¹ Musereryenga okutaka; naye mwegombenga ebirabo eby'omwoyo, naye ekisinga mubuulirenga. ² Kubanga atumula olulimi tatumula eri bantu, wabula Katonda; kubanga wabula awulira; naye mu mwoyo atumula byama. ³ Naye abuulira atumula eri abantu ebizimba, n'ebisanyusya, n'ebigumya. ⁴ Atumula olulimi yeezimba yenka; naye abuulira azimba ekanisa. ⁵ Kale mbataka mwenamwena mutumulenga enimi, naye wakiri mubuulirenga: era abuulira niiye asinga obukulu atumula enimi, wabula ng'ategeezia, ekanisa kaisi ezimbibwe. ⁶ Naye atyanu, ab'oluganda, oba nga ndiiza gye muli nga ntumula enimi, ndibagasia ntya; bwe ntalitumula naimwe oba mu kubikula, oba mu kutegeera, oba mu kubuulira, oba mu kwegeresya? ⁷ Era n'ebitali biramu, ebireeta, eidoboozi; oba ndere, oba nanga, bwe bitaleeta kwawula mu kuvuga, kitegeerwa kitya ekifuuwibwa oba ekikubbibwa? ⁸ Kubanga n'akagombe bwe kavuga eidoboozi eritategeerekeka, yani alyeteekateeka okulwana? ⁹ Mutyo mweena bwe mutaaleetenga mu lulimi eidoboozi eriwulikika amangu, eritumulibwa kyategeerwanga kitya? kubanga mulitumulira mu ibbanga. ¹⁰ Koizi waliwo mu nsi engeri gy'enimi giti, so wabula ngeri ebula makulu. ¹¹ Kale bwe ntamanya makulu g'eidoboozi, ndibba ng'ajoboja eri oyo atumula, n'oyo atumula alibba ng'ajoboja eri nze. ¹² Mutyo mwena, kubanga mwegomba eby'omwoyo, mutakenga okweyongera olw'okuzimba ekanisa. ¹³ Kale atumula olulimi asabenga ategeezienga. ¹⁴ Kubanga bwe nsaba mu lulimi, omwoyo gwange gusaba, naye amagezi gange tegabala bibala. ¹⁵ Kale kiki? naasabyanga omwoyo, era naasabyanga n'amagezi, nayembyanga mwoyo, era nayembyanga n'amagezi. ¹⁶ Kubanga bw'osaba omukisa mu mwoyo, abba mu kifo ky'oyo atamaite yairangamu atya nti Amiina olw'okwebalya kwo, bw'atategeera ky'otumwire? ¹⁷ Kubanga iwe weebalya kusa, naye ogondi tazimbibwa. ¹⁸ Nebalya Katonda, mbasinga mwenamwena okutumula enimi; ¹⁹ naye mu kanisa ntaka okutumulanga ebigambo bitaanu n'amagezi gange, kaisi njegeresyenga n'abandi, okusinga ebigambo mutwalo gumu mu lulimi obulimi. ²⁰ Ab'oluganda, temubanga baana batobato mu magezi: naye mu itima mubbenga baana bawere, naye mu magezi mubbenga bakulu. ²¹ Kyawandiikibwe mu mateeka nti Nditumula n'abantu bano mu bantu ab'enimi egindi no mu mimwa gya banaigwanga; era waire kityo tebalimpulira, bw'atumula Mukama. ²² Enimi kyegiva gibba akabonero, ti eri abo abaikirirya, wabula eri abataikirirya: naye okubuulira tekubba kabonero eri abataikirirya wabula eri abaikirirya. ²³ Kale ekanisa yonayona bw'eba ng'ekuŋaanire wamu, bonabona ne batumula enimi, ne wayingira abatamaite oba abataikirirya, tebalikoba nti mulalukire? ²⁴ Naye bonabona bwe babuuliira, ne wayingira ataikirirya oba atamaite, anenyezebwa bonabona, asalirwa bonabona omusango; ²⁵ ebyama eby'omu mwoyo gwe bibonesebwa; era atyo alivuunama amaiso, n'asinza Katonda, ng'atumula nga Katonda ali mu imwe dala. ²⁶ Kale kiri kitya, ab'oluganda? Bwe mukuŋaana, buli muntu alina olwembo, alina okwegeresya, alina ekimubikuliwe, alina olulimi, alina okutegeeza. Byonabyona bikolebwenga olw'okuzimba. ²⁷ Omuntu bw'atumulanga olulimi, batumulenga babiri oba nga bangi, basatu, era mu buwu, era omumu avuunulenga: ²⁸ naye oba nga wabula avuunula, asirikenga mu kanisa; atumulenga mu meeme ye era ne Katonda. ²⁹ Ne banabbi batumulenga babiri oba basatu, n'abandi baawulilenga. ³⁰ Naye ogondi atyaime bw'abikuliwanga, esokere asirikenga. ³¹ Kubanga mwenamwena musobola okubuuliranga mumu, bonabona bayegenga, era bonabona basanyusibwenga; ³² n'emyoyo gya banabbi gifugibwa banabbi; ³³ kubanga Katonda ti wo kuyoogaana, naye we mirembe; nga mu kanisa gyonagyona egy'abatukuvu. ³⁴ Abakali basirikenga mu kanisa: kubanga tebalagiirwe kutumula; naye bafugibwenga, era nga n'amateeka bwe gatumula. ³⁵ Era bwe batakanga okwega ekigambo, babuulilyenga baibawabwe eika: kubanga kye nsoni omukali okutumulanga mu kanisa. ³⁶ Oba gye muli ekigambo kya Katonda gye kyaviire? oba kyatuukire eri imwe mwenka? ³⁷ Omuntu yenayena bwe yeerowoozanga okubba nabbi oba wo mwoyo, ategeerenga bye mbawandiikira, nga niikyo ekiragiro kya Mukama waisu. ³⁸ Naye omuntu yenayena bw'atategeera, aleke okutegeera. ³⁹ Kale bagande bange, mwegombenga okubuuliranga, so temwegeresyanga kutumulanga enimi. ⁴⁰ Naye byonabyona bikolebwenga nga bwe kisaana era mu mpisa ensa.