'akoba Abbigayiri nti Atenderezebwe Mukama, Katonda wa Isiraeri, akutumire watynu okusisinkana nanze: ³³ era gatenderezebwe n'a magezi go, wena otenderezebwe ankuumire watynu, obutabbaaku musango gw'o musaayi n'o buteewalanira igwanga n'o mukono gwange nze. ³⁴ Kubanga mazima dala, nga Mukama Katonda wa Isiraeri bw'ali omulamu, anziyizirye okukola obubbiibi, singa toyanguwire n'o iza okusisinkana nanze, mazima tewandisigaliire Nabali mungamba ng'esalire omwana omumu ow'o bwisuka. ³⁵ Awo Dawudi n'atoola mu ngalo gye ebyo by'amuleeteire: n'a mukoba nti Yambuka mu nyumba yo mirembe; bona, mpuliire eidoboozi lyo ne nkwikirirya iwe. ³⁶ Awo Abbigayiri n'aiza eri Nabali; era, bona, yabbaire afumbire embaga mu nyumba ye, ng'embaga ya kabaka; n'o mwoyo gwa Nabali gwabbaire gusanyukire munda mu iye, kubanga yabbaire atamiire inu: kyeyaviire aleka okumukobera ekigambo kyonakyona, oba kitono oba kikulu, okutuusya amakeeri. ³⁷ Awo olwatuukire amakeeri, Nabali omwenge bwe gwabbaire gumuviireku, mukali we n'amukobera ebigambo ebyo, omwoyo gwe ni gufiira munda iye n'afuuka ng'e ibbaale. ³⁸ Awo olwatuukire enaku nga ikumi nga gibitirewo, Mukama n'alwalya Nabali n'afa. ³⁹ Awo Dawudi bwe yawuliire Nabali ng'afiire, n'atumula nti Mukama atenderezebwe, awozerye ensonga ey'o kuvumibwa kwange mu mukono gwa Nabali era aziyizirye omwidu we okukola ekibbiibi: n'obubbiibi bwa Nabali Mukama abwiriryeyo ku mutwe gwe iye. Dawudi n'atuma n'ayogerezya Abbigayiri okumufumbirwa. ⁴⁰ Awo abaidu ba Dawudi bwe baatuukire eri Abbigayiri e Kalumeeri, ne bamukoba nti Dawudi yatutumire gy'oli okukufumbirwa. ⁴¹ Awo n'agolokoka n'avuunama amaiso ge n'atumula nti bona, omuzaana wo abbe muweererya okunaabyanga ebigere by'abaidu ba mukama wange. ⁴² Awo Abbigayiri n'ayanguwa n'agolokoka ni yeebagala endogoyi wamu na bawala be bataanu abaamusengereryanga; n'asengererya ababaka ba Dawudi, n'abba mukali we. ⁴³ Dawudi n'akwa n'o Akinoamu ow'e Yezuleeri; bombiri ne babba bakali be. ⁴⁴ Era Sawulo yabbaire awaire Mikali muwala we, mukali wa Dawudi, Paluti mutaane wa Layisi ow'e Galimu.