¹ Awo Abakiriyasuyalimu ni baiza ne bairukira esanduuku ya Mukama, ni bagireeta mu nyumba ya Abinadaabu ku lusozi, ni batukulya Eriyazaali mutaane we okukuumanga esanduuku ya Mukama. ² Awo olwatuukire okuva ku lunaku esanduuku bwe yabbaire mu Kiriyasuyalimu, ni wabbaawo ekiseera kinene; kubanga gyabbaire emyaka abiri n'e nyumba ya Isiraeri yonayona ni basagira Mukama nga banakuwala. ³ Awo Samwiri n'akoba enyumba ya Isiraeri yonayona nti oba nga mwirawo eri Mukama n'o mwoyo gwanyu gwonagwona, kale mutoolewo bakatonda abageni n'a Baasutaloosi bave mu imwe, muteekereteekere Mukama emyoyo gyanyu, mumuweererye yenka: yeena alibalokola mu mukono gw'Abafirisuuti. ⁴ Awo abaana ba Isiraeri kaisi ni batoolawo Babaali n'a Baasutaloosi, ni baweererya Mukama yenka. ⁵ Awo Samwiri n'atumula nti Mukuŋaanye Isiraeri yenayena baize e Mizupa, nzena ndibasabira eri Mukama. ⁶ Ne bakuŋaanira e Mizupa, ni basena amaizi, ni bagafuka mu maiso ga Mukama, ni basiiba ku lunaku olwo, ni batumulira eyo nti Twasoberye ku Mukama. Samwiri n'alamulira abaana ba Isiraeri e Mizupa. ⁷ Awo Abafirisuuti bwe bawuliire ng'a baana ba Isiraeri bakuŋaine e Mizupa, abaami b'Abafirisuuti ni batabaala Isiraeri. N'a baana ba Isiraeri bwe baakiwuliire ni batya Abafirisuuti. ⁸ Abaana ba Isiraeri ni bakoba Samwiri nti toleka kukungira Mukama Katonda waisu ku lwaisu atulokole mu mukono gw'Abafirisuuti. ⁹ Awo Samwiri n'airira omwana gw'e ntama ogunyonka n’a guwaayo okubba ekiweebwayo ekyokyebwa ekiramba eri Mukama: Samwiri n'akungira Mukama ku lwa Isiraeri: Mukama n'a mwiramu. ¹⁰ Awo Samwiri ng'a waayo ekiweebwayo ekyokyebwa, Abafirisuuti ni basembera okulwana n'e Isiraeri: naye Mukama n'a bwatuka okubwatuka okunene ku lunaku olwo ku Bafirisuuti n'abakeŋentererya; ni bamegebwa wansi mu maiso ga Isiraeri. ¹¹ Abasaiza ba Isiraeri ni bava mu Mizupa ni basengererya Abafirisuuti ni babaita okutuusya lwe batuukire ku Besukali. ¹² Awo Samwiri n'a irira eibbaale, n'alisimba wakati w'e Mizupa n'e Seni, n'alituuma eriina lyalyo Ebenezeri, ng'atumula nti Okutuusya watyanu Mukama atubbereire. ¹³ Abafirisuuti ni bajeemululwa batyo, ni batatuuka lwo kubiri mu nsalo ya Isiraeri: n'o mukono gwa Mukama gwalwaine n'Abafirisuuti enaku gyonagyona egya Samwiri. ¹⁴ N'ebibuga Abafirisuuti bye babbaire batoire ku Isiraeri ni biiribwa eri Isiraeri okuva ku Ekuloni okutuusya ku Gaasi; n’e nsalo yaabyo Isiraeri n’a gitoola mu mukono gw'Abafirisuuti. N'e Isiraeri n'Abamoli ni babba n'e mirembe. ¹⁵ Samwiri n’alamulira Isiraeri enaku gyonagyona egy'o bulamu bwe. ¹⁶ Ni yeetooloolanga buli mwaka n'ayaba e Beseri ne Girugaali ne Mizupa; n'a lamulira Isiraeri mu bifo ebyo byonabyona. ¹⁷ N'airangayo e Laama kubanga niiyo yabbaire enyumba ye; n’alamulira eyo Isiraeri: n'a zimba eyo ekyoto eri Mukama.