¹ Do ngei man be, i kare me ajikini, oyaro bedo kare atek. ² Jo bino bedo jo amaro komgi kengi, jo amaro sente, jo ewaka, jo atingere, jo acae, jo ka li kede wor but jo nywal, jo ka li kede pwoc, jo alika acil. ³ Jo ka li kede amara, jo ka li kede isasir, jo cai kope abeco, ⁴ jo erupe, jo awigi tek, jo ajo epali, jo amaro tice me kom lono maro Rubanga. ⁵ Di i neno bala jo kame woro Rubanga, do di tice gi dage. Lokere unu tenge ibut jogi. ⁶ Epone me jo nogo en kame lwidar i ude me jo ocegun di gin iko mako mon awigi goro kame opong kede bal kame mit me kom owao tam gi tenge. ⁷ Apwonyere nakanaka, di likame gin kituno ingeno ateni. ⁸ Bala kitame Jannes kede Jambres otamo piem kede Musa, so jogi da dagi ateni, jo kame adam gi odubere, i malayan me yei. ⁹ Do likame gin i yaro mede ot inyime bobo. Tim gi areco bino nyutere but jo dedede bala kitame me ajoka da, onyutere kede. ¹⁰ Do in, i lubo kiber pwony na, me kuo na, dwong kop me kuo na, yei neno can pi kare alac, kanyakino. ¹¹ A una, acana kame otimere i koma, i Antiok, Liconium, I lystra. a una nogi bin ango ako kanyakino i gi. Bobon da Rwot oko konya. ¹² Bobo jo dedede, kame bino kuo - kuo me wor i Yesu Kristo bino neno can me a una. ¹³ Do jo areco kede jo esupe bino mede ameda dubere di ingalo jo doko da di ongalo gi da. ¹⁴ Do in miero i mede i gikame i tieko pwonyere kede kame tie iber, di ingeo ngat opwonyi iye. ¹⁵ Doko da geno di in pwodi atin, in ingeo i wandik kacil kame twero mino in bedo riek i alako di beo iyei ame tie ikom Kristo Yesu. ¹⁶ I wandik dedede kacil yai kibut Rubanga, di eber me pwony, moko, iiko, me pwonyo jo i lubo poore. ¹⁷ Me wek dano ka Rubanga twer timo kiber di eyikere kiber pi timo epone me tice abeco dedede.