¹ Kale mbategeezia, ab'oluganda, enjiri gye nababuuliire, era gye mwaweweibwe, era gye munywereramu, ² era gye mulokokeramu; mbategeezia ebigambo bye nagibuuliriiremu, oba nga muginyweza, wabula nga mwaikiriirye bwereere. ³ Kubanga nasookere okubawa imwe era kye naweeweibwe, nga Kristo yafiriire olw'ebibbiibi byaisu ng'ebyawandiikiibwe bwe bitumula; ⁴ era nga yaziikiibwe; era nga yazuukiziibwe ku lunaku olw'okusatu ng'ebyawandiikibwa bwe bitumula; ⁵ era nga yabonekeire Keefa; kaisi n'abonekera eikumi n'ababiri; ⁶ kaisi n'abonekera ab'oluganda abasingawo ebitaano omulundi gumu, ku abo bangi abakaali abalamu okutuusia atyanu, naye abandi bagonere; ⁷ kaisi n'abonekera Yakobo; kaisi n'abonekera abatume bonabona; ⁸ era oluvannyuma lwa bonabona n'abonekera nzeena ng'omwana omusowole. ⁹ Kubanga nze ndi mutomuto mu batume, atasaanira kwetebwa mutume, kubanga nayiganyanga ekanisa ya Katonda. ¹⁰ Naye olw'ekisa kya Katonda bwe ndi bwe ndi; n'ekisa kye ekyabbaire gye ndi tekyabbaire kyo bwereere; naye nakolere emirimu mingi okusinga bonabona: naye ti niinze, wabula ekisa kya Katonda ekyabbaire nanze. ¹¹ Kale oba nze oba ibo, tutyo bwe tubuulira, era mutyo bwe mwaikiriirye. ¹² Naye Kristo bw'abuulirwa nga yazuukiziibwe mu bafu, abamu mu imwe batumula batya nga wabula kuzuukira kwa bafu? ¹³ Naye oba nga wabula kuzuukira kwa bafu, era ne Kristo teyazuukiziibwe; ¹⁴ era oba nga Kristo teyazuukiziibwe, kale okubuulira kwaisu kubulamu, so n'okwikirirya kwanyu kubulamu. ¹⁵ Era naye tuboneka ng'abajulizi ab'obubbeyi aba Katonda; kubanga twategeezerye Katonda nga yazuukizirye Kristo: gw'ataazuukizirye, oba ng'abafu tebazuukiziibwe. ¹⁶ Kuba oba ng'abafu tebazuukiziibwe, era ne Kristo teyazuukiziibwe: ¹⁷ era oba nga Kristo teyazuukiziibwe, okwikirirya kwanyu kubulaku kye kugasa; mukaali mu bibbiibi byanyu. ¹⁸ Kale era n'abo abagonere mu Kristo baabula. ¹⁹ Oba nga mu bulamu buno bwonka mwe tubbeereire n’eisuubi mu Kristo, tuli bo kusaasirwa okusinga abantu bonabona. ²⁰ Naye atyanu Kristo yazuukiziibwe mu bafu, niigwo mwaka omuberyeberye ogw'abo abagonere. ²¹ Kubanga okufa bwe kwabbairewo ku bw'omuntu, era n’okuzuukira kw'abafu kwabbairewo ku bwo muntu. ²² Kuba bonabona nga bwe baafiirire mu Adamu, era batyo mu Kristo bonabona mwe balifuukira abalamu. ²³ Naye buli muntu mu kifo kye iye: Kristo niigwo mwaka omuberyeberye; oluvanyuma aba Kristo mu kwiza kwe. ²⁴ Enkomerero kaisi n'etuuka bw'aliwaayo obwakabaka eri Katonda niiye Itaaye; bw'alibba ng'amalire okutoolawo okufuga kwonakwona n'amaani gonagona n'obuyinza. ²⁵ Kubanga kimugwanira okufuganga okutuusia lw'aliteeka abalabe be bonabona wansi w'ebigere bye. ²⁶ Omulabe ow'enkomerero alitoolebwawo, niikwo kufa. ²⁷ Kubanga kyawandiikiibwe nti Yatekere byonabyona wansi w'ebigere bye. Naye bw'atumula nti Byonabyona byatekeibwe wansi, kitegeerekeka ng'oyo teyatekeibwe wansi eyateekere byonabyona wansi we. ²⁸ Naye byonabyona bwe birimala okuteekebwa wansi we, era n'Omwana mweene kaisi nateekebwa wansi w'oyo eyateekere byonabyona wansi we, Katonda Kaisi abbenga byonabyona mu byonabyona. ²⁹ Kubanga balikola batya ababatiziibwe ku lw'abafu? oba