¹ Yahuwa wonusu(kelimu) le Musa: ² "Wonusu le nas bita Israel, wa kelimu le umon, 'Del yau ayam(musim) al kutu le ihtifal bita Yahuwa, al intum lazim bi alinu le nas kudusin; umon yau ayam(musim) al mustedim. ³ Intum bi istakal sita ayam, lakin yom nimra sabah yau yom bita raha, yom al kudus. Lazim intum ma bi istakal ai sokol le-anu de yom al sabah le Yahuwa fi kulu mahal al intum gaidin. ⁴ Del yau ayam bita ihtifal al kutu bitaYahuwa, yom al mukadas al lazim intum bi alinu fi ayam bitomon al kutu: ⁵ Fi shahar al awel, fi arbatasar yom fi shahar fi misah, yau fusha bita Yahuwa. ⁶ Fi yom kamistasar bita nefsu shahar yau musim bita iid al fitir bita Yahuwa. fi sabah ayam intum lazim bi akulu fetira. ⁷ Yom al awel intum bi kutu kas le limu sawa; Intum ma bi amulu ai sokol bitakum al bita kulu yom. ⁸ Intum bi gedimu hataya al akil le Yahuwa le sabah ayam. Yom al sabah yau yom al kutu kas le Yahuwa, wa fi yom dak intum lazim ma amulu sokol bitakum al yomi."' ⁹ Yahuwa kelimu le Musa, gal, ¹⁰ "wonusu le shab bita Israel wa kelimu le umon, Fi wokit intum bi wosulu fi ardi al Ana bi wodi le intum, wa fi wokit intum katau hasad, bad dak intum bi jibu robta bita simar al awel bita dura le gesis. ¹¹ Huwo bi arfa robta bita dura de gidam Yahuwa wa gedimu dura le huwo, bi gabilu dura de be niyaba bitak. Huwo bikun baad sabah yom al gesis bi arfau wa bi gedimu le ana. ¹² Fi yom al inta bi arfa robta bita dura de wa gedimu le ana, inta lazim bi gedimu tez bita koruf(koruf abu rajil) al indu wahid sena wa ma indu eeb ze hataya al bi haragu le Yahuwa. ¹³ Hataya al dura de lazim keli yekun arba liter wa nus bita degig al naim lagbatu be zed, hataya al haragu be nar le Yahuwa, al bi wodi riha al hilu, wa hataya al kumu rarba liter al bi ashrubu. ¹⁴ Inta lazim ma bi akulu rakif(kubs) wele dura al haragu au dura safi, Lahadi nefsu yom inta jibu hataya de le Allah bitak. De bikun amur sabit le jil bita shab bitak, fi kulu mahal al inta bi geni fogo. ¹⁵ Bada min yom baad sebit(sabah yom) - Dak yau yom al inta jibu robta bita dura de ze hataya- idu sabah uzbu(asabi) kamil. ¹⁶ Lazim inta bi asibu kamsin ayam, de yau yom baad sabah asabi. Bad dak inta lazim bi gedimu hataya al jedid bita dura le Yahuwa. ¹⁷ Intum lazim bi jibu min biyut bitakum itnin rakif maulu be arba liter wa nus. Umon lazim bi amulu min degig naim wa aglibu be kemira; umon bikun hataya bita simar al awel le Yahuwa. ¹⁸ Intum lazim bi gedimu ma rakif sabah korufan al indum sena wahid wa bidun eeb, wahid tor suker, wa itnin korufan. Umon lazim bikun hataya al haragu le Yahuwa, ma hataya tomon al dura wa hataya al bi ashrubu, hataya al amulu be nar wa bi wodi riha al hilu le Yahuwa. ¹⁹ Inta lazim bi gedimu wahid ganamaya tez le hataya bita katiya, wa itnin korufan abu rujal al indu sena wahid le zebiha, ze hataya bita sharika. ²⁰ Gesis lazim bi arfau umon sawa ma rakif(kubs) bita simar al awel gidam Yahuwa, wa gedimu umon le huwo ze hataya ma itnin koruf. Umon bikun hataya al kudus le Yahuwa bita gesis. ²¹ Intum lazim bi alinu fi nefsu yom. Fii bikun yom al kudus, wa inta lazim ma bi amulu ai sokol. De bikun yom sabit fi kulu shab bita jil bitakum fi kulu mahalat al intum bi geni fogo. ²² Fi wokit intum bi gatau hasad bita ardi bitakum, intum lazim