¹ Wakti kala uwo wonusu kalama dolde kulu fi anas, dukur Kaperenoun. ² Fi Kapereoun kan fi ragi te government labi to ab kan uwo aju zaidi kan uwo ayan ligo uwo kan guruwa mutu. ³ Sidi te ajol ab ayan de wakti uwo asma kalama te Yesu orasul aju siya te nas Yudaya kede ja nowo ligo uwo gi asadu kede uwo ja wonya laabi to. ⁴ Wakti umon ja ne Yesu, dukur umon womba nowo zaidi mon kelem gali ogi faa so nouwo kalama dolde. ⁵ Kalam uwo hibu bele teena; me kwam te hafla uwo ya ja abinu neena. ⁶ In ya Yesu ruwa moumon wakti uwo kan ma boyi me juwa ragi wede dukur rasul ajol ne sabiyan o ligo ogi kelem bwana kubwa,mata taban ita fi ja kalam ana magi faa neeta dakal tete juwa tayi. ⁷ Ya sababu ab kutu kede ana geledu janeeta lakin wonusu kalam besi kalam me nyereku tayi bija pona. ⁸ Kalam ana kaman ajol ab lisa tete hukum, ligo ana endisi askeriya ab ana gi sulu kan ana kelem ne wayi gali ruwa ogi ruwa me taani kan ana kelem nowo kede uwo ja uwo gi ja, me labi tayi so jede ogiso. ⁹ Wakti uwo asma wedede dukur uwo hairu dukur uwo agilibu uwo ne kawm ab kan uwo gi sulu okelem noumon gali ana ma lisa ayinu iman ab kebiri je wedede sala kan lligo ajol te Isael. ¹⁰ In ya wakti anas ab kan rasulu wakti umon arja min juwa mon ligo labi ligo uwo pona kalas. ¹¹ Wakti bakan futu fogo siya dukur oruwa fi medina ab kan gi nadi nine(tisa) swahaba to me kwam ab kebiri dukur mon ruwa sawa. ¹² Wakti orasul fi babu ab gi dakal fi medina ayinu je neiti gi tala bara, te nyereku ab mama to, weledu uwo wayi ligo mama de ma endisi ragi, me anas milan ab te medina de ligo umon fi moumon. ¹³ Ya wakti sidi teena ayinu uwo wayinu huruma to okelem nouwo mata kore. ¹⁴ Ojuru uwo geri orasul fi janaza anas ab kan arfa meiti umon yegifu okelem yowele ana gi kelem neeta gum. ¹⁵ Ya meiti de gum ogen wabidu wonusu dukur owedi uwo ne mama to. ¹⁶ Kwaafu amsuku anas kulu mon dukur aabidu heshima Rabana ligo umon gi kelem gali nebbi ab kebiri uwo agifu fustu teena gali Rabana ja dooru ne anas to. ¹⁷ Me kalama dolde setetu fi Yudaaya kulu me beelana kulu ab fi geeri mowo. ¹⁸ In ya swahaba te Yokana abidu kelem nowo kalama dolde kulu. ¹⁹ Yokana dukur nadi swahaba to tinen orasul ne sidi teena ligo ogi kelem nowo ya ita bara ya ja wala taani fi ab gi ja? ²⁰ Ya wakti anas dolde rasulu fi bakan ab uwo fi fogo mon kelem Yokana ab te batiza orasul ina neeta ligo ogi kelem gali ita ya mursal de wala kede ina isteena fi taani ab gi ja. ²¹ Fi wakti wede oponyesha anas milan ayan me abidu taabu badum me diamond me amyanin milan kulu opnyesha umon. ²² Yesu arja fogo ligo ogi kelem gali ruwa kum ne Yokana kidima ab itakum ayinu. Me ab itakum asma amyanin kala gi ayin ab kereng gi masi, anas te bigenge gi adul anas teresa mon gi asma, me itin gi gum me miskinin gi kelem noumon kalama te Yesu. ²³ Wendisi baraka ajol kulu ab kan ma bi alisi ana. ²⁴ In ya wakti mursalin te Yokana wakti ruwa kalas dukur wa abidu wonus me kwam ab te Yokana gali sunnu ya itakum ruwa fi bakan ab pengele? Ma uwa ab gi yizu me loobu? ²⁵ Lakin sunu ya itakum ruwa fi ayinu? Ajol ab lebisi gumasi ab gi wala wala? Ayinu ab gi lebisi te nebifu, anas