¹ Yahuwa wonusu le Musa, gali, ² Amiru shab bita Israel ashan bi jibu zed safi min zetun ashan bi kubu fi lamba, Ashan nur bi estemir wala. ³ Bara sitara gidam morsum bita tifagiya fi kema bita ijtima, min misah le sabah Aaron lazim be istimrar, bi hafisu lamba de kede wala gidam Yahuwa. De bikun ayam sabit fi kulu ajial bita shab ta Israel. ⁴ Gesis al kebir de bi hafisu lamba kede wala gidam Yahuwa, Lambat de fi ras magaid bita lambat al be dahab safi. ⁵ Intum lazim kede shilu degig naim(layuk) wa haragu itnasar rakif(eez). Lazim kede yekun arba liter fi kulu rakif. ⁶ Bad dak kede intum kutu umon fi itnin shaf, sita fi kulu shaf, fi terbeza bita dahab safi gidam Yahuwa. ⁷ Inta lazim kede kutu bohur fi kulu khat (shaf) bita rakif ze hataya al bi mesilu. Bohur de bi haragu le Yahuwa. ⁸ Gesis al kebir de kulu yom sebit bi kutu rakif gidam Yahuwa be niyaba bita shab bita Israel, ze alama bita tifagia al ma indu nihaya. ⁹ Hataya de bikun le Aaron wa awulad bitou, wa umon bi akulu fi mahal al kudus, fa huwo juzu min hataya al haragu be nar le Yahuwa." ¹⁰ Hasa huwo hasil be inu weled bita mara israeli, abu tou masiri, huwo ruwa ma shab bita Israel. Weled ta mara Israeli de sakil ma zol Israeli fi kem. ¹¹ Weled bita mara Israeli de wonusu kalam batal did Yahuwa wa laanu Allah, bad kida shab jibu weled de le Musa. Isim ta uma tou Shelomith, biniya bita Dibri, min gebila bita Dan. ¹² Umon kutu huwo fi sijin lahadi Yahuwa bi zahiru meshia bitou le umon. ¹³ Bad dak Yahuwa wonusu le Musa, gali, ¹⁴ Shilu zol al laanu Allah de bara min kem. Nas kulu al asuma kalam an huwo kede kutu iden tomon fi ras tou, wa bad dak nas kulu kede durubu huwo be hujar. ¹⁵ Lazim kede inta wori le shab bita Israeli wa gul, Ai zol al laanu Allah lazim kede huwo arfau galat tou. ¹⁶ Zol al bi wonusu kalam batal did Yahuwa lazim kede katulu. Nas kulu kede durubu huwo, kan huwo ajnabi wele muatin Israeli. Izakan ai wahid wonusu kalam batal did Yahuwa, lazim kede katulu huwo. ¹⁷ Izakan ai wahid darabu zol tani, kede katulu huwo. ¹⁸ Izakan ai wahid darabu haiwan bita zol tani, kede huwo dafa, haya be haya. ¹⁹ Izakan ai wahid awugu jiran tou, kede amulu le huwo ze huwo amulu le jiran tou. ²⁰ kisir be kisir, ena be ena, sunun be sunun. Ze huwo awugu zol, kede kaman amulu le huwo. ²¹ Ai wahid al katulu haiwan bi dafa. Ai waid al katulu zol kede katulu. ²² Intum lazim kede kutu ganun de le ajnabi wa muatin Israeli, Fa Ana Yahuwa Allah taki."' ²³ Bad kida Musa wonusu le Shab bita Israel, wa shab de jabu zol de bara min kem, zol al laanu Yahuwa. Umon durubu huwo be hujar. Shab bita Israel nafisu awamir al kan Yahuwa wodi le Musa.