¹ Kite kame oneno kede be likame otwero do kanyakino, wan oko tamo be eber ne wan dong Asene kenwa. ² Di oko cwano Temeseo, omin wa, di bobo etie nga saserodoti ka Rubanga, di etie ngatic wadwa me tito ejiri a Kristo, pi mini teko kede nyang cung kie epone me yei wu. ³ Be kur lworo mak ngatamoro pi itidil nogi, pien in kikomi kingeo be wan, koyero wa pi beo iye. ⁴ Pien iyateni, di wan oudo otie kedi, wan owaco ni di pwodi be wan opore neno can me itidil, akadi ka ebino cobere, di ida ingeo. ⁵ Pi kop noni, kakame ango likame atwero mede kanyakino kede, ako cwano pi ngeno yei ni, amotoko nat kie poone moro ngat kakelo atama otieko yami, di tic wa ko bedo me nono. ⁶ Do nataman ikare kame Temeseo oyai kede kibuti eko bino but wan kan, di eko kelo newa kop kanyen amako yei wu, kede konyo jo can, di bobo wun iyutunu nu wan iber twatwal, kede cuny me mito neno wa, bala kite kame wada omito neno wu kede. ⁷ Pimano, Imiegu kede Amiegu, wan otieko dino cunywa piru ki can dedede kede bedo arac, pi yei wu. ⁸ Do nan wan okuo, kame i cungo itek ikop ka Rwot. ⁹ Do pwoc nyo kame wan kotwero mino Rubanga bobo piru, pi kilel dedede kame wan otie kede inyim Rubanga wa. ¹⁰ Iwor kede Iceng olego kede cuny wa dedede be otwer neno nyimi, di koto oko neno nyo kinono korem ibutu kiyei. ¹¹ Nan Rubanga kikome di etie Papa wa, di Rwot wa Yesu Kristo, nyuto ne was epwone me bino butu. ¹² Okwao Rwot wa pi yei ne wu medere kede moko iye amara but ngat acel acel kede but jo dedede, bala kite kame wada otimo kede butu. ¹³ Paka tuno iya ajikini me wek cunyu bed abongo raco moro ki poore kinyim Rubanga, kede Papa wa, ikare me bino ka Rwot Yesu Kristo kede jo ko yei dedede.