¹ Zaman Yesua shafu nas al kutar, huwo masha fok jebel. Zaman huwo gaad tehet, talamis bitou ja le huwo. ² Huwo fata kasma bitou wa derisu umon, kelimu, ³ ''baraka le del al masakin fi roho, molokut ta samah tabi le umon. ⁴ Baraka le del al bikun hazin, be azi umon. ⁵ Baraka le del al kerimin, umon bi yahrus al ard. ⁶ Baraka le del al bikun jaanin wa atsanin le hagiga, Allah bi keli umon yekun saabanin. ⁷ Baraka le del al indum rahma, umon bi ligo rahma. ⁸ Baraka le del al gulubum tahir, umon bi sufu Allah. ⁹ Baraka le del al bi asna salam, bi nadi umon iyal Allah. ¹⁰ Baraka le del al bi ta-abu umon ashan hagiga, molokut ta samah tabi le umon. ¹¹ Baraka le del al nas bi sitimu wa bi ta-bu, wa bi kelimu kulu hajat al sherir al ma hagiga didu ashan ana. ¹² keli takun farhan, makafa kebir lek fi samah. Fa fi nefsu teriga nas ta-bu anbiya al ashu gubalkun. ¹³ Intum mele bita al alam. Lakin kan mile biga ma indu ta-am, kef bi yerja ashan yekun mile tani? huwo ma kwes tani le ai haja ile bes bi jadau bara wa nas bi douru fi rasu. ¹⁴ Intum nur le dunia. Medina al abinu fi ras jebel ma bi dusu. ¹⁵ Nas mabi wala lamba wa kutu tehet gufa, lakin fi ras terbeza, wa bi wala le nas kulu fi dakil bet. ¹⁶ Keli nur taki wala gidam nas ashan bi sufu amail taki al kwes wa sabihu Abu taki al fi samah. ¹⁷ Matakun fekir be inu ana ja ashan kasuru ganun wele kalam ta anbiya. Ana ma ja ashan bi kasuru umon, lakin ashan bi kamilu. ¹⁸ Hagiga ana bi kelim le intum be inu lahadi samah wa al ard bi futu, mafi kilma wele unuwan be ai teriga bi futu bara min ganun, lahadi hajat kulu bi hasil. ¹⁹ Ashan kida kulu zol al bi kasuru wahid min wasayat wa deris nas ashan bi amul nefsu kalam ma bikun mohim kalis fi molokut ta samah. Lakin le kulu zol al bi hafisu kalam del wa derisu le umon bi kun nas kubar fi molokut ta samah. ²⁰ Lakin ana bi kelim le inta be-inu ile kan sokol hagiga bitak bi futu hagaig ta mulamin wa farishiin. inta be ai teriga ma bi dakalu fi molokut ta samah. ²¹ Intum kan asma be inu gulu le umon fi zaman gedim , 'mata katulu,' wa,' kulu zol al bi katulu bikun fi katar zaman gadiya.' ²² Lakin ana bi kelimu le intum be-inu kulu wahid al bi bikun zalan ma aku bitou bikun fi katar zaman gadiya.' wa ai zol al bi kelim le aku bitou, ' inta ma nafi!' bikun fi katar gidam mejles,' wa ai zol kelim, inta belid' bi kun fi katar be nar ta Johanam. ²³ Kan inta bi wodi hadaya bitak fi al mambar wa inta zekiru be-inu aku bitak indu muskila maak, ²⁴ sibu hadaya bitak fi al mambar, wa ams sika taki. Awelan amulu musalaha ma aku bitak, wa taal gedimu hadaya bitak. ²⁵ Tafik be zol al tahamu inta be sura ze ma intum mashin le mahkama, wele zol al tahamu inta be selimu inta le gadi, wa gadi bi selimu inta le dabit, wa bi kutu inta fi sijin. ²⁶ Hagiga Ana bi kelim le inta, inta ma bi tala min hinak lahadi inta bi dafa akir gurus al inta kan shilu. ²⁷ Inta asma kan gulu, 'mata amulu zina.' ²⁸ Lakin ana kelim le inta be-inu ai zol al bi suf le mara be uyun ta zina warau huwo kalas irtakab zina ma hiya fi gelbu. ²⁹ Kan ena bitak ta yemin sibu inta waga, talau bara wa jadau beit min inta. huwo bikun kwes le inta kan wahid min ajza ta jisim bitak mat bidal jisim bitak kulu bi jadau fi johanam. ³⁰ kan ida bitak ta yemin sibu inta waga, gatau bara wa jadau beit min inta. Huwo bikun kwes le inta kan wahid min ajza ta gisim bitak mat bidal jisim bitak kulu jadau fi johanam. ³¹ Kan gulu, 'Ai zol al turudu mara bitou, keli huwo wodi le hiya waraga talag. ³² Lakin ana bi gul le inta be-inu ai zol al talagu mara bitou, ile be sabab ta amalia jinisia, bi keli hiya ashan yekun ta sarmata. Ai zol al zouju hiya baad kan talagu irtakab zina. ³³ Tani mara, intum asma be-inu gulu le nas ta zaman, 'mata alifu be galad, lakin shilu alifa bitak le Rabana.' ³⁴ Lakin ana bi gul le inta, mata alifu kulu kulu, be samah, le-anu huwo kursi ta Allah; ³⁵ wele be ardi, le-anu huwo mahal ta kutu kura bitou; wele be Urselim, le-anu huwo medina ta Melik al Azim. ³⁶ Wele inta bi alifu be ras bitak, le-anu inta ma bi agder amulu shar wahid abiad wele ashuet. ³⁷ Lakin keli kalam bitak yekun 'Nam, nam,' wele 'La, la.' ai haja aktar min de huwo min sherir. ³⁸ Intum asma kan gulu, 'ein fi ein, wa shin fi shin.' ³⁹ Lakin ana bi gul le inta, mata shakil ma zol al sherir, Lakin ai zol al dugu inta be kof, aglibu le huwo tija tani de kaman ⁴⁰ Kan ai zol deir yemsi ma inta le mahkama wa shalu bedela bitak, keli zol dak kaman shilu aborowol bitak. ⁴¹ Kan zol kelim le inta amsi wahid mail, amsi ma itnin mail. ⁴² Wodi le zol al asalu inta, mata aba le zol al deir deynu haja min inta. ⁴³ Intum asma kan gulu, 'lazim keli inta hibu jiran bitak wa akra adu bitak.' ⁴⁴ Lakin ana bi gul le intum hibu adu bitakum wa seli le del al bi taabu intum, ⁴⁵ ashan intum bikun awulad ta Abu bitakum al fi samah. Huwo bi sibu shamis bitou ashan wala le zol sherir wa zol al kwes, wa bi rasulu matar le del al adilin wa al ma adilin. ⁴⁶ Kan intum bi hibu del al bi hibakun, ajur yatu al inta bi ligo? Nas ta daraib ma bi amul nefsu hajat?. ⁴⁷ Iza inta bi selim akwana bitak bes, Inta bi amulu sunu aktar min nas tanin? nas al ma Yahudiin ma bi amulu nefsu kalam? ⁴⁸ Ashan kida inta lazim keli yekun tahir, ze ma Abu bitakum fi samah Tahir