¹ Awo olwatuukire, Samwiri ng'a kairikire, n'afuula Bataane be abalamuli ba Isiraeri. ² N'o mubereberye eriina lye Yoweeri; n'o w'okubiri eriina lye Abiya: babbaire balamuli mu Beeruseba. ³ Bataane be ni batatambulira mu mangira ge, naye ni bakyama okusengererya ebintu, ni balya enguzi, ni balya ensonga. ⁴ Awo abakaire ba Isiraeri bonabona kaisi ni ni bakuŋaana ni baiza eri Samwiri e Laama: ⁵ ni bamukoba nti bona, iwe oli mukaire, n'a bataane bo tebatambulira mu mangira go: kale tukolere kabaka atulamulenga ng'a mawanga gonagona. ⁶ Naye ekigambo ekyo ni kinyiizya Samwiri, bwe batumwire nti tuwe kabaka atulamulenga. Samwiri n'a saba Mukama. ⁷ Mukama n'a koba Samwiri nti wulira eidoboozi ly'a bantu mu byonabyona bye bakukoba: kubanga ti bakugaine iwe, naye bagaine ninze, ndeke okubba kabaka waabwe. ⁸ Ng'e mirimu gyonagoyna bwe giri gye baakakola okuva ku lunaku lwe nabatoire mu Misiri okutuusya atyanu, kubanga bandeka ni baweererya bakatonda abandi, weena bwe bakukolere batyo. ⁹ Kale atyanu wulira eidoboozi lyabwe: naye wabategeezerya dala n'o balaga kabaka bw'alifaanana alibafuga. ¹⁰ Awo Samwiri n'akobera abantu abamusabire kabaka ebigambo bya Mukama Byonabyona. ¹¹ N'atumula nti Ati bw'alifaanana kabaka alibafuga: alitwala bataane banyu n'abeewandiikira olw'a magaali ge era okubba abasaiza be abeebagala embalaasi; awo bairukiranga mu maiso g'a magaali ge: ¹² era alibeewandiikira okubba abaami b'e nkumi n’a baami b'ataano; era aliteekawo abamu okulima ensi ye n'o kukungula ebikungulwa bye, n'o kuweesya ebintu bye eby'o kulwanisya n'e bintu eby'o mu magaali ge. ¹³ Era alitwala bawala banyu okufumbanga eby'akaloosa era okubba abafumbiro era okubba abasiiki. ¹⁴ Era alitwala enimiro gyanyu n'e nsuku gyanyu egy'e mizabibu n'e gy'e mizeyituuni, egisinga obusa, n'agiwa abaidu be. ¹⁵ Era alitwala ekitundu eky'eikumi eky'e nsigo gyanyu n'e ky'e nsuku gyanyu egy'e mizabibu n'agabira abaami be n'abaidu be. ¹⁶ Era alitwala abaidu banyu n'abazaana banyu n'abaisuka banyu abasinga obusa n'e ndogoyi gyanyu n'a bakozesya emirimu gye. ¹⁷ Alitwala ekitundu eky'e ikumi eky'e ntama gyanyu: era mulibba baidu be. ¹⁸ Era mulikunga ku lunaku olwo olwa kabaka wanyu gwe mulibba mwerondeire; so Mukama talibairiramu ku lunaku olwo. ¹⁹ Naye abantu ni bagaana okuwulira eidoboozi lya Samwiri; ne batumula nti bbe; naye tutaka kabaka atufuge; ²⁰ feena tufaanane ng'a mawanga gonagona; kabaka waisu atusalirenga emisango, atabaalenga ng'atutangiire atulwanirirenga entalo gyaisu. ²¹ Samwiri n'awulira ebigambo byonabyona eby'a bantu, n'a bitumula mu matu ga Mukama. ²² Awo Mukama n'akoba Samwiri nti Wulira eidoboozi lyabwe obakolere kabaka. Samwiri n'akoba abasaiza ba Isiraeri nti mwireyo buli muntu mu kibuga ky'e waabwe.