¹ Wun jomingo me Galatia, ngai okwakwanyo wun, komio i yaunu tenge ki lubo ateni, inyim alu kame Yesu Kristo bin o neeno iye, kogure i musalaba ki diere wu? ² Amito udo ngec ibut u, bin i udunu Tipo pi timo tice me iswil, arabo iwinyunu Ejiri di iko unu yei? ³ Benyo mingo wun cabo oitirao? bin i geunu kede Tipo, nataman imitunu do ngetakino kede kom? ⁴ Pekere atutututu kame ibeunu iye go mam do tie me atatai? kame di ecal kamano udo etie me atatai. ⁵ En ngat kame omio wun Tipo kede oko timo tangu idiere wu, etimo kede tice me iswil arabo kede winyo kop me yei? ⁶ Bala kite kame bin Aburaam oyei kede Rubanga, di oko mare bedo ngat ko poore ⁷ Pimano ngeunu be jo ko yei gida kibedo ikwae Aburaam pi yei. ⁸ Doko da i wandik kacil bin ogeo nyuto sek epone kame Rubanga bin omaro kede jo kalikame i Yudayan bedo jo ko poore pi yei, bin eyamo kede Aburaam sek di pwodi Ejiri, "be di beo kibuti Atekerin dedede bino udo winyo." ⁹ Aso jo dedede kame tie kede yei udo winyo karacel kede Aburaam, ko yei ¹⁰ Bala kame jo katot kame mire lubo tice me iswil tie i ilam, Piento o wandiko be: "olamo buli dano kalikame meede lubo kope dedede kame o wandiko i itabu me iswil pi timo gi." ¹¹ Nan do etie kakaler, likame tie dano kame doko ngat o poore i nyim Rubanga pi lubo iswil. ¹² Bobo da iswil likame tie iyei; do dano kame lubo tice me iswil bino kuo iye. ¹³ Kristo olako wa i ilam me iswil, ingei en yei doko ilam pir wa. Piento o wandiko: "ilam mak buli dano kame lierere iyer." ¹⁴ Etimere kaman tetekeny winyo Aburaam tun but jo kalikame obedo i Yudayan di beo i but Yesu Kristo; me wek oudunu giacika me Tipo di beo iyei. ¹⁵ Imiegu kede amiegu na, ber ayame ne wu bala apor, kame dano oketo isikan di oko tieko moko, likame tie dano moro kame karuno ture, ara medo iye gimoro. ¹⁶ Nan but Aburaam kede akware en kame omio cikere nogo, di ewaco be, liame kede ikwae bala jo kame tot; do bala ngat acel, be kede but akwari, en kame obedo, Kristo. ¹⁷ Kede man, ango ayamo be isikan kame udo Rubanga otieko moko sek i Kristo, iswil oko wokun mwakini tol ongwon kede ot adek (430) icen mere likame karuno turo isikan kame Rubanga otieko moko ara mino cikere mere doko gi ka likame tio. ¹⁸ Pien Pien kame giamia omio pi lubo iswil, udo eli do icikere. ¹⁹ Pinyo do komio iswil tie? oudo omede pi turo cik tie, tuno kede kame akware obino kede but ngat kame udo mio cikere, bobo da i malaikan oko wire icing ngairucakin. ²⁰ Aso ngairucakin likame tie ngairucakin me dano acel, do Rubanga tie acel. ²¹ Mam do iswil piemo kede cikere ka Rubanga? li atwal Rubanga dagi; Pien kadi koto iswil karuno mino wa kuo ka nyen oudo koto odoko jo ko poore inyim Rubanga pi lubo iswil. ²² Do i wandik kacil nyuto kakaler, jo dedede tie iloc me dub, me wek cikere kame ociko pi yei ikom, Yesu Kristo mi jo kame yei. ²³ Do di pwodi yei likame obino, wan oudo okanere iloc me iswil, di ocego wa pi daro yei kame udo tie bino. ²⁴ Pi mano iswil oudo obedo ngapwony wa pi kelo wa but Yesu, me wek obed jo ko poore pi yei. ²⁵ Nataman do yei otieko bino, wan oli do iloc me ngapwony. ²⁶ Pien wun dedede idwe ka Rubanga pi yei Kristo Yesu. ²⁷ Pien bala kame jo katot i but wu otieko batiso ikom Yesu, otiekunu ngape. ²⁸ Likame bobo tie nga Yudaya amoto nga Gurik, likame bobo tie epasoit arabo ngat kogonyere, likame bobo tie i cuo arabo dako, Pien wun dedede itienu acel i Kristo Yesu. ²⁹ Bala kame wun ibedunu kede me ka Kristo, itienu do ikwae Aburaam kede jo kame bino udo gikame Rubanga ocikere pi mino gi di lubere kede cikere.