¹ Movitenha embinha, omutumi Cesar Augusto, atumu omokanda umu ombu nkhumautia ngakuhonikue avanthu vatcho avehe, omba nkhu vaka mouye mu nkha vakala. ² Tcho tchaningua pokutenga tchi Quirino nkhu eli omutumini woko Siria. ³ Pae, avehe avaende kovilongo viavo ku nkhu vayomumukilua vekelihonikifhe. ⁴ Jose nae alu kochitate Tchonachale, Kongalileya aende Kombele, Kochundeya, ku kuiwe okutia otchilongo tcha Ndjiaviti, mokonda é nkhu owokomuhoko wohamba Ndjiaviti. ⁵ Jose aende nomutuinhua wae Maliya vekelihonikifhe. É nkhu omuwoyonthu. ⁶ Pae tchatile tchivefhika Kombele, atchile otchitenha tcha Maliya okuyomuka Omphepe. ⁷ Pae é ayomuka Ondeyae otchiveli tchae, ya é emuólonge mechapa. Tchalapo emupaka momutemba mokonda nkhu kavenalukalo. ⁸ Kotchilongo tchatchokó nkhu kuno ovatuita vamo mavavingi oyondjui zhawo koutuiki. ⁹ Oandju imu oya Tate Kulu aimunika kuwo ya oumbala wa Tate Kulu nkhu maumeemeekikile pokati kawo ya avehe avaómbo mavateketa. ¹⁰ Pae oandju aivetia: Hamutila ovoma, mokonda mbemuetea ehambo enene kovanthu vatcho avehe. ¹¹ Pahe, kochitate yaNdjiaviti, kuemuyokila Omuyovoli. É Ókilistu, Tate Kulu! ¹² Mamukemuzhimbuka mokonda yotchilikifha: É makaólongua momachapa ya makalalefhuapo momutemba. ¹³ Mandjanga yatcho, akuminika oyoandju oyongi, mazhilu nokeulu, ya azhifuene koandju onkhuavo otcho mazhiyimbile Huku okutia: ¹⁴ Ombala okuHuku keulu ya ngakukae ombembua kohi kovanthu omba Huku evehandea otchiwa. ¹⁵ Pae oyoandju tchi zhatchuna keulu, ovatuita poluavo nkhu mavatia: Tuendeni ondjanga Kombele tukatale otchipukatcho tchapitako matchihakukifha ya Tate Kulu wetuyekela tumuíve. ¹⁶ Vapita valumbana ya kó avavafhako Jose na Maliya moluwondo ya avamunu Onphepe yalalekua momutemba. ¹⁷ Pae tcho tchivetchimuna, owo avahele ovanthu tcheinha nkhu vatea otcho Nphepe. ¹⁸ Avehe omba nkhu velivafha novatuita avaka vahakuka natcheinha vatea. ¹⁹ Ya Maliya nkhu uholeka atchihe tcheinha atea ya nkhu wevipaka mombungu yae. ²⁰ Ovatuita nkhe avafhimbike okumuhilivika ya nokuyimbila Huku, mokonda atchihe tcheinha vatea ya natcheinha vamuna nkhu otchongatchi lumu oandju nkhu yehela. ²¹ Motchitenha tchepandutatu, nkhu otchizhi tcho Nphepe okuhita moviyumbo. Owo avemuluku ena lia Yesu, mokonda otcho nkhu tchapopiwa noandju tchi É nkhu heyayomukua. ²² Tchi omala ovitenha viokutumbikua awo apita tchi tchanhemba kotchitumino tcha Moichechi, Jose na Maliya atuala ondele kotchingelecha Kocheluchule, vekemuvilikifhe ku Tate Kulu. ²³ Pae tcho nkhu tchahonikua kovitumino via Tate Kulu: Oyondele avehe omba mavayomukua oviveli veno olio kuvikifhua ku Tate Kulu." ²⁴ Mokonda tchanhemba kovitumino via Tate Kulu, nawo nkhunge vena oliokuyamba okuiti uvali ya noupomba uvali" ngo tchilikutilo. ²⁵ Ya Kocheluchale kuali omuzhiu umu nkhu atiwa Simiao. É nkhu fhuapo nonkhenda. É nkhu uka makevelele okuhiliya oichilaeli ya Omphepo ya Huku ,nkhu