¹ Di do ingei Mwaka tomon kiwie ongwon, ango ako dok bobo Yerusalem karacel kede Baranaba, di ako tero Tito da oupere keda. ² Ango ako ot bala kame Rubanga onyutona kede, ako tuco ejiri but gi kame ango atuco ne jo kalikame obedo Iyudayan; do i imung but jo me ruom amalo, tetekeny kur abed bala ngat kame tie ringo arabo atieko ringo me atatai. ³ Akadi Tito da ngat kame oudo tie keda, bed bala en ebedo Ngagurik, likame oko dine udo akepo: ⁴ Do man otimere pi imiegu mogo me angalo, kame okelo imung pi kiino gonyere me kuo kame wan otie kede i Krisito Yesu, tetekeny kisobolo mino wan dok bobo bedo ipasoi. ⁵ Do wan likame oko gamo kope gi akadi pi esawa acel da, me wek ateni me ejiri medere ne wu. ⁶ Do pi jo kame oudo mito ruom amalo, (i epone kame gin itie kede, likame timo gimoro itu buta, Rubanga likame tie kede apokapoka but jo) pien jo nogo kame oudo mito ruom amalo, likame iko medona gimoro: ⁷ Do kamano da, kakame gin kineno kede be kop me tuco ejiri ne jo kalikame okepo omio icinga, bala kite kame omio kede Petero da tuco ejiri ne jo kame kokepo, ⁸ (Pien ngat kotimo kibut Peter emie bedo ngaor but jo kame kokepo, en nono kame bin kede twer otimo kibut ango da, di eora but jo kalikame obedo Iyudayan;) ⁹ Do kakame Yakobo, Kepa kede Yokana kame oudo tie bala ipirin oniang kede kisa kame oudo omia, gin kiko yei nango kede Baranaba, be poore ne wan ot but jo kalikame ngeo Rubanga; di gin kiko ot but jo kame kokepo. ¹⁰ Gin kiko kwano wa be, miero wan oyutuno jocan; gikame ango da cunya oudo tie pi timo. ¹¹ Do kakame Petero obino kede Antokia, ango oko dagi inyime kanono, pien en kame oudo poore ronkino en. ¹² Pien di pwodi cuo mogo obino kibut Yakobo, en oudo eribo cam kede jo kalikame obedo Iyudayan, do kakame gin kituno kede, en eko nyiko cen, dagi ribo kede gi cam, di elworo jo kame kokepo. ¹³ Iyudayan ace da oko donyo i ecuke mere nono, naka Baranaba da oko donyo itim me ecuke noni. ¹⁴ Do kakame ango aneno kede be gin likame oudo kitie timo gi me ateni kame upere kede ejiri; ango ako waco ne Petero inyim gin dedede be, “Ka in Eyudayat lem itimo jame bala jo kalikame tie Iyudayan, do weko bala Ngayudaya, benyobenyo kame in ikaruno dino kede jo kalikame Iyudayan pi bedo bala Iyudayan?” ¹⁵ Wan jo kame obedo Iyudayan i anywali wa, likame jo kalikame Iyudayan kame obedo jodubo. ¹⁶ Do wan ongeo be dano likame doko ngat kopoore pi timo gikame iswil mito, do pi yei ikom Yesu Krisito. Akadi wada oyeunu Yesu Krisito me wek wan odok jo kopoore pi yei Krisito, do likame pi timo gikame iswil mito; Pien timo gikame iswil mito likame bino mino dano doko ngat kopoore. ¹⁷ Do ka wan otie cane pi doko jo kopoore i Krisito, udo be wada ikom wa udo odoko jodubo, mam do Krisito obedo ngatic kame kelo jo idub? Likame tie kamano! ¹⁸ Kame ango agero bobo gikame ngoce ango ikoma areto piny, udo ango adoko ngatur iswil. ¹⁹ Pien ikom kop kame mako iswil, ango gira atieko to ikop me iswil, me wek abed ngat akuo i Rubanga. ²⁰ Ango kogura karacel kede Krisito, pi mano, ango akuo, do likame bobo ango en kame akuo do Krisito en kame kuo i ango. Doko kuo kame nan ango atie kede ikoma ni, akuo pi yei Wot ka Rubanga, ngat komara di eko jalo kuo mere pira. ²¹ Likame ango abino totolo kisa ka Rubanga: pien ka koto jo udo poore pi lubo iswil, udo do to ka Krisito obedo me atatai.