¹ Vangu vange, havanthu ovengi nge vaila ovalongefhi. tutchi okutia matukatambula okukoyefhua kukuakola vali. ² Mokonda otue atuhe tuvapengefhi apehe. engu hapengefha komalaka, omuzhiu umu engu afuapo otchatchili kokuvinga olutuluae lumu aluhe. ³ Ngatupaka ovitoma kovinhu vioyonkhambe zhite motue tupondola kozhiviukifha olutuluatcho aluhe. ⁴ Taemii pé oyombaluku, owoli eli oyonene ya mazhitahua nomphepo onene, nouluvale ouphiki okuhungama ku omutahi ahanda. ⁵ Nongotchikuawo elaka otchivei tchimu otcholutu, taemii tupu efhitu enene hinde nalio liyokua nonthepanthepa. ⁶ Elaka nalio omulilo, ouye woundingavivi kovivei violutu luetu, okuchika olutu aluhe ya viyoka omunhu. Emuniliatcho elaka liayakefhua novifelunu. ⁷ Ya ovinhama vitcho avihe, oviokokuti, otchizhila, otchifhitu, noviomomande viliwa, ya viliwa novanthu. ⁸ Ya kutupu omuzhiu nge mayungu elaka olio evi nge kaliviungua, lieyula owembo wokuleka. ⁹ Elaka olio tuyimbila nalio Tate Kulu yetu Tate, olio tufhinga nalio ovazhiu ombenha veli otchifhefha tcha Huku. ¹⁰ Otchinhu tchatcho otcho tukumba na tcho elaó ya nkhe otcho tufhinga natcho. Vango vange, ovipuka embio nge havikakakó. ¹¹ Ondjivindjivi nge mailili omnde onga apepa naónga alula? ¹² Vangu vange, komuhipua nako nge makupi ondjetona? komuti wouva nge makupi omahipua? pae pondjivindji yomande okulula nge kapalili omande onga apepa. ¹³ Pokati keni oupi engu eli omunongo nge matewa? omunthu watcho engo ngailikifhe otchituwo otchiwa kovininga viae kokulitchumaa kohi tchi matchilu kounongo. ¹⁴ Moyombungo zheni nge hamuningi emuna evi, hamululuka, hamukelipakako hamukakemba okuheteka notchatchili. ¹⁵ Ombo haunongo walua nokeulu; ombo walua nokohi ya otcho vilulu ya hatcho koMphepo. ¹⁶ Mokonda pua paka emuna evi, noluluka paka ondjaya novipuka vielikalaela ovivi. ¹⁷ Ya ounongo wokulua nokeulu, owo pé eli omuwa poupe, nkhe nombembua, nouwa, noupanga, weyula onkhende, novipuka oviwa, kaupangula ya kaulinigifha. ¹⁸ Ya ombenha vaka nombembua, ya vaninga embinha Huku atia viaviuka tcho tchihungama kovanthu okuka mombembua.