¹ Awo ab'e Zifu ni baiza eri Sawulo e Gibeya nga batumula nti Dawudi teyeegisa ku lusozi Kakira olwolekera eidungu? ² Awo Sawulo n'agolokoka n'aserengeta n'ayaba mu idungu ery'e Zifu, ng'alina abasaiza abalonde aba Isiraeri enkumi isatu wamu naye, okusagira Dawudi mu idungu ery'e Zifu. ³ Sawulo n'asiisira ku lusozi Kakira, olwolekera eidungu, mu ngira. Naye Dawudi n'abba mu idungu n'abona nga Sawulo atuukire mu idungu ng'amusengererya. ⁴ Dawudi kyeyaviire atuma abakeeti n'ategeera nga Sawulo atuukiriire dala: ⁵ Dawudi n'agolokoka n'aiza mu kifo Sawulo we yabbaire asiisiire: Dawudi n'abona ekifo Sawulo we yagalamiire, n'o Abuneeri mutaane wa Neeri, omukulu w'eigye lye: era Sawulo yabbaire agalamiire munda mw'e kifo eky'amagaali, abantu ne basiisira okumwetooloola. ⁶ Awo Dawudi n'airamu n'akoba Akimereki Omukiiti n'o Abisaayi mutaane wa Zeruyiya, mugande wa Yowaabu, ng'atumula nti Yani eyaserengeta nanze n'a yaba eri Sawulo mu lusiisira? Abisaayi n'atumula nti ninze naserengeta naiwe. ⁷ Awo Dawudi n'o Abisaayi ni baiza eri abantu obwire: awo, bona, Sawulo ng'agalamiire nga agonere munda mw'e kifo eky'a magaali, eisimu lye nga lisimbiibwe mu itakali ku mutwe gwe: n'o Abuneeri n'a bantu nga bagalamiire okumwetooloola. ⁸ Awo Abisaayi n'akoba Dawudi nti Katonda agabuliire dala omulabe wo mu mukono gwo atyanu: kale, nkwegayiriire, musumite n'e isimu okukwatisya n'e itakali omulundi gumu so tiimusumitire gwo kubiri. ⁹ Dawudi n'akoba Abisaayi nti tomuzikirirya: kubanga yani asobola okugolola omukono gwe ku oyo Mukama gwe yafukireku amafuta n'abba nga abulaku musango? ¹⁰ Dawudi n'atumula nti nga Mukama bw'ali omulamu Mukama niiye alimwita oba olunaku lwe lulituuka okufa; oba aliserengeta mu lutalo n'a zikirira. ¹¹ Mukama akiirirye edi nze okugolola omukono gwange ku oyo Mukama gwe yafukireku amafuta: naye twala, nkwegayiriire, eisimu eriri ku mutwe gwe n'e nsumbi y'a maizi twabe. ¹² Awo Dawudi n'atwala eisimu n'e nsumbi y'a maizi ng'abitoola ku mutwe gwa Sawulo; ne beirirayo so nga wabula muntu akiboine waire akimaite, so nga wabula azuukire: kubanga bonabona nga bagonere; kubanga endoolo nyngi egyaviire eri Mukama gyabbaire gibagwireku. ¹³ Awo Dawudi n'a yaba emitala w'edi, n'ayemerera wala ku ntiiko y'o lusozi; nga yeeswireku nabo eibbanga inene: ¹⁴ Dawudi n'alagirirya abantu na Abuneeri mutaane wa Neeri ng'atumula nti Toiramu, Abuneeri? Awo Abuneeri n'airamu n’atumula nti iwe yani akoowoola kabaka? ¹⁵ Dawudi n'a koba Abuneeri nti toli muzira? era yani akwekankana mu Isiraeri? kale kiki ekikulobeire okukuuma mukama wo kabaka? kubanga muyingiire mumu ku bantu okuzikirirya kabaka mukama wo. ¹⁶ Ekigambo kino ky'okolere ti kisa. Nga Mukama bw'ali omulamu, musaaniire okufa, kubanga temukuumire mukama wanyu, Mukama gwe yafukireku amafuta. Era mubone eisimu lya kabaka gye liri n'e nsumbi y'a maizi ebbaire ku kigugu kye eky'emitwe. ¹⁷ Sawulo n'a manya eidoboozi lya Dawudi n'atumula nti lino niilyo eidoboozi lyo, mwana wange Dawudi? Dawudi n'atumula nti niilyo eidoboozi lyange, mukama wange, ai kabaka. ¹⁸ N'atumula nti Mukama wange ayiganyirye ki omwidu we? kubanga nkolere ki? oba kibbiibi ki ekiri mu mukono gwange? ¹⁹ Kale, nkwegayiriire, mukama wange kabaka awulire ebigambo by'o mwidu we. Mukama oba nga niiye yakumpeereire, aikirirye ekiweebwayo: naye oba nga niibo abaana b'a bantu, balamiibwe mu maiso ga Mukama; kubanga bambingire atyanu ndeke okwegaita n'o busika bwa Mukama nga batumula nti Yaba oweererye bakatonda abandi. ²⁰ Kale omusaayi gwange guleke okutonya wansi Mukama gy'atabba: kubanga kabaka wa Isiraeri atabaire okusagira enkukuni, ng'o muntu bw'ayiigira enkwale ku nsozi: ²¹ Awo Sawulo n'atumula nti nyonoonere: irayo, mwana wange Dawudi: kubanga tindyeyongera kukukola kabbiibi ate, kubanga obulamu bwange bubaire bwo muwendo mungi mu maiso go watynu: bona, nasiriwaire ni nkyama inu nyini. ²² Dawudi n'a iramu n'atumula nti bona eisimu, ai kabaka! kale omumu ku baisuka aizire alirukire. ²³ Era Mukama alisasula buli muntu obutuukirivu bwe n'o bwesigwa bwe: kubanga Mukama akugabwire mu mukono gwange watynu, ne ntaikirirya kugolola mukono gwange ku oyo Mukama gwe yafukireku amafuta. ²⁴ Era, bona, ng'o bulamu bwo bwe bubbaire obw'o muwendo omungi mu maiso gange atyanu, obulamu bwange bubbe bw'o muwendo mungi mu maiso ga Mukama, andokole mu kubona enaku kwonakwona. ²⁵ Awo Sawulo n'a koba Dawudi nti oweebwe omukisa, mwana wange Dawudi: olikola eby'a maani era tolireka kuwangula. Awo Dawudi n'a yaba, Sawulo n'airayo mu kifo kye.