¹ Kaana n'asaba n'atumula nti omwoyo gwange gujaguzirya Mukama, eiziga lyange ligulumizibwa mu Mukama: omunwa gwange gugaziwire ku balabe bange; Kubanga nsanyukira obulokozi bwo. ² Wabula mutukuvu nga Mukama; Kubanga wabula gondi wabula iwe: So wabula lwazi oluli sooti Katonda waisu ³ Timutumulanga ate bye kyeju kingi ekyenkaniire awo; Eby'a malala tibivanga mu munwa gwanyu: Kubanga Mukama Katonda w'o kumanya, n'oyo niiye apima ebikolwa. ⁴ Emitego egy'a bazira gimenyekere. N'abo abeesitalanga beesibire amaani. ⁵ Abaikutanga bapakasirye olw'e mere; n'abo abalumwanga enjala bakomere niiwo awo, omugumba azaire musanvu; n'oyo alina abaana abangi ayongobera. ⁶ Mukama aita n'alamya: aserengetya mu magombe n'aniinisya okuvaayo. ⁷ Mukama ayavuwalya era agaigawalya: Aikya wansi, era niiye agulumirya. ⁸ Ayimusya abaavu okubatoola mu nfuufu, Asitula abeetaaga okubatoola mu lubungo, Okubatyamisya awamu n'abalangira, Basikire entebe ey'e kitiibwa: Kubanga empango gy'e nsi gya Mukama, Era yateekere ebintu byonabona okwo. ⁹ Alikuuma ebigere by'a batukuvu be, naye ababbiibi balisirikibwa mu ndikirirya; kubanga tiwalibba muntu alisinga olw'a maani. ¹⁰ Abawakana n'o Mukama balimenyekamenyeka; alibwatuka ku ibo ng'ayema mu igulu: Mukama alisala omusango gw'e nkomerero gy'e nsi; Era alimuwa kabaka we amaani, n'agulumirya oyo gwe yafukireku amafuta. ¹¹ Awo Erukaana n'ayaba e Lama mu nyumba ye. Omwana n'aweererya Mukama mu maiso ga Eri kabona. ¹² Awo bataane ba Eri babbaire baana ba Beriali; tibaamaite Mukama. ¹³ N'empisa bakabona gye babityanga eri abantu yabbaire eti; omuntu yenayena bwe yawangayo sadaaka, omwidu wa kabona n'aiza, nga bakaali bafumba enyama, ng'alina eikato ery'a mainu masatu mu ngalo gye; ¹⁴ n'akisoya mu nsaka oba bbinika oba ntamu oba sefuliya; byonabona eikato bye lyaleetanga kabona n'a bitwalanga n'eryo. Batyo bwe baakoleranga mu Siiro Abaisiraeri bonabona abaizangayo. ¹⁵ Niiwo awo, nga bakaali kwokya masavu, omwidu wa kabona n'aizanga, n'akoba omusaiza eyabbaire awaayo sadaaka nti mpa enyama okwokyerya kabona; kubanga tiyatakire omuwe enyama enfumbe wabula embisi. ¹⁶ N'o musaiza bwe yamukobanga nti tibaaleke kwokya masavu mangu ago, kaisi n'otwala ng'e meeme yo bw'e yatakire; awo n'atumulanga nti Bbe, naye wagimpa atyanu: era bw'e wagaana, n'agitwala lwa maani. ¹⁷ Ekibbiibi eky'a baisuka abo ne kibba kinene inu mu maiso ga Mukama: kubanga abantu ni batamwa ekiweebwayo eri Mukama. ¹⁸ Naye Samwiri n'a weererezanga mu maiso ga Mukama, nga mwana mutomuto nga yeesibire ekanzo eya bafuta. ¹⁹ Era maye n'amutungiranga akanagiro n'akamuleeteranga buli mwaka, bwe yaniinanga awamu n'o ibaye okuwaayo sadaaka eya buli mwaka. ²⁰ Eri n'a musabira omukisa Erukaana n'o mukali we, n'atumula nti Mukama akuwe eizaire mu mukali ono olw'ekyo kye yayazikire Mukama. Ni bairayo ewaabwe eika. ²¹ Awo Mukama n'aizira Kaana n'abba kida n'azaala abaana ab'obwisuka basatu n'a b'o buwala babiri. Omwana Samwiri n'akulira mu maiso ga Mukama. ²² Awo Eri yabbaire akairikire inu; n'awulira byonabona bataane be bye baakolanga Abaisiraeri bonabona era bwe bagonanga n'abakali abaaweerereryanga ku mulyango gw'e weema ey'o kusisinkanirangamu. ²³ N'abakoba nti kiki ekibakozesya ebifaanana bityo? kubanga abantu bano bonabona bankobera ebikolwa byanyu ebibbibi. ²⁴ Bbe, baana bange; kubanga bye mpulira ti bisa n'akadiidiiri: mwonoonesya eigwanga lya Mukama. ²⁵ Omuntu bw'asobya ku mwinaye, Katonda alimusalira omusango: naye omuntu bw'asobya ku Mukama, alimwegayiririra yani? Naye ni batawulira idoboozi lya itawabwe, kubanga Mukama yabbaire ataka okubaita. ²⁶ Omwana Samwiri ni yeeyongera okukula, n'abba muganzi wa Katonda era n'a bantu. ²⁷ Awo ni waiza omusaiza wa Katonda eri Eri, n'a mukoba nti Atyo bw'atumula Mukama nti Neebikuliire ekika kya itaawo, bwe babbaire mu Misiri nga basibiibwe mu nyumba ya Falaawo? ²⁸ Era namutoola mu bika byonabona ebya Isiraeri ni mulonda okubba kabona wange, n'o kuniinanga ku kyoto kyange, okwoteryanga obubaani, okuvalanga ekanzo mu maiso gange? ni mpa ekika kya itaawo ebiweebwayo byonabona eby'a baana ba Isiraeri ebikolebwa n'o musyo? ²⁹ Lwaki imwe okusambira sadaaka yange n'e kiweebwayo gye ndi, bye nalagiire mu nyumba yange, n'oteekamu ekitiibwa bataane bo okusinga nze, imwe okwesavuwalya n'ebisinga obusa mu ebyo byonabona Isiraeri abantu bange bye bawaayo? ³⁰ Mukama, Katonda wa Isiraeri, kyava atumula nti Okutumula natumula ng'e kika kyo n'e kika kya itaawo kyatambuliranga mu maiso gange enaku gyonagyona: naye atyanu Mukama atumula nti kiirire edi; kubanga abo abanteekamu ekitiibwa benateekangamu ekitiibwa, n'abo abanyooma tibabatengamu k'o buntu. ³¹ Bona, enaku giiza, lwe ndisalaku omukono gwo n'o mukono gw'e nyumba ya itaawo, waleke okubba omukaire mu nyumba yo. ³² Era oliringirira enyumba yange ng'e bonyaabonyezebwa mu bisa byonabona Katonda by'aliwa Isiraeri: so tewaabenga mukaire mu nyumba yo enaku gyonagyona. ³³ N'o musaiza wo gwe ntazikiriryenga okumutoola ku kyoto kyange yabbanga wa kumalawo amaiso go n'okunakuwalya omwoyo gwo: n'e izaire lyonalyona ery'e nyumba yo bafanga nga baakaiza bavubuke. ³⁴ Era kano niiko kalibba akabonero gy'oli akalituuka ku bataane bo bombiri, Kofini n'o Finekaasi; bombiri balifa ku lunaku lumu. ³⁵ Nzeena ndyeyimusirya kabona omwesigwa eyakolanga ng'ebyo bwe biri ebiri mu mwoyo gwange n'o mu meeme yange: era ndimuzimbira enyumba eyenkalakalira; era yatambuliranga enaku gyonagyona mu maiso g'oyo gwe ndifukaku amafuta. ³⁶ Awo olulituukire, buli alisigala mu nyumba yo aliiza n’amuvuunamira olw'e kitundu ky'e feeza n'o mugaati gumu, n'atumula nti mpa obumu ku bwami bwa bakabona, nkwegayiriire, kaisi ndye ku kamere.