¹ Awo omwana Samwiri n'aweerereryanga Mukama mu maiso ga Eri. N'e kigambo kya Mukama kyabbaire ky'o muwendo mungi mu naku egyo; tiwaabbaagawo kwolesebwa kw'o lwatu. ² Awo olwatuukire mu biseera ebyo, Eri ng'a galamiire mu kifo kye, (n’a maiso ge gabbaire gatandikire okuyimbaala n'atasobola kubona,) ³ n'e tabaaza ya Katonda nga kaali kulikira, n'o Samwiri ng'a galamiire okugona mu yeekaalu ya Mukama omwabbaire sanduuku ya Katonda; ⁴ awo Mukama n'ayeta Samwiri: n'atumula nti ninze ono. ⁵ N'airuka mbiro n'aiza eri Eri n'atumula nti ninze ono; kubanga onjetere. N'atumula nti timkwetere; galamira ate. N'ayaba, n'agalamira. ⁶ Mukama n'amweta ate olw'okubiri nti Samwiri. Samwiri n’a golokoka n'ayaba eri Eri n'atumula nti ninze ono; kubanga onjetere. N'airamu nti tinkwetere, mwana wange; galamira ate. ⁷ Era Samwiri yabbaire akaali kumanya Mukama, so n'e kigambo kya Mukama kyabbaire kikaali kumubiikulirwa. ⁸ Mukama n'ayeta Samwiri ate omulundi ogw'okusatu. N'agolokoka n'ayaba eri Eri n'atumula nti ninze ono; kubanga onjetere. Awo Eri n'ategeera nga Mukama niiye ayetere omwana. ⁹ Eri kyeyaviire akoba Samwiri nti yaba ogalamirire: awo olwatuukire, bweyabba ng'akwetere, n'otumula nti Tumula, Mukama wange; kubanga omwidu wo awulira. Awo Samwiri n’ayaba n'agalamira mu kifo kye. ¹⁰ Mukama n'aiza n'ayemerera n'ayeta ng'olundi nti Samwiri, Samwiri. Awo Samwiri n'atumula nti Tumula; kubanga omwidu wo awulira. ¹¹ Mukama n'akoba Samwiri nti bona, ndikola ekigambo mu Isiraeri ekiryamirirya amatu gombiri aga buli muntu alikiwulira. ¹² Ku lunaku olwo ndituukirirya ku Eri byonabyona bye naakatumula ku nyumba ye, okuva ku luberyeberye okutuusya ku nkomeraro. ¹³ Kubanga namukobere nga ndisalira enyumba ye omusango ogw'e naku gyonagyona, olw'o butali butuukirivu bwe yamaite, kubanga bataane be beereetaku ekiraamo, iye n'atabaziyiza. ¹⁴ Kyenviire ndayirira enyumba ya Eri ng'obutali butuukirivu obw'enyumba ya Eri tebwaba kulongoosebwa n'e sadaaka waire ebiweebwayo enaku gyonagyona. ¹⁵ Samwiri n'agalamira n'akyeesya obwire, kaisi n'aigulawo enjigi gy'e nyumba ya Mukama. Samwiri n'atya okukobera Eri bye yayoleseibwe. ¹⁶ Awo Eri n'ayeta Samwiri n'atumula nti Samwiri, mwana wange. N'atumula nti ninze ono. ¹⁷ N'atumula nti kigambo ki Mukama ky'akukobere? nkwegayiriire, tokingisa: Katonda akukole atyo n'o kusingawo, bwewangisa ekigambo kyonakyona ku ebyo Byonabyona by'akukobere. ¹⁸ Awo Samwiri n'amukobera buli kigambo n'atamugisa kigambo kyonakona. N'atumula nti niiye Mukama: akole nga bw'asiima. ¹⁹ Samwiri n'akula, Mukama n'abba naye, n'ataganya bigambo bye kugwa wansi n'e kimu. ²⁰ Abaisiraeri bonabona okuva eri Daani okutuuka e Beeruseba ne bamanya nga Samwiri ateekeibwewo okubba nabbi wa Mukama. ²¹ Mukama n'abonekera ate mu Siiro: kubanga Mukama yeebikuliire Samwiri mu Siiro n'e kigambo kya Mukama.