¹ Nataman wun isirikalen cokere nu karacel, okwe anyira me isirikalen! En ebuto eluko wa! gin ki yaro jwato nga ngol kop me Isirail, kede ebela me lilim ileme. ² Do in Betelem Epurata, akadi bed bala in ititidi idyere me tutumian me Yuda, do pwodi ki but ngat kame bino wok inyima en ebino bedo ngatel me Jo me Isirail, kame ot mere anyim bin ocakere sek likame ebino jik. ³ Pimano, en ebino mino gi tuno kede kare me dako kame ramere me nywal bino wokun kede, dido imiegu kede amiegu mege odong kobino dok but idwe me Isirail. ⁴ Di en eko bino cungo di epitere kede teko a rwot, i twer me teko me nying rwot Rubanga mere, di gin iko bino kuo pien en ebino bedo dwong i ajakini me lobo. ⁵ Di icuo nono ko bino bede imulem, kame jo me Asiria bino i lobo wa, doko kame ebino nyonyono kabedo me Abaka wa, wan oko bino cwano ne jo kwat kanyare akadi cuo atek kanyauni. ⁶ Di gin iko bino dudubo lobo me Asiria kede pala epima, kede lobo i kakame odonyo iye, en ebino lako wa icing Asiria, kame en ebino ilobo wa, kede kame di enyono ikor kame tie idiere me lobo wa. ⁷ Dido jo ko dong kibut Yakobo kobino bedo idiere me jo bala toyo owok ibut Rwot, bala ngat kame cuo kodi iwi lum kalikame daro jo amos daro awobe ka jo. ⁸ Di do jo odong iyot ka Yakobo ko bino bedo ikom jo kalime tie i Yudayan. I diere me jo katot bala engu kame tie idiere me leini me itela. Bala atin me engu atie idiere me oromini. Kame en ebedo di eko kato enyono gin dedede piny di likame tie dano moro kame ko twero lako gi icinge. ⁹ Ibino tingo cingi malo ikom jo kwor ni, oko bino tieko jo kwor ni. ¹⁰ Rwot di ko waco be iceng nono ebino timere amanono, ango abino tieko asigiran idiere wu, di ako muducaro agadigadi wu. ¹¹ Ango ayaro bino tieko bomban me lobere wu, di ako bino rereto apama dedede kame wun igerunu koluko piny wu. ¹² Doko da ango abino jiko tim me jwok kame tie icing wu, di likame doko ikounu bedo tie kede emuron moro. ¹³ Calini wu kame opao ango abino tieko, kede iton ipirin kame iwandik tie iye kame tie idiere wu, di likame iko unu medo woro tic kame itiunu kede cing wu. ¹⁴ Di ako bino puputo ipirin me cal jwogi kame tie idiere wu, di ako bino dudubo bomban wu. ¹⁵ Abino culo kwor kede lilo me gero na ikom jo dubo, kame geno gin pwodi likame iwinyo.