ab gi akul akil ab kuwesi mon gi kun fi jedidi te sultan. ²⁶ Lakin sunu ya kan itakum ruwa fi ayinu? Nebbi? Ya jede, ana gi kelem ne itakum uwo gi shinda nebbi. ²⁷ Uwo ya ja katifu nowo gali ayinu ana gi rasul mursal tayi gidam ita ab bija adul sika ab ita gi ruwa fogo. ²⁸ Ana gi kelem ne itakum gali anas ab gi weledu manuswan, mafi ajol ab gi shinda Yokana me heshima, lakin ajol ab ma te heshima fi mamlaka ta Rabana ya kubarin shinda uwo. ²⁹ Anas kulu wakti asma me anas ab gi lim sente mon aminu ja taasil Rabana kun ligo uwo ya te heshima anas ab batiza wakti gi batiza Yokana. ³⁰ Lakin nas Falisaayo me nas swahaba te shariya mon abba wafaka te Rabana kalam ata ma batiza uwo. ³¹ Yala anas te wakti wede ana bi dugu neitakum picha toumon me sunu. Umon kan bi beenu kefin? ³² Mon gi beenu ja yala ab gi geenu fi suu, ligo umon fi futu badum, anas ab gi kelem gali ina afuku ne itakum burugi lakin itakum aba alab, ina dugu kilele lakin itakum aba koore. ³³ Kalam Yokana ab batiza oja ja ligo uo magi akul akil ligo uwo magi asurubu merisa; dukur itakum kelem gali uwo endisi jini. ³⁴ Nyereku te binadum wakti oja okan gi akul ogi asurubu takum kelem nowo gali ayinu kum ajol te taama, ab sakaran, sabi te anas ab gi lim sente anas ab endisi batal! ³⁵ Taasil agili ja wedi ne anas ab adil ne yala to kulu. ³⁶ Ini ya ajol te Falisaayo nadi uwo kee umon akul mowo odakal fi bey te Falisaayo dukur ogen fi akili. ³⁷ Yala ayinu mariya ab kan fi medina wede ab kan endisi batal wakti uwo ja faham ja gali ogen fi akili fi bey te Falisaayo ojibu chupa te dikin te mugaru. ³⁸ Oyegifu gidam te kura too ligo ogi koore wa abidu kubu moyo ena fi kura to dukur kunusu me suu rasu to, okalasu kura to dukur oadaku me kura to. ³⁹ Ini ya ajol te Falisaayo ab nadi wakti uwo ayinu ownusu min juwa gelba to gaali ajol wede kan kan uwo kun nebbi okan bi faham mariya ab gi amsuku fugu uwo je uwo fi namna ab uwo gi beenu, ligo uwo endisi batal. ⁴⁰ Yesu arja fogo okelem nowo gali Simon, ana endisi sokol ab ana aju kele neita, okelem malim wonusu. ⁴¹ Fi ajol ab kan sulu banja okan endisi anas tinen ab uwo gi banja; wayi ligo gi banja uwo dimaari 500 me taani 50. ⁴² Wakti umon kun ligo umon ma endisi sokol te hippa uwo asama umon kulu tinen. Yala min anas dolde ajol ab bija sinda aju uwo ya yatu. ⁴³ Simon dukur arja fogo okelem ana gi fekeri je ajol wede ya uwo sinda fi msama ab milan. Okelem nowo gali ita gata seme. ⁴⁴ Uwo agilibu uwo ne mariya de, okelem ne Simon gali ita ayinu mariya wede ana dakal fi juwa taki ita ma wedi naana moyo te kura tayi lakin wede ab moyo ena to nenzili fi kura tayi okunusu me suu rasu to. ⁴⁵ Ita ma alasu ana lakin wede ab lisa min ana dakal olisa ma seebu alasu kura tayi. ⁴⁶ Ita ma adaku dikin fi rasu tayi lakin wede adaku dikin fi kura tayi. ⁴⁷ Ya ana gi kelem neita ajol ab sama nowo zambi to milan kalam aju to milan lakin ajol ab gi sama siya aju to siya. ⁴⁸ Okelem nowo sama ita makosa taki. ⁴⁹ In anas ab kan gen moumon fi akili mon abidu gi wonusu moumon umon fi umon wede ya munu ab gi sama makosa? ⁵⁰ Okelem ne mariya gal aminu taki wedi neita Hidaaya ruwa me amani.