¹ Tiyaku omundapi wa Huaku nowa Tate Kulu Yesu Clistu, komihoko ekuinhi navavali ombo ukokula Noichilaele mualamu. ² Vango vange, tchipakemii kehambo enene okukuata mokulolua okungi. ³ Tchiveni okutia okulolua kekolelo lheni tchieta okutakamifha. ⁴ Yekemii, okutakamiifha kuyule ovininga, opo muómiike ku Clistu apehe opo hakuningi tchi matchimukambefha. ⁵ Pae polueni umu ngahanda ounongo, ngakumbe ku Huku, mokonda É uwandja nonkhenda iñgua memukumbu; ya É mekemupa. ⁶ Pae inguinha akumba nekolelo, ahamaningi omphata, mokonda iñgua apatana waka ngomatchimba elunga, maéndekua nomphepo okutahua tchikolo natchikolo. ⁷ Omunthu engo nge hatutu okutia makatambula otchipuka tchimu ku Tate Kulu; ⁸ omunthu ngaingo unoukeke, nge kaombe pé mondjila imu. ⁹ Omuangu engo eli omuhepi unolho kulemua okulipakako kuae, ¹⁰ pae umuzhiu omuhepi unolho kulemua kokulipundifha kuae, mokonda é makatchua ngoyonthemu zhovilimo mepia. ¹¹ Mokonda etango litumba nomutemo ngekala ya ounhango aukukuta. Onthemu itota, auwawatcho autchui. Nongotchikuawo, elombe mokuenda kualho malikapuva. ¹² Omupopiwa nawa omuzhiu enguinha atakamifha kokulolua, mokonda ngalua pokulolua, é makatambula ekolowa lho munhu, endi lhayekelua onkhano kombenha vahanda Huku. ¹³ Nge hakuningi engu matia tcha alolua atia mbalolua na Huku, mokonda Huku kalolua notchivi, ya É nge kena engu nge malolo. ¹⁴ Pae kanda munthu ulolua noholo yae muni, endji imukelenga ya aimukoko. ¹⁵ Pae oholo ngeyatambula, kumunika opekalo. Ya opekalo yatambula oholo ilizhea ya okuya okutchua. ¹⁶ Vango vange ovahandua, nge hamukelengua. ¹⁷ Atchihe tcheinha eli otchiwa tchilua keulu. Okulua ku Tate wa womaluxu. Huku kaviluka nge tango, ngomuzhi, ngoyonhufhi enphi zhitia azhimunika pe ahamazhimunika. ¹⁸ Huku wapangula okutupa kondaka yatchatchili, tukae ngowopouoe ounhango kuimbinha avihe É atunga. ¹⁹ Vango vange ovahandua, tchiveni tcho: Ovazhiu avehe venolhokufhuapo kokutea, venolho kuombelela kokupopia, ya venolho kuombelala kokuyumana. ²⁰ Mokonda oluyuma lomuzhiu kamuka ouhunga wa Huku. ²¹ Pae, liyowolemii kovituwo viatcho avihe ovio pekalo novio vivi. Tambuleni kokulipundifha kondaka yapakuako endji yafhua kokuyowola ominhu vieni. ²² Ilemii ovatavai wondaka, homuile pé ovateleli, okulikenga polueni. ²³ Mokonda, engo eli pé omuteleli wondaka ya ahamaile omundapi, uka ngaiñgua elitalea otchipala tchae muni motchilivandjelo. ²⁴ É uliteleamu lumu muni otchipala tchae ya akapita, ya pae ngaluapó avalako. ²⁵ Pae inguinha alola kokufhuapo kotchitumino tcheyovo, otcho matuatuako nokutchininga ahamaile pé omuteleli owokuzhimbako, omuzhiu engo makakuatuapo nawa kuimbinha maningi. ²⁶ Engu elipakea kokuila owovingelecha, ya ahamavingi elaka lhae, ukelenga ombungo yae, ya otchingelecha tchae katchivalele. ²⁷ Otchingelecha tchi tchaviuka kotchipala tcha Huku yetu Tate otchi: okupopila ovafhona ya novakai omba veyakuapo novazhiu moyohali zhawo, okuhayeka otchivi tchomouye kuvewifha mopekalo.