¹ Keli intum kun harisin ashan bi wori amail bitakun al kwes gidam nas ashan umon bi shuf, wele intum ma bi ligo makafa min abu bitakum al fi samah. ² iza inta bi wodi haja le meskin, mata afuku buruju gidamak ze ma nas al bi mesilu fi biyut ta salawat wa fi shawari. ashan umon bi ligo tesji min nas. Hagiga ana bi kelim le intum, umon kalas istelim makafa bitomon. ³ Lakin iza inta bi wodi haja le meskin, keli yedak ta samal ma aruf yedak al yemin bi amulu sunu. ⁴ Ashan hadaya bitak bi wodi be siri. Wa Abu bitak al bi suf be siri bi wodi le inta makafa. ⁵ Kan inta bi seli, mata kun ze nas al mumesilin, Umon bi hibu ashan bi wogif wa seli fi biyut ta salah wa fi rukun ta shawari, ashan nas bi sufu umon. Hagiga Ana bi kelim le intum, umon kalas istelim makafa bitomon. ⁶ Lakin inta, kan inta bi seli, dakalu fi mahal kas. gofulu bab, wa seli le Abu bitak al fi mahal siri. Wa Abu bitak al bi suf inta fi siri bi wodi le inta makafa. ⁷ Kan inta bi seli, mata keriru kalamat al manafi ze ma nas geir yahudiyin bi amulu, Umon bi fekir be-inu bi asmau umon ashan kalamat bitomon al ketir. ⁸ Ashan kida, mata kun ze umon, Abu bitak arufu hajat yatu inta deiru gubal inta ma asalu. ⁹ Seli zede: Abu bitana al fi samah, keli isim taki kadisu. ¹⁰ keli molokut bitaki ja. keli meshia taki yekun fi ard ze ma fi samah. ¹¹ Wodi le nina alela akil al yomi. ¹² Akfir katiya ta nina, ze ma nina kaman bi akfir nas al amulu le nina batal. ¹³ Mata dakalu nina fi tajarib, lakin naja nina min sherir. ¹⁴ Kan inta bi akfir nas min batal bitomon, Abu bitak al samawi kaman bi akfir inta. ¹⁵ Lakin kan inta ma bi akfir batal bitomon, Wele Abu bitak bi akfir batal bitak. ¹⁶ Kan inta bi sum, keli inta ma zahiru wusa taki al hazin ze ma nas mumesilin bi amulu, fa umon ma bi kasulu wusa wele touru shar bitomon ashan umon bi yeshar le nas be-inu umon saimin. Hagiga an bi kelim le inta, umon istelim makafa bitomon. ¹⁷ Lakin inta, kan inta saim, masa zed fi ras bitak wa kasulu wusa bitak, ¹⁸ Ashan ma bi zahir le nas tanin be-inu inta saim, Lakin bes le Abu bitak al huwo fi mahal siri; wa Abu bitak al bi suf fi siri, be wodi le inta makafa. ¹⁹ Mata kazinu le nesfak mali fi ardi ali sus wa hajat al bi segeru bi demiru, wa haramiya bi khus juwa wa bi seregu. ²⁰ Lakin, Kazinu le inta mali fi samah, al wele sus wele hajat bi segeru bi demiru, wa Haramiya ma bi khus juwa wa bi seregu. ²¹ Fa fi mahal al mali bitak fogo, hinak fikra bitak bikun fogo kaman. ²² Ena huwo yau lamba le jisim. ashan kida, kan ena bitak kwes, Jisim kulu bikun malyan be nur. ²³ Lakin kan ena bitak batal, Jisim bitak kulu bikun malyan be duluma. ashan kida, kan nur al fi dakil inta hagiga duluma, duluma de bikun kebir, kef kebir shedid yekun al duluma! ²⁴ Mafi zol wahid bi kadimu itin seid, Au huwo bi karahu wahid wa bi hibu al tani, wele huwo bi wodi nefsu le wahid wa bi hagiru al tani. Inta mabi khadimu Allah wa mali. ²⁵ Ashan kida Ana bi gul le inta, Mata fekir an haya bitak, inta bi akulu sunu wele inta bi asrubu sunu- wele an jisim bitak, inta bi libisu sunu. Haya ma afdal min akil, wa jisim ma afdal min gumasat? ²⁶ Suf le tiyur al fi jou. Umon ma bi azra wele bi hasidu wele limu fi gugu, lakin Abu bitakun al fi samah bi akilu umon. Hal intum ma mohimin min umon? ²⁷ Munu minakum bi fekir ashan bi zidu sinin le haya botou? ²⁸ Le intum bi fekir an libsa? Zekir an zuhur al fi mazra, Kef umon bi raba. Umon ma bi istakal, wa ma bi salahu malabis. ²⁹ Lisa Ana bi gul le intum, hata Suliman fi kulu mejid bitou ma libisu ze wahid min zuhur del. ³⁰ Kan Allah libisu zuhur al fi mazra, al bi zahir alela wa bukra bi jadau fi nar, kef ketir shedid huwo bi libisu inta, inta al iman bitak saheir? ³¹ Ashan kida mata fekir wa gul, ' Nina bi akulu sunu?' 'wele nina bi asrub sunu?' wele nina bi libisu sunu?' ³² Fa nas al geir Yahudiyin bi fetis hajat del, wa Abu bitak al samawi aruf be-inu inta deir umon. ³³ Lakin fetis Mololut ta Allah awel wa biir bitou wa kulu hajat del bi wodi le inta. ³⁴ Ashan kida mata fekir le bukra, fa yom bita bukra bi fekir an nefsu. Ai yom indu masakil bitou.