¹ Nan ango awaco be musika di pwodi en atin erom aroma kede epasoit, do di en kame eyaro bedo Rwot i gi dedede. ² Do ebedo i cing ngat kame gwoke kede ngat kame loo jame mege, paka tuno kare kame Papa opwoyo. ³ Akadi wada kame pwodi oudo o tie idwe katitino, kame di wan oudo otuere i jame me lobo ni. ⁴ Do kaka me kare oromo kede, Rubanga diko cwano wode, kame dako onywalo kede Iswil. ⁵ Pi lako gin jo kame iswil otweo go, me tetekeny egam wa bala idwe mege. ⁶ Pi kita kame ibedunu idwe, Rubanga oko cwano Tipo ka wode i cuny kame kok be, "Abba Papa" ⁷ Pimano in likame ibedo epasoit, do ibedo woda ikome, kame do in woda in do itie musika ka Rubanga di beo kibut wode Kristo. ⁸ Di pwodi in likame oudo ingeo Rubanga in oudo itio ne gi mogo, kame i agege gin likame kibedo Rubanga. ⁹ Do nan dido itieko ngeno Rubanga, Rubanga da do ongei. I tieunu bobo benyo dok but gi mogo, agoro kame kony gi li kame un do imitunu bobo dok tic negi. ¹⁰ wun ingicunu ceng, kede dwete, kede kare, kede mwakini. ¹¹ Ango atie kede lworo i komu pien alole tic me nono ikomu. ¹² Imiegu akwao u be bedunu bala ango, pien ada acal bala un, Pien likame itimo nanu awanon moro. ¹³ Iun ibedunu ngeno be kede goro me kom ango abedo tuco neu Ejiri geno i agege. ¹⁴ Do atama kame bin tie ikoma, likame wun bin i caunu, amoso dagi do i gama nu bala Malaika ka Rubanga akadi bala Kristo Yesu. ¹⁵ Ani winyo kame un oudo i iyamunu, pien ango da ikoma abedo mujura, be kame di koto oudo twerere, oudo koto i wotunu wangu ikomu di ikounu mino but ango. ¹⁶ Benyo nan do ango adoko ngakwaru, pien kite kame ayamo neu kede ateni. ¹⁷ Jo mogo mite kengi kitek butu, likame pi tien kop, pien gi imito kwanyo wun tenge kibuta tetekeny imirenu kitek but gi. ¹⁸ Etie gi kaber twatwal pi un mire nakanaka i jamini kabeco, di likame kenekene kame ango atie kede wun, do paka iton kame di ango ali. ¹⁹ Idwe na katitino kame aremere me nywalo wu bobo tuno kede kame Kristo ocwere kede iun. ²⁰ Amito be koto abed di atie kede wun nataman, di ako loko dwana do pwodi adong kede abuinikin ikomu. ²¹ Do awaconeu wun jo kame pwodi imitunu bede di iswil pugo wu, likame iwinyunu iswil. ²² Pien o wandiko be Aburaam oudo tie kede awobe are, acel kame onywalo kede dako obedo apasoit, di acel onywalo kede dako mere ikokome ogony. ²³ Do awobi kame onywalo kede dako apasoit obedo anywali me kom, do awobi kame onywalo kede dako mere kikome ogony obedo atin me cikere. ²⁴ Jamun mege, kame cungo pi apor me cikere are, acel owok i moru Sinai kobedo apasoit Hagar. ²⁵ Pien Hagar ni en moru me Sinai kame tie Arabia. Kame tie adwokini me Yerusalem anan kame tie iye I pasoi kede idwe mege. ²⁶ Do Yerusalem kame tie malo en kogony kame en toto wan dedede. ²⁷ Pien o wandiko be leli in adonge kalikame nywal, lelemo kede in ngat kalikame ikanyo aramo me nywal, pien mon kame oweko tot kede idwe kalamo dako kame tie kede icuo. ²⁸ Nataman do imiegu bala kite kame Isaka obedo tie kede, wada do nataman obedo idwe me cikere. ²⁹ Do bala kite kame atin kame onywalo kede mit me kom, tidilo kede atin kame onywalo kede mit me cuny etie kamanono nataman. ³⁰ Do kame di etie Kamano i wandik kacil waco benyo, "riam dako apasoit kede wode pien wot ka dako apasoit likame bino bedo musika karacel kede wot ka dako ogony. ³¹ Pimano imiegu na wan likame otie idwe me dako obedo apasoit, do wan otie idwe me dako kogony.