¹ Di Yesu oko yai ki kuno, eko ot i adul me Yudea, loka tetu ecilet me Yorodan: di bobo jo atot oko cokere bute, bala kite kame oudo enare timo kede en eko pwonyo gi. ² Di Iparisayon mogo oko bino bute di kiko penye be, “Iswil yei ne dano riamo dako mere?” man gin oudo kitie timo pi kino doge. ³ Do en oko dwoko di ewaco ne gi be, “Nyo en kame bin Musa ociko ne wu?” ⁴ Gin kiko dwoko be, “Musa bin oyei ne icuo wandiko baluwa me gonyo nyom di en eko pokere kede dako mere.” ⁵ Yesu di oko dwoko ne gi be, “Pi nuang me cunyu Musa bin oko wandiko Iswil noni. ⁶ Do cako ki agege, i kare me cwec, ‘Rubanga ocweo gi icuo kede dako. ⁷ Pi kop noni, icuo bino weko papa mere kede toto mere, di eko ribere kede dako mere; ⁸ Di gin are gi kiko doko kom acel: udo bobo likame kitie jo are do kop acel. ⁹ Pi mano, gikame Rubanga otieko ribo karacel, kur ngatamoro poki.” ¹⁰ Di do kitie i ot, josiao mege oko bobo penye i kom kop noni. ¹¹ En eko waco ne gi, “Icuo moro kenekene kame bino riamo dako mere di eko nyomo ace, udo etimo adote ne dako mere. ¹² Kamanono da, dako kame pokere kede cware di eko ot nyomere kede icuo ace, udo etimo adote.” ¹³ Jo oko donyo kelo idwe atino bute, me wek eket cinge i kom gi, do josiao oko donyo cokocoko jo nogo be iweki. ¹⁴ Do kakame Yesu oneno kede tim no, cunye likame oko bedo yom, di en eko waco ne josiao mege be, “Yei nenu idwe atino bin buta, kur igengunu gi, pien Ajakanut ka Rubanga tie pir jo kame cal bala gin. ¹⁵ Ateteni awaco ne wu, ngat kalikame gamo Ajakanut ka Rubanga bala atin atitidi, likame ebino donyo iye.” ¹⁶ En eko tingo gi egongo i kore, eko keto cinge i wi gi, di eko mino gi winyo. ¹⁷ Di en oudo tie yai ot, icuo moro oko ringini di eko riondiko i nyime, di eko penye be, " “Apwony aber, atim nyo me wek adony ikuo kame bedo nakanaka?” ¹⁸ Di Yesu oko waco ne be, “Pinyo komio in itie ilwonga be ngat aber? Likame tie ngat kame ber kwanyo ngat acel kenekene, en Rubanga. ¹⁹ Do in ingeo cik gi: ‘Kur itimo adote, Kur ineko, Kur ikwalo, Kur imio ijura me abe, Kur isero, Wor papa ni kede toto ni?’ ²⁰ Lo nono oko dwoko be, “Apwony, abedo gwoko mago dedede cako di pwodi atie eponga.” ²¹ Di Yesu oko ngine eko bedo kede amara bute, di eko waco ne be, “In irem kede gi acel kame ipoore timo; oti icat jame dedede kame itie kede, di iko mino but jocan, di iko bino bedo kede abar i malo, di iko riongo musalaba iko luba.” ²² En eko jul pi kope go, di eko ot tenge di cunye otur, pien oudo ebaro twatwal. ²³ Yesu oko neno tie mere, eko waco ne josiao mege be, “Ebino tin bedo tek benyo ne jo kobaro donyo i Ajakanut ka Rubanga.” ²⁴ Kop noni oko neko kom josiao. Do Yesu bobo oko waco ne gi be, “Idwe na, donyo i Ajakanut ka Rubanga tin bino bedo tek benyo ne jo kame geno abar. ²⁵ Ebino bedo yoyot ne aguragura donyo ki wang piso kalamo ngabar donyo i Ajakanut ka Rubanga.” ²⁶ Man oko medo neko kom josiao itek, kiko penyere kengikengi be, “Ngai do kame bino udo alako?” ²⁷ Yesu oko ngino gi di eko waco be, “Man likame twerere kibut dano, do eyoyot kibut Rubanga: pien kibut Rubanga gi dedede twerere.” ²⁸ Di Petero oko cako waco ne be, “Neningo, wan oweko gi dedede di oko bino lubi.” ²⁹ Yesu oko dwoko be, “Ateteni awaco ne wu be, “Likame tie dano moro kame oweko paco mere, imiegu kede amiegu mege, amotoko toto kede papa mere, dako arabo idwe mege kiton poti mege pira kede pi