¹ Tchapiteko otchitenha ttchimu, tchi ombunga nkhu yaongalea Yesu itelele ondaka ya Huku, ya É nkhu wakulamea kotchiklo tche zhiva olio Genesare. ² É amunu oyombaluku mbali kotchikolo tche zhiva, ya avaloi nkhu kavepu ya nkhu vaifhamu omawandawo. ³ Ya pae É alondo kombaluku imu, endji nkhu eli oya Simau, ya emukumbu atahe ombaluku melunga. Yesu akankhama ya mombalu afhimbike okulongefha ombunga. ⁴ Tchamana okulongefha, Yesu mu Simau atia taha ombaluku pueinha pa tuala ya yumbeni omawanda eni. ⁵ Ya Simau atia: Molongefha otue tuatalavaya otchuiki atchihe ya katuna tchi tuakuata, ya tchi mutumu, matuyumbu omawanda. ⁶ Tchivamana okuninga tcho, avakuata omphonde ongi, hinde omawanda afhimbike okutanduka. ⁷ Ya pae avafhimbike okuifhana omapanga awo omba nkhu vekombaluku okhuawo veye okuvevatela. owo avayulifha oyombaluku mbali okuponukifhapo. ⁸ Simau Petulu tche etchimuna tcho akeke koyongolo koyomphazhi zha Yesu, atia: Ka kokula nami, mokonda ndjimuninga wanavi, Tate Kulu. ⁹ Pae é naombenha nkhu venae avaombo vambuvamala natcheinha nkhu tchaningua. ¹⁰ Hinde na Tiaku ya na Ndjuau onde ya ya Zembendeu, omba nkhu velikuata oupanga na Simau. Pae Yesu mu Simau atia: Huhulilua pae okuifhilila pahe ove mukaila omuloi wovanthu. ¹¹ Tchivaeta oyombaluku melunga atchihe avetchieka avatezha Yesu. ¹² Tchapiteko tchi nkhe É nkhu kochitate, nkhu kuno omuzhiu umu nkhu enomuvela omuvi. tchi amuna Yesu, akekekoyongolo okupaka otchipala meheke, ya emukumbu okutia: Tate kulu okutia tchi otchokoholo Yoe ntchakulange. ¹³ Ya Yesu ayala omavoko Ae ya emuvizha atia: Tcho oholo yange. Kanuwa! ya mondjangayatcho akanawa. ¹⁴ É emuhele kutia nge hakuna engu ku mukapopia pae atia: Tezha ondjila yoe, kelivilikifhe kovatuita, ya kayambe kehalioe, okuendekea kutcheinha Moichechi atumina opo ukevela oumbangi. ¹⁵ Pae tcheinha nkhu aninga atchifhimbike okuiva vali unene ya ombunga yovanthu nkhu veya okutelela Yesu tchi malongefha vahakulue komauvela awo. ¹⁶ Ya apehe É nkhu ulipengenika kotchikolo kunkhu hakunavanthu ya otcho melikuambele. ¹⁷ Otchitenha tchimu, Yesu nkhu malongefha, ya nkhu kuno ovafalicheu novalongefhi wotchitumino vakankhama ponthe Yae. Owo valua kovilongo vielikalela ovio Kochundeya ya novio Kongalileya ya novio Kocholuchale. Ya omphepo ya Tate Kulu Inae ahakule. ¹⁸ Pae ovazhiu vamu aveya valongela kohama omuzhiu umu engu nkhu hemetchizhili okuenda. Owo nkhu mavayeve omahitilo vemupake kotchipala tcha Yesu. ¹⁹ Pae mokonda yotchimbiula, owo ahamavetchizhili. Pae avolondo pomututu okuteya omateya, avapundifha omuzhiu nohama yae, pokati kovanthu, kotchipala tcha Yesu. ²⁰ Okuvetala ekolelo liavo, Yesu atia: Muzhiu waevelua koyopekalo zhoe. ²¹ Ovakilipa navafalicheu avafhimbike okulipula okutia: Omuzhiu patchi engu mapopi pakutoya? oHuku pé nge maevele oyopekalo. ²² Ya Yesu, tche atea tcheinha owo nkhumavatutu, ayakula okutia: Palatchi mamulipulatcho moyombungo zheni? ²³ tchitchapuva vali okupopia okutia: Oyopekalo zhoe zhaevelua kulama enda? ²⁴ Pae pala mutchive okutia Onde Yomuzhiu uno oyonkhono kohi aevele oyopekalo, ami mitia: Kulama, kuata ovialo vioe ya enda kondjuwo yoe. ²⁵ Mondjanga yatcho é okulama kotchipala tchavo, okuata ovialo embi nkhu alalekuapo ya aende kondjuwo yae okuyimbila Huku. ²⁶ Avehe avombo vahakuka, otch mavayimbile Huku ya tchiveyula ovoma avatia: Nho tuamuna tchi hayamuna. ²⁷ Tchalapo, Yesu po alupo amunu umu omatanthi velichimu matiwa Livi atonkhamea pua atanthela elichimu. Pae Yesu atia: Nthezhenge. ²⁸ Levi avihe eviyekapo, okulama ya emutezha. ²⁹ Pae Levi aningele Yesu otchipito otchinene kondjuwo yae. Ovatanthi wolichimu ovengi ya novanthu nkhu vakankhama komecha, mavali nawo. ³⁰ Ya Ovafalicheu Noyokilipa nkhumavekechala kovalongua va Yesu okutia: Ongapi onue mamuli ya nokunua novatanthi velichimu ya navaningi vanavi? ³¹ Yesu eveyakula okutia: Ombenhenha vakanawa kavechukue noyomendiku, omba vechukua ombenha mavavele. ³² Ami hizhile okukana ombenha vafuapo, mbakana ombenha venoyopekalo velivele. ³³ Nkhe avatia: Ovalongua va Ndjuau apehe vaninga chechu ya nokulikuambela, novalongua wovafalicheu nawo mavetchiningi. Pae ovalongua woe vanua ya valia. ³⁴ Yesu atia: Ove vatuta okutia nge munamina ovakongua kotchipito tcho lukupo owo hamavali omukupi enawo? ³⁵ Ya pae makukeya ovitenha embi mavakaifua omukupi, ya koviteha embeo owo mavakaninga ochechu. ³⁶ Pae Yesu evehele omuheti umu: Kutupu umu engu nge matete otchinhambi otchipe otokeke kotchinhambi otchikulu. Pae tcho ngotchiningi otchinhambi otchipe matchitekua nemphana, ya elimendo epe kalikefha notchinhambi otchikulu. ³⁷ Kutupu umu engu nge mapaka owalende omupe motchima otchikulu. tcho ngetchiningi, owalende omupe maupite momamphana auwuyuka, ya ovima embeo mavitalakala. ³⁸ Pae owalende omupe unolio kupakua movima ovipe. ³⁹ Kutupu umu engu nge matia alu pokunua owalende omukulu, nkhe ahanda vali okunua owalende omupe, mokonda matia: owalende omupe owo eli omuwa!