ng'abafu tebazuukiziibwe dala, kiki ekibabatizisya ku lw'abo? ³⁰ Feena lwaki okubba mu kabbiibi buli kaseera? ³¹ Nfa buliijo, ndayire okwenyumirizia okwo ku lwanyu, kwe ndi nakwo mu Kristo Yesu Mukama waisu. ³² Oba nga nalwaine n'ensolo mu Efeso ng'omuntu obuntu, ngasibwa ntya? Oba ng'abafu tebazuukiziibwe, tulye tunywe, kubanga tufa eizo. ³³ Temubbeyebwanga: Okukwana n'ababiibi kwonoona empisa ensa. ³⁴ Mutamiirukukenga mu butuukirivu, so temwonoonanga; kubanga abandi tebategeera Katonda: ntumwire kubakwatisya nsoni. ³⁵ Naye omuntu alitumula nti Abafu bazuukiziibwe batya? era mubiri ki gwe baizire nagwo? ³⁶ Musirusiru iwe, gy'osiga tebba namu wabula ng'efa: ³⁷ ne gy'osiga, tosiga mubiri ogulibba, wabula mpeke njereere, koizi ye ŋaanu, oba ye ngeri gendi; ³⁸ naye Katonda agiwa omubiri nga bw'ataka, era buli nsigo agiwa omubiri gwayo yonka. ³⁹ Enyama yonayona ti nyama imu: naye egendi ya bantu, n'egendi ye nsolo, n'egendi ye nyonyi, n'egendi ye byenyanza. ⁴⁰ Era waliwo emibiri egy'omu igulu n'emibiri egy'omu nsi: naye ekitiibwa eky'egy'omu igulu kindi, n'eky'egy'omu nsi kindi. ⁴¹ Ekitiibwa ky'eisana kindi, n'ekitiibwa ky'omwezi kindi, n'ekitiibwa ky'emunyenye kindi: kubanga emunyenye teyekankana ginaye kitiibwa. ⁴² Era n'okuzuukira kw'abafu kutyo. Gusigibwa mu kuvunda; guzuukizibwa mu butavunda: ⁴³ gusigibwa awabula kitiibwa; guzuukizibwa mu kitiibwa; gusigibwa mu bunafu; guzuukizibwa mu maani: ⁴⁴ gusigibwa nga mubiri gw'omwoka; guzuukizibwa mubiri gw'omwoyo. Oba nga waliwo omubiri gw'omwoka, era waliwo n'ogw'omwoyo ⁴⁵ Era kityo kyawandiikibwe nti Omuntu ow'oluberyeberye Adamu yafuukire mwoka mulamu. Adamu ow'oluvanyuma yafuukire mwoyo oguleeta obulamu. ⁴⁶ Naye eky'omwoyo tekisooka, wabula eky'omwoka; oluvannyuma kyo mwoyo. ⁴⁷ Omuntu ow'oluberyeberye yaviire mu nsi, w'eitakali: omuntu ow'okubiri yaviire mu igulu. ⁴⁸ Ng'odi ow'eitakali bwe yabbaire, era n'ab'eitakali bali batyo: era ng'odi ow'omu igulu bw'ali; era n'ab'omu igulu bali batyo. ⁴⁹ Era nga bwe twatwaire ekifaananyi ky'odi ow'eitakali, era tulitwala n'ekifaananyi ky'odi ow'omu igulu. ⁵⁰ Naye kino kye ntumula, ab'oluganda, ng'omubiri n'omusaayi tebisobola kusikira bwakabaka bwa Katonda so okuvunda tekusikira obutavunda. ⁵¹ Bona, mbabuulira ekyama: tetuligona feena, naye feena tulifuusibwa, ⁵² mangu ago, nga kutemya kikowe, akagombe ak'enkomerero bwe kalivuga: kubanga kalivuga, n'abafu balizuukizibwa obutavunda, feena tulifuusibwa. ⁵³ Kubanga oguvunda guno, kigugwanira okuvaala obutavunda, n'ogufa guno okuvaala obutafa. ⁵⁴ Naye oguvunda guno bwe gulibba nga gumalire okuvaala obutavunda, n'ogufa guno okuvaala obutafa, ekigambo ekyawandiikiibwe kaisi ne kituukirira nti Okufa kumiriibwe mu kuwangula. ⁵⁵ Iwe okufa, okuwangula kwo kuli waina? Iwe okufa, okuluma kwo kuli waina? ⁵⁶ Okuluma kw'okufa niikyo kibbiibi; n'amaani g'ekibbiibi niigo mateeka: ⁵⁷ naye Katonda yeebazibwe, atuwangulya ife ku bwa Mukama waisu Yesu Kristo. ⁵⁸ Kale, bagande bange abatakibwa, mugumirenga obutasagaasagana, nga mweyongeranga buliijo mu mulimu gwa Mukama waisu, kubanga mumaite ng'okufuba kwanyu ti kwo bwereere mu Mukama waisu.