¹ Bad kida Roho shalu Yesua le sahara(Beriya) ashan bi jeribu be shetan. ² Zaman huwo kan saim arbein yom nahar wa leil, huwo biga jiyan. ³ Sitan ja wa kelim le huwo, ''Kan inta sei Jena ta Allah, amiru hujar del ashan bikun rakif.'' ⁴ Lakin Yesua juwabu wa kelimu le huwo, ''huwo moktub, 'insan ma bi ish ashan rakif bes lakin be kulu kelima al bi ja min kasma ta Allah.'' ⁵ Bad dak shetan shilu huwo le Medina Almukudas wa kutu huwo fi akir mahal ta ras Kenisa, ⁶ wa kelim le huwo, '' Kan inta sei Jena ta Allah, Jadau nefsak tehet, fa huwo moktub, ' Huwo bi amiru malaikat bitou bi shilu musulia taki,' wa, 'Umon bi alagu inta be idan tomon. ashan inta ma bi dugu kura bitak fi hajer.'' ⁷ Yesua kelim le huwo, Tanimara huwo moktub,' Mata jeribu Rabana Allah bitak.'' ⁸ Tanimara, Shetan shilu huwo le jebel aali wa wori le huwo kulu mamalika ta Alam ma kulu hajat al fogo. ⁹ Huwo kelimu le huwo ''Anna bi wodi le inta kulu hajat del, kan inta dengir tehet wa abidu ana.'' ¹⁰ Bad dak Yesua kelimu le Huwo, ''Amsi bara min hina Shetan! Fa huwo moktub, '' Inta bi abidu Rabana Allah bitak, wa inta bi kadimu huwo bes.'' ¹¹ Bad dak shetan sibu huwo, wa malaikat ja khadimu huwo. ¹² Zaman Yesua asma gal gobudu Yohana, huwo tala le Jelil. ¹³ Huwo sibu Nazareta wa masha yeish(geni) fi Capernaum, al gerib ma bahar ta Jelil, fi hudud ta Zebulum wa Naphatli. ¹⁴ De hasal ashan bi kamilu kalam al nebi Isaiah kelimu, ¹⁵ ''Ardi ta Zebulum wa Ardi ta Naphtali, gerib le bahar, aksa Ordon, Jelil ta Nas al geir Yahudiyin! ¹⁶ Nas al kan gaidin fi duluma umon shafu nur al azim, wa del al kan gaidin fi iklim wa dul ta mutu, fog umon nur gam.'' ¹⁷ Min zaman dak Yesua bada beshiru wa kelimu, ''Tuub, ashan molokut ta sama biga ja Gerib.'' ¹⁸ Ze ma huwo masi gerib ma bahar Galileya, huwo safu itnin akwan, Samaan al bi nado butrus, wa Andraus aku bitou, bi jada sabaka fi bahar, umon kan sayadin ta gobudu samak. ¹⁹ Yesua kelim le umon, ''Talu, warai, wa ana bi kutu intakum ashan bi gobudu nas.'' ²⁰ Tawali umon sibu sabaka wa masha warau. ²¹ Ze ma Yesua masi min hinak huwo safu itnin akwan al tanin, Yahub ibin Zebede, wa Yohana aku. umon kan fi murkap ma abu bitomon bi salau shabakat. Huwo nadi umon, ²² wa umon sibu murkab wa abu bitomon wa tabau huwo. ²³ Yesua masha fi kulu makan ta Galiya, bi derisu fi biyut ta salawat, bi beshiru an injil ta molokut, wa bi aliju amrat wa ayanat bein al nas. ²⁴ Kabar an huwo kan masha fi kulu Syria, wa nas jabu le huwo del al kan ayanin ma ayanat mukhtelif wa waja gisim, nas al kan moskunin be arwa sherir. wa al indum marad sarrah wa shalal. Yesua aliju umon kulu. ²⁵ Adad kebir min nas tabau huwo min Galiya, Decapolis, Urselim, wa Judeya, wa bara min Ordon.