¹ Hasa zaman saba ja, Raisenta kuhana wa kulu shiuk ta nas umun limu wab katitu ashan bi katulu Yesua. ² Umun gubudu uwu wa shilu uwu le Bilatus al wali. ³ Wa zaman Yahuza al Iskaruti, al selimu uwu ayinu inu Yesua kalas hukumu, uwu tub wa rija teletin gita ta fidda le raise ta kahana wa shiuk, ⁴ wa wunuso, ''Ana amulu katiya be selimu dom al beri.'' Lakin umun kelim, ''De mana tuo shunu le nina? Ayinu be nefsa taki.'' ⁵ Yala uwu jadu teletin fidda de fi kenisa, wa tala bara, wa rua kanagu nefsa. ⁶ Raaise ta kahana shilu teletin gita ta fidda de wa wunuso, ''Uwu ma ganuni ashan bi kutu gurush de fi sunduk ta malia lanu de tamana ta dom.'' ⁷ Umun nakishu kalam de yala umun biu wata al bi dufunu fugu nas al garibin. ⁸ Le sabab de kutu isim ta mahal de ''Wata ta dom'' le yom ta alela. ⁹ Yala kalam al kan itnabauo ma Armia al nebi kan timu, al bi wunuso, ''Umun shilu teletin gita ta fidda de tamana al kutu le uwu bewasat Eyal ta Israiel, ¹⁰ wa umun wedi le wata ta al fakari, ze ma Rabuna weri le ana. ¹¹ Hasa Yesua wegif gidam ta wali, wa wali asalu uwu, ''Itta yau Melik ta Yahud? Yesua juwabu uwu, Itta kelim kida.'' ¹² Lakin zaman ishtekio uwu ma raise ta kahana wa shiuk, uwu ma juwabu ayi haja. ¹³ Yala Bilatus bkelim le uwu, ''Itta ma gi asuma shukuat al did itta kulu de?'' ¹⁴ Lakin uwu ma juwabu hata be kilima wahid, laman wala kan mustagarab kalis. ¹⁵ Hasa fi kulu Eid wali indu nizam ta fiku zol wahid min sijin zol al shab yau bi iktaru. ¹⁶ Fi zaman tak umun indu mujirim tani katal isim tuo Barabas. ¹⁷ Yala zaman umu limu sawa, Bilatus kelim le umun, ''Itakum der kede Ana fiku le itakum munu? Barabas wele Yesua al isim tuo al Messih? ¹⁸ Uwu arufu umun selimu Yesua ashan umun zalanin. ¹⁹ Ligu uwu bi geni fi kuris ta hukum, mara tuo rasulu le uwu kabara wa kelim, ''Mata amulu ayi haja le zol al beri de. Lanu ana taban be hilim an uwu.''n ²⁰ Hasa raise ta kahana wa shiuk agnnau jumhur ashan bi asalu kelde fiku Barsaba, wa kede katulu Yesua. ²¹ Wali asalu umun Yatu min itenin delin kede ana fiku le itakum? Umun kelim, ''Barsaba'' ²² Bilatus wunuso le umun, ''Ana bi amuliu shunu le Yesua al isim tuo al Messih?'' Umun kulu juwabu, Selibu uwu.'' ²³ Uwu kelim, ''alu, de yatu jerima al uwu amulu?'' Lakin umun zidu sout tumun, ''Selibu uwu.'' ²⁴ Zaman Bilatus ayinu uwu ma bi agider amulu ayi haja, lakin muzahara der bada, uwu shilu moyo, wa kasulu eden tuo gidam ta nas kulu, wa wunuso, ''Ana beri min dom ta zol de. Kede itakum ayinu be nefus takum.'' ²⁵ Nas kulu wunuso, ''Kede dom tuo rija le inna wa eyal ta nina.'' ²⁶ Yala uwu fiku le umun Barabas, lakin uwu jeledu Yesua wa selmu uwu kece ruwa selibu. ²⁷ Baat kida jesh ta wali shilu Yesua le raasa ta hukuma wa limu kulu jesh al fi hinak. ²⁸ Umun agila gumash tuo wa dugu uwu wa libisu le uwu gumash gurmuzi. ²⁹ Umun amulu iklil min shuk wa kutu fi ras tuo, wa wedi le uwu asaya fi eden tuo al yemin. Umun dengir gidam tuo alisu uwu, kelim, ''Salam, ya Melik ta Yahud!'' ³⁰ Uwu tufu buzak fugu uwu, wa shilu asaya wa dugu uwu fi ras tani wa tani. ³¹ Baat ma umun alisu uwu, umun shilu gumash min uwu wa libisu le uwu gumash tuo, wa shilu le selib. ³⁴ Ze ma umun bi tala bara, umun ligu rajil isim tuo Simon, min