¹ Mokonda yatcho ami Paulu, ndjinkhuatua ya Yesu Kilistu konue ovipunde. ² Ndjitchi okutia ovininga embhi mbapewa muevitea oyokueta otchali tcha Huku konue. ³ Ndjihonika tchenha Huku andjlikifha. tcho oluambo luatchatchili ondu ami mbahonikile okaphike komukanda omukuavo. ⁴ Tcho ngomuetchiva, po mamuketchizhila okuifhapo tcheiha mbapunga koluambo ónua oluatchatchili olua Kilistu. ⁵ Kovanhtu vopoupe, Huku kevevilikifhe ovipuka embeo, ya pahe Omphepo yavilikifha kovalongua nokovatuminua. ⁶ Oluambo ondo oluatchatchili okonovipunde eli oyonphinga, ya okovizhilika. ovo ovakongua konkhano muKilistu mokonda yondaka. ⁷ Pae mbaila omupika wondaka endjo eli óluzhi lotchali tcha Huku, tchi tchapewa ami kovininga vioyonkhono Zhae. ⁸ Huku wampha óluzhi ondo, owoli ami ndjili omuphiki kovafhuifhipo vatcho avehe ndjipopie kovipunde ondaka endji yakola okuyiva oyoulombe waKilistu kovipunde. ⁹ Óluzhi lua Huku kuami otchokumiimiikila avele kovininga Viae embhi nkhu eli oluambo komanima omakulu nkhu luatchaelua naHuku omutungi wovipuka avihe. ¹⁰ Pae kongelecha Ozhomphepo ozhonene ozholukalo lokeulu zhiye okuiva ounongo. ¹¹ Tcho tchapitieko kokututa Kue ku hakupu tchi Éé ailikifha muKilistu Tate Kelu yetu. ¹² Ku otue tuatakamifhila ya tuaómiikako mokonda yekolelo lietu. ¹³ Ya pae ami mimukumbu okutia hamupoyola koyohali zhange konue mokonda oumbala weni. ¹⁴ Mokonda yatcho, ami ndjikalea koyongolo kuTate. ¹⁵ Kue kanda muhoko nowo keulu nowo kohi utambula ena. ¹⁶ Ndjilikuambeleako okutia É emupe koulombe woumbala Wae, kutia mukae muatakamifha Komphepo Yae endji imonue. ¹⁷ Ami ndjilikuambela okutia Kilistu akae moyombungo zheni kekolelo, ya opo mukae muazhika kotchihando tchae. ¹⁸ Ndjilikuambeleako opó muifhepo pamu navalechali vatcho avehe tchi eli okuhandjuka aulala napua tchitue otchihando tcha Kilistu. ¹⁹ Ndjilikuambela okutia muive otchihando tcha Kilistu, okuvanakana kounongo mutukifhe ouye waHuku. ²⁰ Huku É pe nge maningi ovipuka viatcho avihe embhi nge hamavipu okupunukifha puimbinha tukumba nakuimbi tututa koyonkhono Zhae embhi zhitalavaya motue, ²¹ Huku ngahumbue movingelecha muYesu Kilistu, nokomihoko viatcho avihe okutuatuako lumu. Amém