¹ Oja nadi umon kulu min swahaba to 12 owedi noumon gudra fi diamond kulu ne ponesha ayan. ² Orasul umon kede umon ruwa so daawa fi mamlaka te Rabana, me ponyesha ayan. ³ Okelem noumon kede umon ma gi sulu sokolina te sika, sala kan lasaya, sala kan rabata, sala kan akili, sala kan zaabu, matakum kun me kanzu tinen. ⁴ Me kila juwa ab ita bi dakal fogo kede itakum kum fogo, ya kede itakum gi tala min ogo. ⁵ Anas kulu ab ma bija amin kan itakum gi tala min medina wede tura te kura takum kede itakum nedif kede kun shahidi noumon. ⁶ In ya umon ja ruwa umon ja lifmedina kulu ligo umon giso daawah te Rabana fi medina kulu ligo umon gi awn ayanin fi kila bakan ⁷ In ya sultan Kerode ab te bakan uwo ama kila sokolina kulu; oligo wasi wasi zaidi kalam anas kelem gali Yokana gum min meitin; ⁸ Anas taanin kelem gali Eriya beenu me anas taanin gali nebiya te zaman wayi min umon gum. ⁹ Kerode dukur kelem Yokana ana ya gata rasu to! Lakin wede ya munu ab ana gi sma min uwo kalama ab giben jede? Dukur uwo aju ayinu uwo. ¹⁰ In ya mursalin wakti arja kala, umon aki nowo kila sokol ab umon s o osulu umon ogesim umon oruwa moumon fi siri fi medina ab gi nadi Besusayida. ¹¹ Lakin kawm wakti faham mon abidu ruwaa wara umon; okaribisha umon, wonus mon kalama te mamlaka te Rabana me anas kulu ab kan aju kede ponyesha umon ponyesha umon. ¹² In ligo semsi kan gi waga anas ikanshar mon ja nowo okelem nowo gali seebu kawm kee umon ruwa fi medina me fi karya ab geeri kede umon numu, kede umon gusu sokol akul kalam ina fi bakan ab pengele. ¹³ Okelem noumon gali itakum wedi noumon sokolina te akulu, mon kelem gali ina ma endisi sokol yoyote illa mkati kamsa me samaga tinen lakin kede ina kede ruwa bija noumon sokolina te akul kulu. ¹⁴ Kalam kan rujala de kan elfu kamsa okelem ne nas swahaba to kede itakum kutu umon filine fogo anas kamsin fi kila wayi fogo anas kamsa. ¹⁵ Mon so jede dukur kutu kede umon gen umon kulu bakan wayi. ¹⁶ Dukur okutu mkati kamsa me samaga tinen uwo arfa ena to fi samayi, dukur oshukur okasur, owedi ne swahaba to kede kutu gidam te kawm. ¹⁷ Mon akul umon saban kulu dukur mgitu ab kubu kubu ab gelba umon me hakiba12. ¹⁸ Wakti bakan tim ligo ogi womba obaraw swahaba to kan umon fi bakan wayi asadu umon kawm ginadi ana munu? ¹⁹ Mon arja fogo gali Yokana ab ja batiza lakin anas taani kelem Eriya, anas taanin kelem gali min nebiya te zaman wayi min umon gum. ²⁰ Okelem noumon lakin taasil ana itakum gi nadi ana sunu? Petero arja fogo okelem gali ita ya christo te Rabana. ²¹ Lakin okelem noumon gali kede umon ma kelem ne ajol taani kalam wede. ²² Ogi kelem gali gi fa ne nyereku te ajol kede azibu uwo zaidi, me aba nowo wazze me kubarina te din me bas kataba, me katul, fi yom te talata obija arja gum min mutu. ²³ Okelem noumon kulu gali ajol yoyote ab aju ja wara ana kede uwo so hasara ne nafsi to obara, kede uwo gi arfa msalaba to obara kede uwo ja wara ana. ²⁴ Kalam ajol yoyote ab aju hidaaya te maisha to obija woduru lakin ajol yoyote ab bija woduru maisha to fi ajali tayi obija ligo hidaaya. ²⁵ Kalam bija awum uwo sunu akul duniya kulu ligo uwo ya woduru uwo aw uwo tunda uwo? ²⁶ Kalam ajol yoyote ab bi ligo haya me kalama tayi, wede me nyereku te ajol obija ligo haya kala yom ab obija ja me heshima to meta sidi to me ta malaika ab nedifu. ²⁷ Lakin ana gi kelem neetakum hakki gali fi anas ab yegifu ini ab ma bija wonja fi mutu ladi wakti kan bitim umon kede ja ayinu mamlaka te Rabana. ²⁸ Wakti kan bitim baada te kalama wede ligo futu yom tamaniya osulu Petero me Yokana me Yakabo, opanda fi gala fi womba. ²⁹ Wakti uwo kan gi womba picha te lown to geeru, me lebisi to ja bija ligo gi wala wala. ³⁰ Yala, ayinu, anas tinen wonusu mowo mon kan Musa me Eliya. ³¹ Anas ab beeenu ligo umon gi beenu je umon endisi