Gayrawan, umun alisu zol de wa sibu uwu arufa selib ta Yesua. ³³ Umun ja fi makan isim tuo Gologota, al mana tuo ''Mahal ta Jumjuma.'' ³² Umun wedi le uwu Kumur mulakbat be marara ashan bi ashurubu Lkain zaman uwu jeribu, uwu ma bi ageder ashurubu. ³⁵ Wekit umun selibu uwu, umun jada gura wa gesimu gumash tuo, ³⁶ wa umun geni harisu uwu. ³⁷ Umun kutu fi ras tuo luha katibu,''De Yesua, melik ta Yahud.'' ³⁸ Itnin haramia kan selibu ma uwu, wahid be yemin tuo wa tani be shimal ta tuo. ³⁹ Delin al bi mururu sitimu uwu, bi hizu ras ⁴⁰ wa bi wunuso, ''Itta al kan bi ruwa kasuru haikal wa bi abinu fi talat yom, kalisu nefsa taki! kan itta jena ta Allah, nezil tihid min selib!'' ⁴¹ Be nefsu teriga rais ta kahana kan bi alisu uwu, sawa ma kataba wa shiuk, wa wunuso, ⁴² ''Uwu kalisu nas tanin, lakin ma bi agider kalisu nefsa tuo. Uwu yau Melik ta Israel. Kede uwu nezil min selib, yala nina bi amin fugu uwu. ⁴³ Uwu kutu sikah tuo fi Allah, kede Allah kalisu uwu hasa, kan Allah bi fekir ashan bi hariru uwu. Laanu uwu zatu kelim, 'Ana Jena ta Allah.''' ⁴⁴ Be nefsa teriga haramiyat al selibu ma uwu bardu bi shitimu uwu. ⁴⁵ Min saa sitta lahadi sa Tissa dunia kulu kan duluna. ⁴⁶ Fi saa tissa, Yesua kure be sout ali wa kelim, ''Eli, Eli, Lima shabaktani?'' al mana tuo Ilahi, Ilahi, malu itta sibu ana? ⁴⁷ wekit delin al bi wegif asuma, umun kelim, ''Uwu bi nadi Eliya.'' ⁴⁸ Tuwali wahid min umun jere wa shilu isfonge, malian be kumur, wa rubutu fi asaya, wa wedi le uwu ashan kede shurubu. ⁴⁹ Bagi nas de wunuso, ''Sibu takum uwu barau. kan Eliya bi ja kalisu uwu.'' ⁵⁰ Yesua kure tani bi sout alli wa selimu roho tou. ⁵¹ Touali sitara ta Haikal sheretu le itnin min fuk le tihit, wa wata hizzu, wa hujar kasuru kasuru. ⁵² Kubur fata fata, wa gisim ta nas al kadisin al dufunu gum. ⁵³ Umun tala bara min gubur baat ma Yesua gum, wa umun dakalu medina al mukadasa, wa zahir le nas ketirin. ⁵⁴ Gaid al wa delin al kan bi ayinu Yesua ayinu wat hizza wa hajat al hasil , umun kafu kalis wa kelim, ''Hagiga de kan Jena ta Allah.'' ⁵⁵ Nusuwan ketir al duruo wara Yesua min Jelil wa bi kadimu uwu umun kan bi ayinu min bait. ⁵⁶ Fi nus tumun kan Mariam al Mejdelia, Mariam uma ta Yagub ma Yusi, wa uma ta Eyal ta Zebedee. ⁵⁷ Zaman biga asiya, fi zol ganiyan ja min Rama, isim tuo Yusuf, uwu kan telmiz ta Yesua. ⁵⁸ Uwu rauwa le Bilatus wa asalu jisim ta Yesua. Bilatus weri kede wedi le uwu. ⁵⁹ Yusuf shilu jisim de, wa lifu be gumash kitan, ⁶⁰ wa kutu fi gubur tuo al jedid al uwu afura fi hajer. Baat kida uwu derdek hajer fi bab ta gubur wa ruewa. ⁶¹ Mariam al Mejdelia wa Maria al tani kan fi hinak, gaidin aksi ta gubur. ⁶² Fi yom nimra itnin, al uwu yom ta tejhiz, rais ta kahana wa Frisiin limu sawa ma Bilatus. ⁶³ Umun wunuso, ''Said, inna zekir zaman zol al kadab de lisa hai, uwu kelim, 'Baat talata yom uwu bi gum tani.' ⁶⁴ Ashan kida kede itta wedi awamir ashan bi harisu gubur de lahadi yom nimra talata, mumkin talamiz tuo bi ja seregu uwu wa bi weri le nas, 'Uwu gum min mutu,' wa kidib al akir de bikun kaab min al awel.'' ⁶⁵ Bilatus kelim le umun, ''Shilu takum huras. Ruwa takum harisu gubur de ze itakum bi ageder.'' ⁶⁶ Umun ruwa wa kiutu huras fi gubur, wa gufulu hajer de guwi.