¹ Jo na me amara, kur iyeunu tipere dedede, do ngicunu tipere nogo, pi niang ka gin kitie me ka Rubanga; pien inabin atot me angalo otieko sarakin ilobo. ² Man en epone kame ibinunu ngeno kede Tipo ka Rubanga, tipo acelacel kame tuco be, Yesu Krisito obino bala dano, udo en ebedo me ka Rubanga. ³ Do tipo dedede kalikame tuco be Yesu Kristo obino bala dano, udo en likame ewok kibut Rubanga: Man udo tie tipo me ngakwor ka Krisito, kame wun iwinyunu be oudo eyaro bino, doko nan en etieko bino etie ilobo kan. ⁴ Idwe atino, wun ibedunu me ka Rubanga, da itiekunu lono gin, pien ngat kame tie ikuo wu dwong kalamo ngat kame tie ilobo kan. ⁵ Gin ibedo jo me lobo kan, pi mano, gin iyamo kop me lobo kan, doko lobo da winyo gi. ⁶ Wan obedo me ka Rubanga, ngat kame ngeo Rubanga, winyo kop wa, do ngat kalikame obedo me ka Rubanga, likame winyo kop wa. Manoni en epone wan obino ngeno kede tipo me ateni kede tipo kame taparo. ⁷ Jo na kame amaro, marerenu ken wu ken wu, pien amara wok kibut Rubanga, doko ngat acelacel kame nyuto amara udo obedo atin ka Rubanga, doko udo engeo Rubanga. ⁸ Ngat kalikame tie kede amara, udo likame obedo atin ka Rubanga; pien Rubanga en amara. ⁹ Man en epone kame amara ka Rubanga onyutere kede but wa, pien Rubanga oko cwano Wode acel kenekene ilobo, me wek wan obed kuo i En. ¹⁰ Man en amara, likame be wan omarunu Rubanga, do be En emaro wa di eko cwano Wode pi bedo giayala kame kwanyo dub wa. ¹¹ Jo na me amara, ka Rubanga omaro wa kamano, wada poore marere kenwa kede kenwa. ¹² Likame tie dano otieko neno Rubanga kadi icel, do ka wan omarerenu kenwa kede kenwa, Rubanga udo bedo ikuo wa, doko amara mere udo opong kakare ibut wa. ¹³ Manoni en epone kame wan obino ngeeno kede be wan otie i en, pien udo en emio wa Tipo mere. ¹⁴ Doko wan otieko neno, da omio ijura iye be, Papa ocwao Woda bedo Ngalak me piny. ¹⁵ Ngat kame tuco be Yesu en Wot ka Rubanga, Rubanga udo bedo ikuo mere, doko eda ekuo i Rubanga. ¹⁶ Da wan otiekunu ngeno kede yei amara kame Rubanga tie kede but wa. Rubanga en amara; ngat kame kuo i amara, udo Rubanga tie ikuo mere doko Rubanga da kuo i en. ¹⁷ Ikan en kame amara wa nyutere kede di epong, tetekeny obed kede nwangcuny i ceng me ngolokop; pien bala kame kuo mere tie kede, wada kuo wa bedo amanono ilobo kan. ¹⁸ Amara likame tie kede lworo, do amara ka ocato eriamo lworo tenge, pien lworo upere kede tim me lito. Dano kame tie kede lworo udo amara mere likame ocato. ¹⁹ Wan omarenu, pien en ikome en kame egeo nyuto mara mere but wa. ²⁰ Ka dano owaco be, “Ango amaro Rubanga,” do do en likame emaro omimere kame en eneno, en etwero benyo benyo maro Rubanga ngat kalikame en eneno? ²¹ Da cik noni wan oudo kibute, Be ngat kame maro Rubanga, udo poore di emaro ominere da.