¹ Vango vange ovahandua, ningeni ekolelo olha Tate Kulu yetu Yesu Clistu, Tate Kulu yokoumbala, oholo yokuvatela vali vamu kovakuawo. ² Tutenipo okutia umu okuhita meliyongezho lhemii awala ngohona, ya tchalapo okuhiti omuzhiu omuhepi enovikutu viachila. ³ Pae nguyakula omunthu omuhona ya otia: Mbamba kankhama kolukalo ondu oluwa, ya komuhepi otia: Kankhama koyonphazhi zhange, ⁴ pó kamulikoyefha onue muni? Kamulipake kokuyefha nokututa kueni okuvi? ⁵ Temee, vangu venge ovahandua: Huku kahopee ovahepi womouye vaile omalombe mekolelo ya noupinga woumbala endji ayekea onkhano kombendenha Vemuhanda? ⁶ Pae, kamuhumbu ovahepi! Havahepi vaka mavemutchinkhaizhizha? ⁷ Ya havo vemukokea kokukoyefha? Hamuhepi aka mapopi navi ena ewa mumuelizhikila? ⁸ Pae ngamuhumbu ovitumino oviatchatchili kovihonikua embhi vitia: Kahole omukueni ngatchi oliholewo ove muni; ningeni otchiwa. ⁹ Pae ovanthu vamu ngamukaevepakako nga Huku pó mamuningi opekalo, muyonkhuatua mokonda muapengefha otchitumino tcha Huku. ¹⁰ Mokonda engu ahumba ovitumino viatcho avihe, akatnthulapo pe tchimu, pó wateya ovitumino viatcho avihe. ¹¹ Mokonda inguinha lumu atia: Nge honingi ovakai ovengi; ya nkhe atia nge holeke, ngaelepua honingi ovakai ovengi ya otcho muleke pó uila omupengefhi wotchitumino. ¹² Pae popieni ya ningeni ngaómbenha mavakakoyefha kotchitumino tcheyovo. ¹³ Ya pokukoyefha pakaninga okhenda kombenha nkhu havena nkhenda novakuavo. Onkhenda yapitakovali kokukoyefha. ¹⁴ Pae tchavalelatchi vangu vange, okutia ndjine ekolelo hatchina ovininga? Kutia ekolelo liatcho nge malikuyovola? ¹⁵ Ngotchitute, okutia omuangu umu ngaíle omuzhiu pamu omukai ahanda ovikutu hena otchokulia. ¹⁶ Ponue umu ngemuhele okutia enda nombembua, kateminuemii ya kaliemii nawa, houpewo tchi nkhu tchachukifha otcho kolutu, otchiwapatchi tchi tchipo? ¹⁷ Ya nekolelo otacho liakangotcho, ngahaliningi ovininga pó liatchua ¹⁸ Pae umu ngemakatia: Ove uno ekolelo ya ami ndjinovininga ndjilikifhange ekolelo lioe halinavininga, ya ami mikekuvilikifha ekolelo liange kovinga viange. ¹⁹ Ove watavela okutia kuna pé Huku umu waninga nawa! ya hinde novilulu vitavela kutcho ya vihumba. ²⁰ Ove wahandalumu okutchiva muzhiu engu owokuchakana, okutia ekolelo pua halinavininga liavalela? ²¹ Ambalayau Tete yetu wafuifhifhepo novinga tchaandja ondeyae tchikae ngotchilikutilo kotchifha? ²² Wetchimuine okutia ekolelo liatalavayea pamu novinga viae ya alihapuluka. ²³ Atchilikifha tcheinha ovihonikua vitia: Ambalayau watavela ku Huku putcho apakuako kouhunga; ya Ambalayau aifhanua okutia epanga lia Huku. ²⁴ Wetchimuine okutia kovininga wapakue pouhunga, ya nkhu hakekolelopé. ²⁵ Netaa enguinha Raabe watavelua pouhunga wovininga tchi atambula ovapopi vondaka evetezhefha vali odjila onkhuawo? ²⁶ Mokonda olutu haluna Mphepo luatchua ekolelo pua halinavinga nalio liatcho.