¹ Awo Abafirisuuti ni balwana ne Isiraeri: abasaiza ba Isiraeri ni bairuka mu maiso g'Abafirisuuti, ne bagwa nga baitiibwe ku lusozi Girubowa. ² Abafirisuuti ni bacoca Sawulo na bataane be; Abafirisuuti ni baita Yonasaani n'o Abinadaabu n'o Malukisuwa, batabane ba Sawulo. ³ Olutalo ne lumubba kubbiibi Sawulo, abalasi ni bamutuukaku; ne yeeraliikirira inu olw'abalasi. ⁴ Awo Sawulo n'akoba oyo eyatwalanga ebyokulwanisya bye nti Sowola ekitala kyo osumitire dala nakyo; abatali bakomole abo baleke okwiza ni bansumita ne banswaza. Naye eyatwalanga ebyokulwanisya bye n'agaana; kubanga yatiire inu. Sawulo kyeyaviire airira ekitala kye n'akigwaku. ⁵ Awo eyatwalanga ebyokulwanisya bye bwe yaboine Sawulo ng'afiire, era yeena n'agwa ku kitala kye n'afiira wamu naye. ⁶ Sawulo n'afa atyo, na bataane be bonsatu, n'oyo eyatwalanga ebyokulwanisya bye, n'abasaiza be bonabona, ku lunaku olwo wamu. ⁷ Awo abasaiza ba Isiraeri ababbaire emitala w'e kiwonvu n’abo ababbaire emitala wa Yoludaani bwe baboine abasaiza ba Isiraeri nga bairukire, n'o Sawulo n'a bataane be nga bafiire, awo ni baleka ebibuga ni bairuka; Abafirisuuti ni baiza ni babibbeeramu. ⁸ Awo olwatuukire amakeeri Abafirisuuti bwe baizire okunyaga abafu, ne basanga Sawulo n'a bataane be bonsatu nga bagwire ku lusozi Girubowa. ⁹ Ne bamusalaku omutwe, ne bamutoolaku ebyokulwanisya bye, ni batuma mu nsi ey'Abafirisuuti enjuyi gyonagyona, okukobera ebigambo ebyo mu masabo omwabbaire ebifaananyi byabwe n'o mu bantu. ¹⁰ Ne bateeka ebyokulwanisya bye mu nyumba ya Baasutaloosi: ni basiba omulambo gwe ku bugwe ow'e Besusani. ¹¹ Awo ab'e Yabesugireyaadi bwe bamuwuliireku ekyo Abafirisuuti kye baakolere Sawulo, ¹² awo abazira bonabona ni bagolokoka ni batambula ni bakyeesya obwire ni batoola omulambo gwa Sawulo n'e mirambo gya bataane be ku bugwe w'e Besusani, ni baiza e Yabesi ni bagyokyerya eyo. ¹³ Ne bairira amagumba gaabwe, ni bagaziika wansi w'o mumyuliru e Yabesi ni basiibira enaku musanvu.