1
. Do wun jo kame en ekelo ikuo, jo koudo likame twero poko gikame ber pi turo iswil kede pi dub.
2
. kame oudo ibedunu lubo bala ekite me kuo wu, bala kame ekite me piny kan mito, imit me ngapug kame telo tipere kame tie iwi yamo, en tipo kame nataman tio idyere me jo kalikame woro Rubanga.
3
. Kame wada riki oudo ocalunu kamanono, imit me kom wa, di otimo gikame kop wa kede tam wa mito. Pimano, omiowan oudo obedo idwe me lilo ka Rubanga bala jo apat da.
4
. Do Rubanga ngat opong kede kisa, pi amara mere adwong, kame emaro wa kede,
5
. bed bala wan oudo oto pi timo dub, en eko kelo wa bedo ikuo karacel kede Krisito. (pi kisa mere wun iudunu alako)
6
. eko yayuno wa karacel, eko mino wa dedede bedo karacel ikkabedo kame tie imalo i Krisito Yesu;
7
. tetekeny ikare kame tie bino, En etwero nyuto ne wa abar kalikame wacere me kisa mere pi ber cunye but wa i Krisito.
8
. Pien kisa mere en komio wun iudunu alako kame oudo pi yei, kalikame wok pi tice wa, do ebedo giamia ka Rubanga,
9
. likame etimere pi tice wu, me wek ngatamoro kur wakere iye.
10
. Pien nataman wan obedo tic me cinge, kame en ecweo i Krisito Yesu; pi timo tice abeco kame Rubanga omoko be miero wan oti i igi.
11
. Pimano, yutununu be wun, jo kalikame ibedunu Iyudayan i epone me anywali, kame jo kame okepo lwongo be jo kalikame okepere, gikame otimo kede cing;
12
. Kame ikare nono da wun oudo likame iyei nu Krisito, likame ibedunu jo me ateker me I sirael da di ibedunu jo kame li kiye isikan kame cungo icikere, jo kameoudo bedo abongo gen, kede tie abongo Rubanga ipiny kan.
13
. Do nan i Krisito Yesu, wun jo kame oudo ngoce iborunu, di oko kelo wu bedo iyapiyapi pi remo ka Krisito.
14
. Pien En ikome ebedo mulem wa, ngat okelo jo are doko acel, pi jalere mere; eko mino apama kame oudo poko wa odoko li,
15
. En ekwanyo kwor ni ito mere, kame tie iswilia me aluba; tetekeny ito mere, en ecwei wad acel anyen idyere me jo are, en eko kelo mulem;
16
. Me wek en ekel nywak bobo idyere gi kede Rubanga, di beo ikome kakame en ejalere kede Imusalaba. Di eko jiko kwor kame oudo tie:
17
. En eko bino di eko tuco kope kabeco me mulem but wu, wun jo kame oudo itienu kakabor, kede jo kame oudo tie nu iyapiyapi.
18
. da di obeo kibute,
wanunu dedede nan i Tipo acel, otie kede winyo me donyo inyim Papa
19
. Pimano, wun doko likame itienu jokumbor kede jo kame okwia, do jo me ateker acel kede jokacil, kede jo me i ot ka Rubanga obe.
20
. Kame kogero i acakini kame obedo jo or kede inabin, di Krisito Yesu ikome en obedo kidi me esoda.
21
. Kame gedo lung cungo iye; di eko nyai doko tempulo ka Rwot kame kacil.
22
. Kame wu da i Krisito kotie gero wu karacel pi doko kakame Rubanga bedo iye, i Tipo mere.