¹ Kakame gin kinoko kede Yerusalem, di kitie Betepage kede Betania tetu moru me Olibeti, En eko cwano josiao mege are, ² Di eko waco ne gi be, otunu icalo kame tie inyim wu no; cucuto di itienu donyo iye, ibinunu udo atin me Punda di kotweo, kame dano moro likame obedo iye; gonyenu ikounu kele. ³ Do ka dano moro openyo wu be, Pinyo komio itienu timo kamanono? Wacenu be, Rwot en kame mite; awakawaka en ebino mine kodwoke kan. ⁴ Gin kiko ot, di kiko udo atin me punda di kotweo inget ekeko kakame oudo yote are riamo iye; di gin kiko gonye. ⁵ Di jo kame oudo tie cungo kanono oko penyo gi be, Itienu timo nyo, gonyo atin me punda? ⁶ . Gin kiko dwoko ne gi kop bala kame Yesu oudo ociko gi kede: di jo nogo oko yei ne gi ot. ⁷ Gin kiko kelo atin me punda but Yesu, kiko peto ne igoen gi, di Yesu oko bedo iye. ⁸ . Di jo atot oko peto igoen gi iyongago; mogo ikom gi oko tongo boke me yen di kiko donyo yaro iyongayo. ⁹ . Jo kame oudo telo anyim kede kame oudo lube icen, oko donyo ilelem di kiwaco be, Osana! Tie kede winyo ngat kame tie bino inying Rwot. ¹⁰ . Winyo bed i Ajakanut ka papa wa Daudi, kame tie bino inying Rwot: Osana i malo twal. ¹¹ . Yesu oko donyo Yerusalem, di eko donyo i tempulo, kakame eko tieko ngingico kede jame dedede. Do bala kame piny oudo oyuto kede, omio en eko ot Betania kede josiao mege tomon kiwie are. ¹² . Odiko mere, kakame gin idwogo kede yai i Betania, eko mito cam: ¹³ . Di eko ngoloro yat epigi ikakabobor kame boke oudo oumo, en eko nyiko ikome pi neno ka oudo etwero udo anyakini mogo iye; do kakame etuno kede kuno, en eko udo be yat nono oudo li kede anyakini kwanyo boke en oume, pien kare me nyak gi oudo pwodi likame otuno. ¹⁴ . Di Yesu oko waco ne yat be, “Ngatamoro kur bobo cam anyakini ni!” di Josiao mege oko winyo kop noni. ¹⁵ . Gin kiko tuno Yerusalem, Yesu oko donyo i tempulo eko cako riamo jo kame oudo tie cato kede wilo jame i tempulo ooko, di eko rereto imesai me jo kame oudo seso sente kede gibedo me jo kame oudo cato aweleko iwongiwong. ¹⁶ . En likame eko yei ne ngatamoro yeno tero gimoro i tempulo ooko. ¹⁷ . Di do en eko cako pwony di ewaco be, “Mam owandiko itabu kacil be, Atekerin dedede bino lwongo oda be ot me ilega? Do wun ilokenu edoko kapwono me joyak”. ¹⁸ . Kakame joawandiko iswilia kede jodongo me josaseredoti oko winyo kede kop nono, gin kiko cako mono epone me neko Yesu, pien gin oudo kitie kede lworo ikome; pien jo atot oudo ouro pwony mere. ¹⁹ . Otieno di ceng tie donyo, Yesu oko yai tenge i bomba. ²⁰ . Odiko sek kakame gin kitie beo kede iyongayo, kiko neno yat epigi ca otieko tuo cako i aliasin mege. ²¹ . Kakame Petero oko yutuno kede gi otimere, eko wacone Yesu be, “Apwony, neningo yat epigi kame in ilamo ca otieko tuo” ²² . Yesu oko dwokone gi be, “Bedunu kede yei but Rubanga. ²³ . Pien ateteni ango awacone wu be, “Ngat kame wacone moru ni be, Mukere iko ot poto i nam di likame ebedo kede gung icunye; do di eko yei be gikame en ewaco go bino timere, gikame en eyamo bino timere ne ²⁴ . Pi mano, ango awacone wu be, “Gi dedede kame imitunu, ka ilegunu, di iyeunu be itiekunu udo gi, ibinunu udo gi. ²⁵ . Doko kame itie cungo di ilego, sasiro ngatamoro kame in itie kede kop moro; me wek Papa ni kame tie malo da kobino sasiro in ikom gikareco ni. ²⁶ . Do kame in likame isasiro, Papa wu me i malo likame bino sasiro wu gikareco wu. ²⁷ . Bobo gin kiko dok Yerusalem kakame En etie ot kede itempulo, jodongo me josaseredoti kede jopwony me iswil karacel kede joadongo me adul, ²⁸ . Gin kiko penye be, Akarinikin kangai en kame in itimo kede gigi? Ngai en komi akarinikin nini me timo gigi? ²⁹ . Yesu oko dwoko di ewaco ne gi be, Ango da ayaro penyo wu peny acel, ka imianu adwokini, ango da abino wacone wu tuai kame ango audo kede akarinikin me timo gigi. ³⁰ . Wacanu, Ibatis ka Yokana, eudo twero mere kibut jo arabo ewok ki malo but Rubanga ³¹ . Gin kiko geno tamo epone me dwoko, di kiwaco be, kame wan owaco be ewok imalo, en ebino waco be, Pinyo bo komio wun likame ikounu yei en? ³² . Do ka owacunu be, Ewok kibut jo, gin oudo ilworo jo, pien jo dedede oudo woro Yokana be ebedo enabi ikokome. ³³ . Omio gin kiko dwoko ne Yesu be, Wan likame ongeo, Yesu oko dwoko ne gi di ewaco be, Akadi ada likame abino waco ne wu kakame ango audo iye akarinikin me timo gigi.