heshima, mon wonusu fi nutu to ab uwo gura rasul fogo fi Yerusalem ³² In ya Petero me anas ab kan uwo fi mowo mon kan num! Lakin wakti umon ayinu umon ayinu heshima to me anas tinen ab yegifu bakan ab, uwo fogo. ³³ Wakti bakan tim ligo umon gura fereteku min uwo, Petero dukur kelem ne Yesu gali sidi tayi, seme ina kun ini, kede ma adul juwa talata wayi taki, wayi te Musa, wayi te Eliya ligo uwo ma arufu sunu ya ogi wonus. ³⁴ In wakti olisa gi wonus, lata geeru dukur kafi umon wakti umon dakal fi lata naade mon kafu. ³⁵ Sauti tala min filel naade gali wede ya sidi tayi ab ana nigitu okelem gali kede itakum asma umon. ³⁶ Me sauti wede wakti ja Yesu beenu uwo baraw umon kaman askutu me askutu yom dolde umon ma kelem ne ajol yoyote kalama yoyote fi ab, umon ayinu. ³⁷ Wakti bakan tim fi yom te tinen ligo umon tala min gala kawm kebiri dukur ja ligo badum mowo. ³⁸ Yala, ayinu, ajol te kawm wonus me sauti okelem malim ana waga waga neeta kede ana ayinu fi nyereku tayi kalam ana weledu uwo baraw! ³⁹ Yala, ayinu, diamond amsuku uwo gwam mara wayi! Oferere uwo ladi otala bija fi kasma to otala min uwo me gudra ligo uwo kasurkasur gildu to kulu. ⁴⁰ Ana kaman waga waga ne swahaba to kede turuju uwo mon ma agder. ⁴¹ Yesu arja fogo ligo ogi kelem itakum anas te zaman ab ma gi rudu ab ja woduru, ana bija rasul wen gen meetakum me so subra neetakum? Jubu in nyereku taki. ⁴² Wakti uwo kan lisa gija diamond jada uwo owuku wuku uwo zaidi lakin Yesu amrugu sauti ne diamond opnyesha Yowele warja uwo ne baba to. ⁴³ Mon kulu hairu fi kebir te Rabana, lakin umon wakti gi hairu sokolina kulu ab umon so okelem ne swahaba to. ⁴⁴ Kalama dolde kutu kum fi adan takum! Kalam nyereku ta anas gura wedi uw fi ida ta anas. ⁴⁵ Lakin umon maja faham kalama dolde, ladi kan dusu min umon kede umon ma faham mon kafu asadu uwo kalama dolde sika fogo. ⁴⁶ In ya kun juru laabil bayina toumon ajol ab bija kun kebir min umon namna ab uwo bija kun. ⁴⁷ Lakin Yesu wakti uwo ayinu rudu ma fi gelba toumon osulu nyereku ab sakar okutu uwo geeri mowo. ⁴⁸ Okelem gali ajol yoyte ab bija juru nyereku ab sakar fi asma tayi obi kun ojuru ana wu ajol yoyote obija juru ana jambu uwo obija kun ojuru sidi kalagu ana; Kalam ab gi sinda kun sakar deya kebir. ⁴⁹ Yokana warja fogo sidi teena ina ayinu ajol gi turufu diamond fi asma taki, ina ab uwo, oma gi futu meena. ⁵⁰ Lakin Yesu kelem gali mata kum ab uwo kalam ajol al ma adui takum, ofi fo juu taakum. ⁵¹ Wakti bakan tim kede sulu uwo fi samayi bakan kala geeri, osidu marawayi ena to kede uwo ruwa fi Yerusalem, ⁵² Orasul mursalin gidam to; umon ruwa umon dakal fi (mbuga) te nas samaliya, kede ruwa adul. ⁵³ Nouwo mon ma juru uwo geeri kalam ena to kan gi weeri ruwa fi Yerusalem. ⁵⁴ Nas swahaba to Yokobo me Yokana wakti umon ayinu mon kelem sidi teena, ita aju kede in amrisha nari kede tala min samayi kede umon keregi je Eliya ja so? ⁵⁵ Wa gilib uwo dukur uwo gata noumon case owonus gali ata itakumma arufu roho ab itakum endisi kalam nyereku te binadum omaja fi keregi hayi te anas, lakin wedi nowo hidaaya. ⁵⁶ Mon ruwa fi medina taani. ⁵⁷ Wakti umon kan fi sika umon gi ruwa, ajol dukur kelem gali ana bija ja wareta kila bakan ab ita biruwa fogo. ⁵⁸ Yesu dukur kelem nowo giri endisi, lufura me teeran te loobu endisi arufu lakin nyereku te ajol uwo endisi ma sika te kutu fogo rasu. ⁵⁹ Okelem ne ajol taani taali warana lakin uwo kelem gali sidi tayi seebu anas gidam kede ana ruwa dofun baba tayi. ⁶⁰ Lakin okelem nowo gali seebu meitin kede dofun meitin toumon lakin ita ruwa so kidima te mamlaka te Rabana ⁶¹ Me ajol taani kelem ana bija ja wara ita sidi tayi abur seebu ana kede ana ruwa so kwaheri ne anas te juw tayi. ⁶² Lakin Yesu kelem nowo gali mafi ajol ab agder amsuku chuma abgi kuruju ab gi faa mamlaka te Rabana.