ejiri, ³⁰ Do en ebino udo tien tol acel i kare noni, ude, imiegu kede amiegu, joatoti, idwe kede poti karacel kede itidil da, kede ilobo kame tie bino en eko bino udo kuo kame bedo nakanaka. ³¹ Do jo atot kame nataman tie me agege bino bedo me ajikini, kede jo kame tie me ajikini bino bedo me agege.” ³² Di do gin oudo kitie i yongayo me ot Yerusalem, en oudo eko ot anyim. Gin kiko uro adikinicel: kakame gin oudo kitie lube kede, gin oudo ilwor. En doko eko tero josiao tomon kiwie are kargi ken gi, di en eko cako tatamo ne gi kop i kom gikame oudo oyaro timere ne ³³ di ewaco ne gi be, “Nenunu, wan otienu ot Yerusalem, do kobino mino Wot ka dano i cing jodongo me josaseredoti kede but jopwony me Iswil: gin kibino ngolo ne kop me to, di kiko mine i cing jo kalikame Iyudayan, ³⁴ Di gin kiko bino timo ne tim me acae kede ngungulo lau i kome di kiko dane di kiko neke da, do i ceng me adek en ebino yaruno.” ³⁵ Di Yakobo kede Yokana, awobe ka Sebedayo oko bino but Yesu di kiko waco ne be, “Apwony, wan okwao be itim ne wa gikame omito.” ³⁶ Yesu oko penyo gi be, “Nyo en kame wun imitunu be ango atim ne wu?” ³⁷ Gin kiko waco ne be, “Okwai be imi ngat acel kikom wa bed i badi tetu cam kede ngat ocelu i badi ibadi tetu ngodal i deyo me ajakanut ni.” ³⁸ Do Yesu oko waco ne gi be, “Wun likame ingeunu gikame itienu kwano; benyo, itwerunu uda mato ikopo kame ango miero amati, arabo, ikounu udo batisimu kame miero batiso ango kede?” ³⁹ Gin kiko waco ne be, “Wan otwero.” Di Yesu oko waco ne gi be, “Ateteni ibinunu mato ikopo kame ango miero amati, doko da kobino batiso wu kede batisimu kame miero batiso ango kede. ⁴⁰ Do mino ngatamoro bedo i bada tetu cam amotoko tetu ngodal, likame ango en kame amio; do kobino mino but jogo kame kotieko iiko ne gi.” ⁴¹ Kakame josiao icegun tomon oko winyo kede kop noni, gin kiko lilo kede Yakobo kede Yokana. ⁴² Do Yesu oko lwongo gin bute, di eko waco ne gi be, “Wun ingeunu be jo kame poore pugo jo kalikame Iyudayan kipugo gi tetek, doko da jodongo gi tie kede akarinikin i kom gi. ⁴³ Do man likame epone kame miero ebed kede i diere wu; do ngat kame mito bedo dano kame pire dwong kikom wu, miero ebed ngatic wu, ⁴⁴ doko ngat kame mito bedo dano me agege i diere wu, miero ebed epasoit me jo icegun dedede. ⁴⁵ Pien Wot ka dano da likame obino pi jo timo ne tic, do en ebino pi timo tic ne jo icegun kede pi jalo kuo mere pi kelo alako but jo atot.” ⁴⁶ Di do gin kiko tuno Jeriko: kakame Yesu kede josiao mege oudo tie yai kede ki Jeriko karacel kede ekodet adwong me jo, emuduk moro kame oudo maro kwac kame nyinge Batulumayo wot ka Timayo oudo tie bedo i nget yongayo. ⁴⁷ Kakame ewinyo kede be oudo Yesu me Nasaret inonono, en eko cako lelemo di ewaco be, “Okwe Yesu Wot ka Daudi, mi kisa maki keda!” ⁴⁸ Jo atot oko donyo cokocoko en di ki waco ne be elingi, do en eko meede ameda ilelem di ewaco be, “Okwe Wot ka Daudi, mi kisa maki keda!” ⁴⁹ Di Yesu oko cungo, di eko waco be lwonge ebin. Di do gin kiko lwongo emuduk, di kiwaco ne be, “Mii cunyi bed nwang, yai malo, en etie lwongi.” ⁵⁰ En eko uco egoe mere kame oudo erwao, eko yai malo di eko ot but Yesu. ⁵¹ Yesu oko penye be, “Imito be atim ni nyo?” Emuduk oko dwoko ne be, “Rwot, mi wanga nen piny.” ⁵² Di Yesu oko waco ne be, “Yai i ot; yei ni otieko cangi.” Cucuto nono wange oko cako neno piny di do en eko upere kede Yesu.