¹ Pi mano, ango ngat obedo mabus pi Rwot, angangao wu be miero ibedunu kede iponeso kame upere kede lwongo kame iudunu. ² Kede wor adwong kede mwolere, kede dire di ikanyakino kede jo icegun i amara. ³ Di iketunu cunyu pi gwoko ribere me Tipo mio inywak me mulem. ⁴ Kom tie acel, doko Tipo da tie acel, bala kame olwongo wu kede i gen me lwongo wu; ⁵ Rwot tie acel, yei tie acel, ibatis tie acel. ⁶ Rubanga tie acel, Papa me jo dedede, kame tie kede twer dedede, di etio ibut jo dedede doko di etie but jo dedede. ⁷ Do kobino mino ngat acelacel, kisa di lubere kede rom me giamia ka Krisito. ⁸ Pi mano, en ewaco be, “Kakame en eito kede akwidu, en eko telo Ekodet me mabus; eko mino giamia but jo. ⁹ Bala kame en eito kede malo, dwong mere nyo, do be en ber kong eko geno lor i adulio me piny? ¹⁰ En ngat olor piny kan, en nono obedo ngat kame oito kakabor kalamo malo, me wek jame dedede bed itwer mere ¹¹ En eko mino mogo obedo joor, mogo inabin, kede mogo jotuc ejiri, mogo jokwat kede moko jopwony. ¹² Pi iiko jokacil cobo tic kiber, pi gero kom ka Krisito. ¹³ Tuno kede kakame wan dedede odokunu kede jo kocato iyei kede ingec kame mako Won ka Rubanga, doko dano opong, kede iruom me ngeno Krisito. ¹⁴ Tetekeny kur wan doko obedunu bala idwe kame yamo me pwony wiro wi gi tetuni kede tetuca; pi kite me joangalo kede jo kame timo tic kede tam opwono, kame tie tic kede diru me angalo. ¹⁵ Do yamo kop me ateni kede amara, miero mede dongo i en i epone dedede, en ngat kame obedo wi wa, en Krisito. ¹⁶ Ngat kame adulion me kom dedede oribakin karacel ikom en, bobo gin irucakin karacel pi tic me amorito me adul acelacel, kame komino kom dongo di eko doko gikame gerere kene i amara. ¹⁷ Pi mano, man ango amoko kiber i Rwot be, geno nan wun miero doko kur ibedunu bala jo kalikame Iyudayan apat, i tam gi kame kony li. ¹⁸ Kame niang gi tie icolo, jo kalikame nywako kuo ka Rubanga pi kwic kame gin kitie kede, pi to wang me cuny kame tie ne gi. ¹⁹ Gin do kili kede gikame kelo lewic iwi gi, omio do gin kijalo kuo gi timo mit me lewic, doko kitimo gi dedede me emuna kede eranga. ²⁰ Do wun likame isiaunu gikame cal kamano ikom Kristo. ²¹ Ka amano, wun iwinyenu, doko en epwonyo wu, bala kame ateni tie kede but Yesu. ²² Me wek wun do ikwanyunu tenge ekite wu acon, en kuo wu acon kame oudo bin odubere pi angalo me mit mere. ²³ Do miunu tam wu me tipo lokere dok nyen. ²⁴ Di ikounu ngapo dano anyen kame ocweo ical ka Rubanga i kuo opoore kede kame tie cilo me ateni. ²⁵ Pi mano, miero ikwanyunu angalo tenge, di dano acelacel yamo ateni kede ngakio mere, pien wan otienu adulion me jo icegun. ²⁶ Ka ililo, do kur lilo teri idub, kur ceng donyi di pwodi imako lilo icunyi. ²⁷ Doko kur imi kare but jwogi. ²⁸ Ngat kame oudo timo tim me kuwo, wek do kuwo; do tikatika etim tic kede cinge, tice kame beco, me wek esobolo bedo kede gikame etwero mino but ngat kame tie kede can. ²⁹ Kur yamo karac di wokun kidongu, do kenekene kop kame ber pi gero, tetekeny eko kelo winyo but jo kame winye. ³⁰ Kur imiunu Tipo Kacil ka Rubanga tur cuny, pien en nono en kame obedo ngat oketo alama ikom wa, tuno kede iceng me alako. ³¹ Kur kec cuny dedede, kede lilo, kede gero, kede lok, kede yamo arac wok kidong wu, karacel kede dubo nying jo. ³² Do bedunu jo kame mwolere but jo icegun, jo kame cuny gi ber, kame sasiro jo icegun, bala kame Rubanga da osasiro wu kede.