¹ Pian buli ngasaseredoti adwong acel acel okwanyo i kom jo, di oko kete timo tic akaka gin inyim Rubanga, pi miino gi amia kede gi ayala pi dub. ² En etwero bedo kede mwolo but jo kame kwia piny kede jo kame tie ot rwenyo, bala kitekame eda udo etie kede goro me dano adana. ³ Pi manono en miero emi gi ayala pi dub mege kame make, karacel kede pi dub me jo da. ⁴ Doko likame tie ngatamoro kame tero woro ni, kwanyo kenekene ngat kame Rubanga olwongo, bala kitekame oudo riki elwongo kede Aroni. ⁵ I epone acel nono da, Kristo likame bin otingere kene pi bedo nga Saserodoti adwong, do oudo Rubanga en kame bin oyere ngat kame bin owacone be, "in en woda, tin ango adoko Papa ni." ⁶ En bobo ewaco i karamoro ace be, "in itie ngasaseredot mwakini kede mwakini i rwom a Meresedeki." ⁷ Ikare kame oudo ekuo kede i piny kan elego kede dwan amalo kede pige wange di ekwao Rubanga ngat kame oudo twero lake ki to. Rubanga oko winye pi kite kame oudo epoore kede. ⁸ Akadi bed bala en wot ka Rubanga, en epwonyere bedo ngat kame woro Rubanga pi can kame ebeo iye. ⁹ Kakame omie edoko kede ngat kame oudo epoore bedo, eko doko won alako me nakanaka but jo dedede kame winyo en. ¹⁰ Jo kame Rubanga olwongo bala Isaseredotin adongo di lubo rwom ka Meresedeki. ¹¹ Kame wan otie kede kop a tot ikom kop noni doko gonyogi tek pien niang wu nan odoko nyap. ¹² Pien bed bala ikare ka nataman oudo wun opoore nu doko jo pwonye, pwodi imitunu ngatamoro pwony wu pwony me agege me mung ka Rubanga. Pwodi imitunu cak, weko cam ka nwang. ¹³ Pien ngat kame pwodi mato cak kenekene udo en pwodi eli kede diru ikom kop amako poore, en pwodi mukeru. ¹⁴ Do cam a nwang tie pi jo ko cato, jo kame tam gi twero poko gi kaber kede gi karac.