¹ Ami pae ngounkhuatua wa Tate Kulu, mikumbu konue okutia kaemee muaviuka kutcheiha muaifhaninua. ² Kaemee mouwa omunene nombili, okulitea polueni novakueni kotchihando. ³ Ningemee otchiwa tchemee muwanaine Mpomphepo nomombembua. ⁴ Kuka olutulumu noMphepo imu, ngatchi onue muaifhanua konkhevela okuómeekako kokuifhanua naHuku. ⁵ Kuka Tate umu, nekolelo limu, nokuyavama kumu. ⁶ Huku umu Tate yovanthu vatcho avehe É ukovipuka vitcho avihe. ⁷ Huku tchezhile pokutupa óluzhi tchatile ingu apewa okuendekea moluzhi luaKilistu. ⁸ Ngatchi tchapopia ovihonikua : Tchie alonda keulu atchindi oupika aandje ovanthu óluzhi. ⁹ É okulonda tchapopia tchi ahaile É okupunda kohiyahi? ¹⁰ Omunthu engu apunda eeli engu alonda keulu lieulu liatcho alihe, atukifhe ovipuka viatcho avihe. ¹¹ Kilistu wevepa vemu vaile ovapostolu, vemu oyopolofeta, vemu ovatuali wondaka ya vemu vaile ovatuita ya vemu vaile ovalongefhi. ¹² É wevepa óluzhi undo evepe oyonkhono ozhokutalavaya oviningina Viae wavamaakana kolutu luaKilistu. ¹³ É utuatuako nokuvamaakana olutuluae té atuhe matukawanaenea mekolelo ya nokoungo wonde yaHuku te matupi ngaombenha vaka motchituwo tcha Kislitu, ¹⁴ opó hatukae vali ngoyondele omba vayumbua kefhina ya nokomutue nomatchimba okutchindua Nomphepo yatcho aihe oyokulongefha, nekelengo liovanthu komatutu owokupukuluka. ¹⁵ Pae putcho, okupopia otchatchili kotchihando, otue matukulé moyondjila zhatcho azhihe embhi zhaviuka mué engu eli omutue, Kilistu. ¹⁶ Kilistu uwanakana kolutu luatcho aluhe oluolupamu; ovivei luatcho lutavaya pamu, tcho tchikulifha olutu okuliwanakana kotchihando. ¹⁷ Pae ami mbatea ami mipopi, okutuatuako muTate Kulu: Okutia hamukavali ngatchi tchikaa ovipunde, okututa ovipuka embhi havilifhele momutue. ¹⁸ Owo vatuta pé ovizhiloi mokonda ovo kavei Huku, owo nge kavaka ngatcheinha Huku ahanda mokonda zhoyombungo zhawo okukola. ¹⁹ Owo kavena ohomii vahanda pe okuninga oviokoholoyavo owo vakape mavaningi ovipuka ovivi. ²⁰ Pae tcheiha mualongoka kotchivei tcha Kilistu hatchongatcho. ²¹ Mumutiatiakaya mahepulua ya mualongefhua Mue otchatchili endji imuYesu. ²² Onue mualongoka okuyeka ovituwovivi, ovilulu, okulikukulula ouzhiu oukulu. Ouzhiu ombo, muHuku owo eli owokutungulula mokonda yoyoholo ozhokukelenga. ²³ Onue mualongefhua oupingululua Monphepo yoyondunge zheni, ²⁴ okuliwaleka opamunthu omupe engu eli otchifhefha tcha Huku, ouhunga wouwa. ²⁵ Ya yekeni okukemba popieni otchatchili novakueni, muelipalakana nawo, mokonda otue tuelizhika pe kutchimu novakuetu. ²⁶ Yumaneni ya hamuningi oyopekalo, hamuka noluyuma te etango malihiti. ²⁷ Eliapu nge hamulieke omahitilo. ²⁸ Enguinha nkhu avaka ngayekeko, ya unolio kutalavaya, una oliokuninga nomavokoae ovipuka emea viachiliviya avatele ombenha venovichuka. ²⁹ Movinhu vieni, nge hamulu oyondaka oyombi, popienipe omalaka omawa onga achiviya kovakueni ombenha mavate tcheinha vachuka natcho. ³⁰ Yahamutoyo Omphepo ombua oyaHuku ku mamukevele otchitenha tchokuyovolua. ³¹ Munoliokuyeka aundjangalali, oluyuma okukalangandja nomatuka novipuka viatcho avihe ovivi; ³² ileni ovawa novakueni ngatchi Huku emuevela kuKilistu.