¹ Wek obedunu kede lworo, me wek cikere mere kur wek wa idonyo iwei mere, di ngatamoro i kom wu kur kei donyo iye. ² Piento i ateteni otuco Ejiri ni butwa kede but gi da, do kop kame gin i winyo likame okelo bero moro but gi, pi likame iribakino kede yei i but gin jo owinye. ³ Pi wan jo otieko yei donyo iwei ni, bala kitekame Rubanga owaco kede be, "Bala kame bin akwongere kede wang cuny be, 'likame i bino donyo i wei na" en ewaco kaman bed bala tice mege bin otiek ikare kame ecweo kede piny. ⁴ Pien i wandik kacil owaco kop i kom ceng me kanyaare be: "di i ceng me kanyaare Rubanga oko wei itice mege dedede." ⁵ Doko da i kanoni ewaco be, "likame kibino udo wei na". ⁶ Bala kitekame edong kede be jomogo poore donyo iye, akadi di jo kame bin ogeo otito ne gi i agege likame otwero donyo iye pi lii me yei, ⁷ Di Rubanga bobo oko kwanyo ceng ace, kame en "Tin" di wok i dog Daudi ingei kare alac, di ewaco be, "Tin kame iwinyunu dwan Rubanga, kur ibedunu kede i nwangunu cuny wu." ⁸ Pien ka Josua oudo omio gi wei, koto oudo likame oyamo bobo i cen kop ikom ceng ace. ⁹ Pi mano bala kitekame etie kede kare me wei pore ne jo ka Rubanga. ¹⁰ Pien ngat kame donyo wei ka Rubanga woraro itice mege dedede bala kitekame Rubanga da oko wei kede ki tice mege. ¹¹ Pi mano, otamakinunu kede teko dedede pi donyo iwei nono, tetekeny kur donyo iye loi ngatamoro bala kitekame oporo kede anen me lii me yei. ¹² i ateteni kop ka Rubanga kuo di etio kitek, en ebit kalamo pala epima kame openo tuni tuni, di ecobo paka tuno i apokini me cuny kede tipo, kede kariamo me cogere lede isum, di bobo epoko par kede mit abeco kede mit areco me cuny jo. ¹³ Doko likame tie gi acwea moro dedede kame okanere ki nyim Rubanga, pi jame dedede ilererei iwange, en nono kame miero wan dedede omi adwokini me tice wa. ¹⁴ Pimano, bala kitekame ngeere kede otienu kede nyatel josaseredoti kame dwong kalamo, kame otieko ot paka inyim Rubanga, en Yesu wot ka Rubanga, poore do omokunu kitek ikom yei wa kame otucunu. ¹⁵ Pien wan likame otienu kede nyatel josaseredoti kame likame kisa twero mako ikom wa pi goro wa, do en etie ngat kame kotamo iyote dedede bala wada, do di likame en eko dubo. ¹⁶ Pi mano, poore onyikunu kede nwangcuny i kom me ajakanut me kisa, tetekeny emiwa kisa, di oko udo kisa pi konyo wa i kare kame mitere.