ma bi gatau kulu zawiya bita zira bitakum, wa intum lazim ma bi limu hasad kulu. Intum lazim bi sibu umon le nas masakin wa le ajanib. Ana Allah bitakum."' ²³ Yahuwa wonusu le Musa, gal, ²⁴ Wonusu le shab bita Israel wa gul, ' Fi shahar nimira sabah, yom al awel fi shahar dak bikun yom bita raha le intum, Zikra ma afuku buruju, wa yom kudus. ²⁵ Lazim intum ma bi istakal ai sokol, wa intum lazim bi gedimu zebiha al haragu be nar le Yahuwa.'" ²⁶ Bad dak Yahuwa wonusu le Musa, gal, ²⁷ Hasa yom ashara bita shahar nimra sabah huwo yom bita zebiha le ghufran. Huwo bikun yom al kudus, wa intum lazim bi nezilu nufuskum wa gedimu hataya al haragu be nar le Yahuwa. ²⁸ Intum lazim ma bi istakal ai sokol fi yom dak le-anu huwo yom bita zebiha le ghufran, Ashan bi amulu zebiha bita ghufran le intum gidam Yahuwa Allah bitakum. ²⁹ Ai zol al ma nezilu nefsu fi yom dak bi ferigu bara min nas bitou. ³⁰ Ai zol al bi istakal sokol fi yom dak, Ana, Yahuwa bi demiru huwo min beinu shab bitou. ³¹ Intum lazim ma bi istakal ai no bita sokol fi yom dak. De bikun yom sabit fi le kulu ajial bita shab bitakum fi kulu mahal al intum gaidin fogo. ³² Yom de bikun yom bitakum al sebit le raha, wa intum lazim bi nezilu nufuskum fi yom tisah bita shahar fi misah. Min misah le misah intum bi kun harisin le yom sebit bitakum. ³³ Yahuwa wonusu le Musa, gal, ³⁴ Wonusu le shab bita Israel, gul, 'Fi yom kamistasar bita sahar nimra sabah bikun musim bita ruakib le Yahuwa. huwo bi shilu sabah ayam. ³⁵ Fi yom al awel bikun fii yom kudus. Intum lazim ma bi istakal(amulu) ai sokol. ³⁶ Le fetra bita sabah ayam intum lazim bi gedimu zebiha al haragu bi nar le Yahuwa. Fi yom tamaniah lazim bikun fii yom kudus, wa intum lazim bi gedimu zebiha al haragu be nar le Yahuwa. De bikun yom kas bita lama, wa intum lazim ma bi amulu ai sokol ³⁷ Del yau ayam al sabit le Yahuwa, al intum bi alinu ze ayam kudus ashan bi gedimu zebiha al bi haragu be nar le Yahuwa, hataya al haragu wa hataya bita dura, zebiha wa hataya al bi asrubu, ai hayata fi yom bitou. ³⁸ Musim bita ihtifal del bikun idafa le sebit bita Yahuwa wa hadayat bitakum, kulu kasam, wa kulu hataya al inta bi wodi be nefsak le Yahuwa. ³⁹ Be kusus musim bita ruakib, fi yom kamistasar bita shahar nimra sabah, Fi wokit intum gatau(limu) samar bita ardi, Intum lazim bi hafisu musim bita Yahuwa le fetra bita sabah ayam. Yom al awel bikun yom bita raha , wa yom tamaniah bikun kaman yom bita raha. ⁴⁰ Fi yom al awel intum lazim bi shilu samar al asli min asjar, furu bita asjar bita nakla, wa furu al indu awurak bita asjar semik, wa safsaf min jadawil, wa intum bi afrah gidam Yahuwa Allah bitakum le sabah ayam. ⁴¹ Sabah ayam bita kulu sena, inta lazim bi ektefil musim de le Yahuwa. De bikun ayam sabit le kulu ajial bita nas bitakum fi kulu mahalat intum bi geni fogo. Intum lazim bi ektefil musim de fi shahar nimra sabah ⁴² Intum lazim bi geni fi rawakib suhar le fetra bita sabah ayam. Kulu nas al weledu fi Israel lazim bi geni fi rawakib suhar le fetra ta sabah ayam, ⁴³ ashan iyal ta iyal takum, jil baad jil, bi alimu kef Ana kutu shab bita Israel fi rawakib fi wokit Ana tala umon bara min Masir. Ana Yahuwa Allah bitak."' ⁴⁴ Fi teriga de, Musa alinu le shab bita Israel musim al kutu sabit le Yahuwa.