¹ Pi kop noni, en omio ango Paulo abedo mabus ka Kristo Yesu pirun imo ² pien wun ateteni itiekunu winyo be Rubanga omio ango kisa mere pirun imo ³ Kede i epone ame enyuto na kede iyabere, en emia ngeno gi opwono bala i ekite ame owandiko kede sek ikop kanonok ⁴ En amio kame wun isomunu itwerunu niang ngec me omung a Kristo ⁵ Kame da bin ikare asek oudo likame omio jo ngeno, do natamam Tipo kacil oyabo ne jo oor kede inabin ngeno ⁶ En omio imo da odoko jo kame osikao winyo noni me kom Kristo pi nywako kede wa cikere a Kristo Yesu i Ejiri ⁷ Pimanono en omio ango adoko ngatic ka Rubanga di beo i kisa me twer mere me tic ⁸ Akadi bed bala ango en abedo ngat atididi kibut jo acil, do Rubanga oko mina kisa mere noni, pi tuco ne imo Ejiri me abar a Kristo ⁹ Pi mino jo dedede neno gi ame tie inyuak me omungini, ame geno cweno piny oudo okanere but Rubanga, ocweo jamini dedede i but Kristo ¹⁰ Di lubere kede twer kede teko mogo kame tie i kabedere kamalo atie iwi polo twero bino ngere ne kanisa i teko me rieko ka Rubanga ¹¹ Di lubere kede iik mere kame bedo nakanaka ame e iko pirwa kibut Rwot wa Yesu Kristo ¹² Kame do wan oudunu iye nwang cuny kede gen pi yei Yesu Kristo ¹³ Pimano ango akwao be kur ngatamoro ni loore pi peko opoto ne ango pirun ¹⁴ Kop noni en omio ango ariondiko but Papa me Rwot wa Yesu Kristo ¹⁵ En omio diakal me malo kede me piny ocaka ne nyinge ¹⁶ Kame da en emio abar mere kede deyo bute pi mino wun teko me Tipo kacil icunyu ¹⁷ Pi wek Kristo bed icunyu pi yei, di ikounu bedo jo ocwiny iye amara ¹⁸ Kame da wek ibedunu kede niang karacel kede jo acil dedede i laco, kede tuto kede i boro ¹⁹ Pi ngeno amara a Kristo amio ngec opong kede twer a Rubanga dedede ²⁰ Kibute en ngat kame etwero pi timo gi akalamo gi kame wan openyo di lubere kede twer mere kame tio i wan ²¹ Deyo bed bute i kanisa a Yesu Kristo ikare dedede