1
. Do i kare me ajikin abino sipo moru me ot ka Rwot malo iwi mori apat, di oko kiarao en malo kalamo imukuran, di atekerin atot ko siriti iye.
2
. Jo atot bino ot di kiwaco be, “bianu otunu malo wi moru ka Rwot, i ot ka Rubanga ka Yakobo. En ebino pwonyo wa mit mege di wan oko lubo kop mege,” pien iswil bino wok ki sion, di kop ka Rwot ko wok i Yerusalem.
3
. En ebino ngolo kop diere me atekerin atot di eko coko atekerin katek kame tie ka kabor. Gin kibino teto ipimai gi doko leb kwei di kiko teto tongini gi doko pale me lwero yen. Ateker acel lika bino tingo epima malo yi kede ateker apat, do lika bobo kibino medo pwonyere me yi.
4
. Do ngat acelacel bino bedo idud olok mere kede idud yat epigi mere. Likame tie ngatamoro kame bino mino gin lworo pien dog Rwot me jo yi en owaco.
5
. Pien ateker acelacel timo mit mege inying Rubanga mere. Do wan obino timo mit nere inying Rwot Rubanga wa nakanaka.
6
. “Ceng no” Rwot waco be “Ango abino coko ingwalasa karacel, kede coko jo kame acacao, jo kame ango amio lito.
7
. Ango abino loko ingwalaso doko donge me jo kede jo kame oudo oriamo tenge bino doko ateker atek, di ango, Rwot ako bino pugo gi iwi moru me Sion nakanaka.
8
. Do wun, kabedo kame oneno iye jo, kabedo kadwong ka nyar ka Sion – ebino dwogo buti apugan ni kasek bino bobo bedo bala bin sek, jago kobedo me ka nyar ka Yerusalem.
9
. Nan do, pinyo komio in ilelemo kede koko? Abaka di lika tie ne wu? Ngat kame mio wu tam oto? Mam do en komio aramo omaki bala me dako atie ramere me nywal?
10
. Bedi i aramo nyako me Sion di ko kwekweta pi nywal bala dako kame tie ramere me nywal. Nataman in ibino donyo oko me bomba, iko bedo abar dido iko ot Babulon. Obino do lako wu i kounu Rwot do bino lako wu ikounu icing jokwor wu.
11
. Atekerin atot do nataman ockere pi suro wu: di kiwaco be, “Omunao en, wek wang wa nen Sion kede ewaka?
12
. Likame kingeo tam ka Rwot, dokon likame kingeo aikaika mege, pien ecoko gi bala abunge me engano kame oiko pi canyo i dyakal.
13
. Nyako me Sion, yai malo di iko canyo pien abino loko tungi doko lilim di ako loko tieni doko buronsi. In ibino nyinyito atekerin atot di iko mino abar gin me aram but Rwot, abar gi da omio but Rwot me lobo lungi