¹ Yahuwa wonusu le Musa fi Jebel Sinai, gali, ² "Wonusu le shab bita Israel wa kelimu le umon, 'Kan intum ja fi ardi al Ana bi wodi le intum, Bad dak intum lazim bi tii(ihterim) yom sebit bita Yahuwa. ³ Intum lazim bi zarau mazra bitakum le fetra bita sita sena, wa le sita sinin intum kede gatau furu bita inab wa limu al intaj (mahasil). ⁴ Lakin fi sena nimra sabah, kede hafisu yom sebit bita raha ta ardi de, Sebit bita Yahuwa. Intum kede ma zarau wele gatau furu bita inab. ⁵ Intum lazim kede ma amulu nefir le hajat al gum barau, wa intum lazim kede amulu nefir le ai inab al raba fi furu al intum ma gatau. De bikun sena le raha bita ard. ⁶ hajat al raba fi ardi al ma zarau fi sena ta Sebit(sabbath) bikun akil le intum. Intum khudam bitakum al nusuwan wa rujal, Khudam al intum ajiru wa ajanib al bi geni ma intum yau bi limu akil, ⁷ wa bahaim bitakum wa haiwanat bita ghaba kaman bi akulu hajat al ardi bitakum antiju. ⁸ Intum lazim kede asibu sabah sebit bita sena, al huwo, sabah marat sabah sena, ashan bikun sabah sebit bita sena, adad tou kulu bikun tisa wa arbein sena. ⁹ Bad dak intum lazim bi afuku buruji be shot fok fi kulu mahal fi yom nimra ashara bita sahar nimra sabah.Fi yom bita ghufran intum bi afuku buruji fi kulu ard bitakum. ¹⁰ Intum lazim kede kutu sena nimra kamistasar kas le Yahuwa wa alinu tahrir fi kulu ard le kulu nas al gaidin fogo. Huwo yom yubil le intum, ali lazim mumtalakat wa abid bi rijau le ashira bitou. ¹¹ Sena nimra kamistasar bikun yubil le intum. Intum lazim kede ma zarau wele(au) amulu nefir ta hasad. Akulu haja ara raba be nefsu, wa limu inab ali raba fi furu al ma gatau. ¹² Fa huwo yubil, ali bikun kudus le intum. Intum lazim bi akulu intaj al raba be nefsu fi gabat(mazra). ¹³ Intum lazim bi rijau ai zol wa mumtalakat tomon fi sena bita yubil. ¹⁴ Izakan intum biyu ai gita ard le jiran bitak au(wele) istara ai gita ard min jiran bitak, Intum kede ma zulumu wele amulu batal be baad. ¹⁵ Izakan intum istara gita ard min jiran bitak, kede intum arufu adad bita sinin wa mahasil al hasidu lahadi yubil al jai. Jiran bitak al biyu gita ard de kede kaman arufu. ¹⁶ Adad bita sinin ketir lahadi yubil al jai bi zidu keima bita ard, wa adad bita sinin al besit lahadi yubil al jai bi negesu keima, le-anu adad bita hasad ardi de bi antiju le sidu al jedid huwo sawa ma ada bita sena gubal yubil al jai. ¹⁷ Intum lazim kede ma zulumu we amulu batal be baad; bidal de(afrud), intum lazim kede ihterim Allah bitakum, fa Ana Yahuwa Allah bitakum. ¹⁸ v 18 Ashan kida intum lazim bi tii(ihterim) kararat bitai, hafisu gawanin tai, wa nafisu umon. Bad dak intum bi geni fi ardi be salam. ¹⁹ Ardi bi antij simar tou, wa intum bi akulu lahadi intum bi saban wa geni hinak be salam. ²⁰ Intum bi gul, "Nina bi akulu sunu fi sena nimira sabah? Suf(ainu) nina ma bi zarau wele bi limu intaj bita nina." ²¹ Ana bi amiru barakat bitai ashan bi ja le intum fi sena nimira sita, wa bi antij hasad kifaya le talata sena. ²² Intum bi zarau fi sena nimira tamania wa bi istemir ashan akulu min intaj ta sena al futu' wa akil al intum limu. Lahadi hasad bita sena nimira tisa ja, intum bi agider ashan akulu min makazin bita sinin al futu. ²³ Ardi de lazim ma bi biyu le zol tani sabid, Le anu ardi de tai.