imué. ²⁶ Omphepo ya Huku yemuhela okutia nge kukatchua hoyamuna Kilistu tchi tchapangua na Huku. ²⁷ Pokuhongolua noMphepo, Simiao ahiti motchingelecha. Jose na Maliya avaeta Omphepe, Yesu, okutia vafuifhepo ovituwo embhi viatuka kovitumino. ²⁸ Simiao atambula Yesu, ya ayimbile Huku okutia: ²⁹ Tate kulu pahe ndjekelange oluvezhi, omutalavai woe djiende mombem bua, mokonda omphango Yoe yafuifhuapo. ³⁰ Pae omiho ange amuna eyovo Lioe, ³¹ tcheinha Ove wapaka kotchipala tchovanthu vatcho avehe; ³² Otchitemii tchilikifha ovipunde, koumbala wovanthu woe koichilaei. ³³ Owohe yoyonphepe nkhu vahakuka novipuka embhi nkhu mavahelua kotchivei tchivei Tchae. ³⁴ Simiao evepa onkhano ya mu Maliya ina atia: Ya Omphepe endji yayomukua okumua ovivi ya nokukakulamifha ovengi owokoichalaeli nokuila omuzhingi. ³⁵ ngatchi ochipata imu ikaponuka omunhu woe, ku okututa koyombungo zhovengi nge makuvilikifhua. ³⁶ Omufhimbi umu matiwa Ana nae nkhu okakala. É nkhu onde ya Fanuele, owo Aser. É nkhu omukulukazhi ya waka nomuzhiu wae omanima omapandu avali nkhe v afhimbikile, ³⁷ ya tchalapó aile omuhepe akalumu ngatcho té aninga omanima omakuinhi omapandu atatu nomanima akuana. É ahamayekako kotchingelecha, ya nkhu atuatuako nokuyimbila Huku nochechu nokulikuambela otchituiki notchitenha. ³⁸ Poyatcholumu é afhimbikelumu okupandula Huku, ya apopi kotchivei tcho Ndele okuvehela avehe ombenha nkhu vaka mavakelele eyovo lioko Cheluchale. ³⁹ Pae tchi vamana okuninga avihe embhi nkhu vinhemba kovitumino via Tate Kulu, owo avatchikuluka otá Kongalileya, kochitate yavo muni Onachale. ⁴⁰ Ya Ondele ekulalumu nawa, aele omuzhiu akola ya eyula ounongo, ya otchali tcha Huku nkhu Tchinue ⁴¹ Owohe nkhu vaenda omanimatcho ahe Kocheluchale Kotchipito tcho Pachikua. ⁴² Yesu tchaninga omanima ekuinhi navali, mokonda nkhu eli otchituwo avaende kotchipito. ⁴³ Pae ovitenha vio tchipito tchiviapua avatchuna, yapae ahamavetchiva okutia onde Yesu wayekua Kocheluchale, ⁴⁴ mokonda owo nkhu mavatutu okutia Venae mombunga endji nkhu venayo. Otchitenha tchatcho tcho tchitchapita, avafhimbike Okumuvola mumbunga nomomapanga. ⁴⁵ Pae owo tchihavemuvafhele avatchuna nokocheluchale ya avafhimbike okukemuovoleakoi. ⁴⁶ Ttchi papita omala atatu avekemuhanga mokati kotchingelecha, atonkhama pokati kovanongo, okutelela lumu nawa ya Nae otcho mapula. ⁴⁷ Avehe omba nkhu mavetelele avaka vahakuka nounongo Wae ya nokutavela Kuae. ⁴⁸ Owo tchi vamu Yesu avahakuka. Ya ina atia: Mukue wetuningeatchi ngatcho? Naho nami nkhu tuehulilua Nokukuyeva. ⁴⁹ Yesu evetavele okutia mamundjowoletchi? Onue kamutchi okutia nge mika kondjuwo ya Tate? ⁵⁰ Ya owo ahamavaifhapo tchi Yesu nkhu ahanda okupopia noyondaka iñphó. ⁵¹ Pae Yesu akaenda nowohe Kocheluchale ya otcho matelele muwo ya ina nkhu uholeka oviouka viatcho embio avihe Yae. ⁵² Ya Yesu atuatuako nokukulia mounongo, nawa ya notchali ku Huku ya nokovanthu.