¹ Nani ileni ovahetekeli vaHuku, ngoyonde Vae omba vaholue. ² Ya indeeni motchihando, ngatchei Yesu Kilistu etuhole É muni elieta kotue ngatchiyambo tchei tchina efhi ewa kuHuku. ³ Hamuhapopia onkhando pokati keni nouhayo memuna evi kovanthu vaHuku. ⁴ Okupopia oyondaka oyombi ozho mbuandja netchoko tchei helitcho ya nani yimbieni Huku. ⁵ Mokonda onue mutchi okutia kutupu onthumbu pamu omuningi wanavi owotchipululu novimbanda nge makapingana oumbala wa Huku keulu. ⁶ Hakembua noyondaka zhokuzhanina, tchihinda oluyuma lua Huku koyondjangalali. ⁷ Nani hamuhelipa nawo otchite ⁸ Mokonda onue nkhu muvetuike, ya pae muwotchiteni muHuku ya nani endeni ngoyondele wotchiteni, ⁹ ya ouwa wotchiteni utuka kombungo ombua nehunga natchatchili, ¹⁰ okuyeva atchihe tchei tchei tchilemuifha Huku. ¹¹ Hamutchuka okuka movituwo vietuiki embinha hamavieta ounhango ya nani vipataneni, ¹² ya nani ovipuka embhi vaninga pokamphenge vieta onthalalo hinde avimunua novengi. ¹³ Ovipuka avihe pua vikotchiteni vimunika nawa. ¹⁴ tchei tchimunikifha ngatcho otchiteni otcho tchipopiwa okutia walapo tchafhuka, pinduka, pokati kovivimi ya Yesu Kilistu mayekie move. ¹⁵ Ya pokuenda kueni, endeni nawa hamuhaendaenda ngaomba hamuna oyondunge, nani handeni ngaomba munoyondnge, ¹⁶ hatakataka mokonda ovitenha viaka navi. ¹⁷ Hamulipaka koumba, ya nani nongonukeni ondaka ya Huku. ¹⁸ Ya hamupialuka owalende, ombu utungulula, ya nani kaeni noMphepo ombua oyaHuku, ¹⁹ okupopia kueni ngakuile omutontholo, nokuimba kuoyoandju ozhoMphepo yaHuku, okuyimba nokuhiva Yesu Kilistu noyombungo zheni azhihe. ²⁰ Okupandula apehe ku Huku Tate ovipuka viatcho avihe mena liomunene Wetu Yesu Kilistu; ²¹ Lihumbeni pokati keni muHuku. ²² Vikumba humbeni ovazhiu veni muHuku. ²³ Mokonda omuzhiu omutue wotchikumba ngatchei Yesu Kilistu Eli omutue wovanthu vaHuku É eli omuyovoli wolutu. ²⁴ Nani, ngatchei ovanthu vaHuku vahumba Yesu Kilistu ya nani novikumba ngavihumbe ovazhiu vavo kovipuka viatcho avihe. ²⁵ Vazhiu holeni ovakai veni ngatchei Yesu Kilistu ahole ovanthu vaHuku ya Evetchuile. ²⁶ Tcho wetchiningea okutia opo ovanthu omba vayela okuyavama momande ondaka ya Huku, ²⁷ opó tchiviukia Mue muni ovanthu owawa ovaHuku ahamaninga otchitozho nomaoya novikuawo vali nani otchei otchei cayela opo hovelua. ²⁸ Otcho ngotchikuawo ovazhiu veno oliokuhole ovakai vavo ngatchei vahole omalutu avo engu ahole omukai wae nae ulihole. ²⁹ Otchatchili kutupu engu olowola oluatu luaemuni ya nami ulitekula nokulivinga ngatchei Yesu Kilistu avinga ovanthu vaHuku. ³⁰ Mokonda otue tutchivei tchokolutuluae. ³¹ Pae, otcho tchapopiwa okutia: omuzhiu makayekahé naina ya avakatokama nomukai wae pouvali wawo availe olutu lumupe. ³² Tcho atchiheovindjumba viaHuku, ya ami mipopi oviaYesu Kilistu novanthu vaHuku. ³³ Natcho polueni kanda munthu ngahole omukai wae ngatchei elihole émuni, ya omukai ngahumbe omuzhiu wae.