¹ Awo olwatuukire, Dawudi n'a basaiza be bwe batuukire e Zikulagi ku lunaku olw'o kusatu, Abamaleki babbaire bamalire okukwekweta obukiika obulyo ne Zikulagi, era nga bamalire okwita Zikulagi era nga bakyokyerye omusyo; ² era nga banyagire Abakali ne bonabona Ababbaire omwo, Abatobato era n'a bakulu: tebaitire n'o mumu, naye babanyagire ni babatwala ne baaba. ³ Awo Dawudi n'abasaiza be bwe baatuukire ku kibuga, bona, nga bakyokyerye omusyo; n'a bakali baabwe n'a bataane baabwe na bawala baabwe nga babanyagire. ⁴ Awo Dawudi n'a bantu ababbaire naye kaisi ni bayimusya eidoboozi lyabwe ne bakunga amaliga Okutuusya lwe baweiremu endasi egikunga, ⁵ N'a bakali ba Dawudi bombiri, Akinoamu Omuyezuleeri n'a Abbigayiri mukali wa Nabali Omukalumeeri, babbaire babanyagire: ⁶ Dawudi n'a nakuwala inu; kubanga abantu batumwire ku kumukasuukirira amabbaale, kubanga abantu bonabona omwoyo gwabalumire, buli muntu ng'alumirwa bataane be na bawala be: naye Dawudi ne yeenywezerya mu Mukama Katonda we. ⁷ Awo Dawudi n'a koba Abiyasaali kabona, mutaane wa Akimereki, nti Nkwegayiriire, leeta eno ekanzo. Abiyasaali n'aleetayo ekanzo eri Dawudi. ⁸ Dawudi n'abuulya Mukama ng'atumula nti bwe nasengererya ekibiina kino, ndibantukaku? N'amwiramu nti sengererya: kubanga tolireka kubatunkaku, era tolireka kubibasuulisya byonabyona. ⁹ Awo Dawudi n'ayaba, iye n'abasaiza olukaaga ababbaire naye, ni baiza ku kaiga Besoli abaasigaire gye batyaime. ¹⁰ Naye Dawudi n’asengererya, iye n’abasaiza bina: kubanga ebibiri basigaire, abayongobeire batyo n'o kusobola ni batasobola kusomoka kaiga Besoli: ¹¹ ni basanga omumisiri mu nsiko ne bamuleetera Dawudi ne bamuwa omugaati n'alya; ni bamunywisya amaizi: ¹² ne bamuwa ekitundu ky'e kitole eky'eitiini n'e biyemba bibiri eby'e izabbibu enkalu; awo bwe yaliire omwoyo gwe ni gwirawo: kubanga yabbaire ng'a malire enaku isatu emisana n'o bwire nga talya mugaati so nga tanywa n’a maizi. ¹³ Awo Dawudi n'a mukoba nti iwe oli musaiza w'ani? era ova waina? N'a tumula nti Nze ndi mwisuka w'e Misiri, omwidu w'Omwamaleki; mukama wange yanswire kubanga enaku giri isatu kasookeire ndwala. ¹⁴ Twakwekwetere obukiika obulyo obw'Abakereti n'e nsi ya Yuda n'o bukiika obulyo obwa Kalebu; ne twokya Zikulagi omusyo. ¹⁵ Dawudi n'a mukoba nti wanserengetya eri ekibiina kino? N'atumula ati ndayirira Katonda nga tolingita so tolimpaayo mu mikono gya mukama wange, nzena nakuserengetya eri ekibiina kino. ¹⁶ Awo bwe yamuserengeterye, bona, nga beeswireswire ku itakali lyonalyona, nga balya nga banywa, nga bafumba embaga, olw'omunyago omunene gwe batoire mu nsi ey'Abafirisuuti n'o mu nsi ya Yuda. ¹⁷ Awo Dawudi n'abaita okutandiika obwire okutuusya amakeeri lwe lwawungeire: ne watawonaku n'o mumu, wabula abaisuka bina abeebagaire eŋamira ni bairuka. ¹⁸ Dawudi n'asuulya byonabyona Abamaleki bye babbaire banyagire: Dawudi n'a wonya bakali be bombiri. ¹⁹ Ni batabulwa kintu, oba kitono oba kinene, waire abaana ab'o bwisuka waire ab'o buwala waire omunyago waire ekintu kyonakyona kye babbaire beenyagiire: Dawudi n’airyawo byonabyona. ²⁰ Dawudi n'atwala entama n'e nte gyonagyona, gye babbingire okutangira ensolo egyo egindi, n'atumula nti Guno niigwo munyago gwa Dawudi. ²¹ Dawudi n'a iza eri abasaiza ebibiri, abaayongobeire batyo n'okuyingirya ni batayingirya kusengererya Dawudi, era be batyamisirye ku kaiga Besoli: ni bafuluma okusisinkana n'o Dawudi n'o kusisinkana n’a bantu ababbaire naye: awo Dawudi bwe yasembereire abantu, n'abasugirya. ²² Awo abantu bonabona ababbiibi n'a bantu ba Beriali ku abo abaabire n'o Dawudi ni bairamu ni batumula nti Kubanga tebaaba naife, titwiza kubawa ku munyago gwe tubasuulisirye, wabula buli muntu mukali we n’a baana be, babatwale baabe. ²³ Awo Dawudi n’atumula nti Bagande bange, ti bwe mulikwaba okukola ebyo Mukama by'atuwaire, atuwonyerye n'agabula mu mukono gwaisu ekibiina ekyatutabaire. ²⁴ Era yani eyabawulira mu kigamho ekyo? kuba omugabo gw'oyo aserengeta mu lutalo nga bwe guli, gutyo bwe gwabba omugabo gw'oyo asigala ku bintu: bagabana okwekankana. ²⁵ Awo olwatuukire okuva ku lunaku olwo n'alifuula eiteeka n'e mpisa eri Isiraeri ne watyanu. ²⁶ Awo Dawudi bwe yatuukire e Zikulagi, n'aweererya abakaire ba Yuda, mikwanu gye, ku munyago ng'atumula nti bona ekirabo kyanyu eky'o ku munyago gw'abalabe ba Mukama; ²⁷ abo ababbaire mu Beseri, n'abo ababbaire mu Lamosi eky'obukiika obulyo, n'abo ababbaire mu Yatiri; ²⁸ n'abo ababbaire mu Aloweri, n'abo ababbaire mu Sifumosi, n'abo ababbaire mu Esutemoa; ²⁹ n'abo ababbaire mu Lakali, n'abo ababbaire mu bibuga eby'Abayerameeri, n'abo ababbaire mu bibuga eby'Abakeeni; ³⁰ n'abo ababbaire mu Koluma, n'abo ababbaire mu Kolasani, n'abo ababbaire mu Asaki; ³¹ n'abo ababbaire mu Kebbulooni, n'ebifo byonabyona Dawudi mwene n'abasaiza be gye bamanyiiranga okubba.