¹ Ekigambo kya Samwiri ni kiizira Israeri yenayena. Awo Abaisiraeri ni batabaala okulwana n'Abafirisuuti ni basiisira ku mbali kwa Ebenezeri: Abafirisuuti ni basiisira mu Afeki. ² Abafirisuuti ne basimba enyiriri okulwana n'Abaisiraeri: awo bwe baatuukagaineku, Isiraeri n'akubbibwa mu maiso g'Abafirisuuti: ni baitira awo ku igye lyabwe abasaiza ng'e nkumi ina. ³ Awo abantu bwe baatuukire mu lusiisira, Abakaire ba Isiraeri ni batumula nti Mukama atukubbiire ki watynu mu maiso g'Abafirisuuti? Tusyome esanduuku ey'endagaanu ya Mukama nga tugitoola mu Siiro tugireete we tuli, etuuke mu ife etulokole mu mukono gw'abalabe baisu. ⁴ Awo abantu ni batuma e Siiro, ni batoolayo esanduuku ey'e ndagaanu ya Mukama ow'e igye, atyama ku bakerubi: na bataane ba Eri bombiri Kofuni n'o Finekaasi babbaire eyo awali esanduuku ey'e ndagaanu ya Katonda. ⁵ Awo esanduuku ey'e ndagaani ya Mukama bwe yatuukire mu lusiisira, Abaisiraeri bonabona ni batumulira waigulu n'e idoboozi inene n'okuwuuma ensi n’e wuumira dala. ⁶ Awo Abafirisuuti bwe baawuliire eidoboozi ery'okutumulira waigulu, ni batumula nti eidoboozi eryo lye batumulira waigulu einu mu lusiisira lw'Abaebbulaniya amakulu gaalyo ki? Ne bategeera ng'e sanduuku ya Mukama etuukire mu lusiisira. ⁷ Awo Abafirisuuti ni batya kubanga batumwire nti Katonda atuukire mu lusiisira. Ni batumula nti gitusangire! kubanga obw'e ira tiwabbangawo kigambo ekifaanana kityo. ⁸ Gitusangire! yani alitulokola mu mukono gwa bakatonda abo ab'a maani? Niibo bakatonda abo abaabonyazabonyerye Abamisiri mu idungu n'e bibonyoobonyo ebitali bimu. ⁹ Mwiremu amaani, mwerage obusaiza, imwe Abafirisuuti, muleke okubba abaidu b'Abaebbulaniya, nga ibo bwe baabbanga abanyu: mwerage obusaiza, mulwane. ¹⁰ Awo Abafirisuuti ni balwana, Isiraeri n'akubbibwa, ni bairukira buli muntu mu weema ye: ni wabba oluta lunene inu; kubanga ku baisiraeri ni kugwa abasaiza abatambwire n'e bigere emitwaalo isatu. ¹¹ Sanduuku ya Mukama n’enyagibwa; bataane ba Eri bombiri Kofuni no Finekaasi ni baitibwa. ¹² Omusaiza wa Benyamini n’ava mu igye n'airuka n'atuuka e Siiro ku lunaku olwo, engoye gye nga gikanukire n'e itakali nga liri ku mutwe gwe. ¹³ Awo bwe yaizire, bona, Eri ng'atyaime ku ntebe ye ku mbali kw'e ngira ng'a lingirira: kubanga omwoyo gwe gwabbaire gutengerera sanduuku ya Katonda. Awo omusaiza bwe yatuukire mu kibuga n'akikobera, ekibuga kyonakyona ni kitumulira waigulu. ¹⁴ Awo Eri bwe yawuliire eidoboozi ery'o kutumulira waigulu, n'atumula nti eidoboozi ery'o luyoogaano luno amakulu gaalyo ki? Omusaiza n'ayanguwa n'aiza n'akobera Eri. ¹⁵ Era Eri yabbaire nga yaakamala emyaka kyenda mu munaana; n'a maiso ge gabbaire gayimbaire n'atasobola kubona. ¹⁶ Omusaiza n'akoba Eri nti ninze oyo eyaviire mu igye, ni ngiruka watynu okuva mu igye. N'atumula nti byabbaire bitya, mwana wange? ¹⁷ Awo oyo eyaleetere ebigambo n'airamu n'atumula nti Abaisiraeri bairukire mu maiso g'Abafirisuuti, era wabbairewo oluta olunene mu bantu, era na bataane bo bombiri Kofuni no Finekaasi bafiire, ne sanduuku ya Katonda enyagiibwe. ¹⁸ Awo olwatuukire bwe yatumwire ku sanduuku ya Katonda, n'agwa bugazi okuva ku ntebe ye ku mbali kw'o mulyango, eikoti rye ni bukutukaku n'afa: kubanga yabbaire mukaire n'o buzito muzito. Era yabbaire alamuliire Isiraeri emyaka ana. ¹⁹ Awo muko mwana we, mukali wa Finekaasi, yabbaire kida ng'ali kumpi okuzaala: awo bwe yawuliire ebigambo ng'e sanduuku ya Katonda enyagiibwe, era nga sezaala we n'o ibaye bafiire, n'akutama n'a zaala: kubanga obulumi bwe bwamutuukireku. ²⁰ Awo ng'ali kumpi okufa Abakali abemereire wadi ne bamukoba nti totya; kubanga ozaire omwana w'o bwisuka. Naye n'atairamu so teyateekereyo mwoyo. ²¹ N'atuuma omwana Ikabodi ng'atumula nti Ekitiibwa kiviire ku Isiraeri: kubanga sanduuku ya Katonda enyagiibwe, n'o kulwa sezaala we no ibaye ²² N'atumula nti Ekitiibwa kiviire ku Isiraeri; kubanga sanduuku ya Katonda enyagiibwa