¹ Awo Abafirisuuti ne bakuŋaanyirya eigye lyabwe lyonalyona ku Afeki: Abaisiraeri ni basiisira ku nsulo eri mu Yezuleeri. ² Awo abaami b'Abafirisuuti ni babitawo ebikumi n'e bikumi n'e nkumi n'e nkumi: Dawudi n'a basaiza be ni babitira wamu ne Akisi nga basemba. ³ Awo abakulu b'Abafirisuuti ni batumula nti Abaebbulaniya bakola ki wano Akisi n'akoba abakulu b'Abafirisuuti nti ono ti Dawudi, omwidu wa Sawulo kabaka wa Isiraeri, eyaakamala nanze enaku gino oba emyaka gino, so timbonanga kabbiibi ku iye kasookeire asenga okutuusya Atyanu? ⁴ Naye abakulu b'Abafirisuuti ni bamusunguwalira; abakulu b'Abafirisuuti ne bamukoba nti mwiryeyo omusaiza oyo aireyo mu kifo kye kye wamulagiire, aleke okuserengetera awamu naife mu lutalo, aleke okufuuka omulabe waisu mu lutalo kubanga olusaiza luno lwandyetabaganiire naki n'o mukama we? Ti na mitwe gya basaiza bano? ⁵ Ono ti niiye Dawudi gwe bayemberaganiireku nga bakina, nga batumula nti Sawulo aitire enkumi gye, n'o Dawudi emitwalo gye? ⁶ Awo Akisi n'ayita Dawudi n'amukoba nti Mukama nga bw'ali omulamu, wabbanga mugolokofu, n'okufuluma kwo n'okuyingira awamu nanze mu igye kusa mu maiso gange: kubanga timbonanga kabbiibi ku iwe okuva ku lunaku lwe waizire gye ndi ne watynu: naye abaami tebakutakire. ⁷ Kale irayo oyabe mirembe oleke okunyiizya abaami b'Abafirisuuti. ⁸ Dawudi n'a koba Akisi nti naye nkolere ki oba kiki ky'oboine ku mwidu wo ebiseera byonabyona bye naakamala nga ndi mu maiso go okutuusya Atyanu, ekindobera okwaba ni nwana n'abalabe ba mukama wange kabaka? ⁹ Akisi n'a iramu n'akoba Dawudi nti maite ng'oli musa mu maiso gange nga malayika wa Katonda: naye abaami b'Abafirisuuti batumwire nti taiza kwambuka naife mu lutalo: ¹⁰ Kale golokoka amakeeri mu makeeri wamu n'a baidu ba mukama wo abaiza naiwe: awo amangu ago nga mugolokokere amakeeri mu makeeri, obwire nga bukyeire, mwabe. ¹¹ Awo Dawudi n'a golokoka mu makeeri, iye n'abasaiza be, okwaba amakeeri, okwirayo mu nsi ey'Abafirisuuti. Abafirisuuti ne bambuka e Yezuleeri.