(hagi) Intum kulu ajanib wa gaidin muakat fi ardi tai. ²⁴ Intum lazim bi lahizu hag bita damana(ruju) bita kulu ardi al intum akudu; Intum lazim bi asuma ardi de bi isteru wara be usra al intum istara minum. ²⁵ Izakan zol Israeli tala fakir wa le sabab dak huwo biyu juzu min mumtalakat, bad dak geribu lazim bi ja wa damanu(rijau) haja al aku bau. ²⁶ Izakan zol ma indu geribu ashan bi damanu(rijau) mumtalakat bitou, lakin kan huwo tala ghaniyan wa indu gudra(guwa) ashan bi damanu ²⁷ bad dak huwo bi hasibu sinin min zaman ardi de biyu wa bi dafa bagi le zol al kan biyu. Bad dak huwo bi rija le mumtalakat tou. ²⁸ Lakin kan huwo ma agder ashan bi rajau ardi de wara le nefsu, bad dak ardi al huwo biyu de bi fadulu le sidi al bau(biyu) lahadi sena bita Yubil. Fi sena bita Yubil, ardi de bi rajau le zol al bau, wa sidi al hagiga bi rajau mumtalakat bitou. ²⁹ Izakan zol biyu bet al indu hos fi asima, bad dak huwo bi isteri ardi warafi kilal sena baad bau. Le fetrabita sena kamil huwo indu hak ashan bi damanu. ³⁰ kan bet de ma damanu fi kilal sena kamil, bad dak bet al indu hos fi asima de bikun mumtalakat sabid le zol al istara wa iyal bita iyal. Ardi de ma bi rajau fi sena bita yubil. ³¹ Lakin biyut bita bilad al ma indu hos fi hawili umon bi ainu umon ze mazra bita ardi. Bi damanu umon, wa bi rajau umon lazim fi sena bita Yubil. ³² Ala kulu hal, biyut al Lawiyin indu fi asima tomon bi damanu fi ai zaman(woki.). ³³ kan wahid min Lawin ma damanu (rajau) bet al huwo bau bara, bad dak bet ali bau fi asima fi mahal al fogo de lazim bi rijau fi sena bita Yubil, fa biyut al fi asima bita Lawin umon mumtalakat tomon bein shab bita Israel. ³⁴ Lakin mazra al fi hawili asima tomon ma bi biyu le-anu de mumtalakat sabid bita Lawin. ³⁵ Izakan zol bita doula takum tala (biga)meskin(fahir), ashan kida(lahadi) huwo ma bi agder ligo haja le nefsu, bad dak intum lazim bi saidu huwo ze intum bi saidu ajnabi au ai zol tani al gaid(aiz) ze zol ta bara(gharib) bein intum. ³⁶ mata shilu ribe au(wele) hawil ashan bi ligo faida min huwo be ai teriga, lakin ihterim Allah ashan aku bitak bi estemir geni ma intum. ³⁷ Intum kede ma wodi le umon dein ta gurus be ribe, wele biyu le huwo akil ashan bi ligo faida. ³⁸ Ana Yahuwa Allah bitak, ali jibu intum bara min Masir, ashan Ana bi wodi le intum ardi canaan, wa ashan Ana bikun Allah bitakum. ³⁹ Izakan zol bita doula takum biga meskin(fahir) wa bau nefsu le intum, Intum kede ma kutu huwo ashan istakal ze abid. ⁴⁰ Wodi le huwo sokol ze khadam al ajiru. Huwo lazim bikun ze zol al gaid ma intum muakat. Huwo bi istakal le Intum lahadi sena bita Yubil. ⁴¹ Bad dak huwo bi rua min intum, huwo ma iyal tou, wa bi rijau huwo le asira bitou wa le mumtakalat bita abu tou. ⁴² Fa umon khudam bitai al Ana jibu min ardi bita Masir. Umon ma biyu ze abid. ⁴³ Intum ma hakimu umon be teriga kaab, lakin intum bi ihterim Allah bitakum. ⁴⁴ Ze abid al rajil wa mara, al intum bi agder ashan bi ligo min dual al gaidin hauli intum, Intum bi isteri min umon. ⁴⁵ Intum kaman bi agder isteri abid min ajanib al gaidin bein intum wa min asira bitomon al ma intum, al weledu fi ardi bitakum, wa umon bikun mumtalakat bitakum. ⁴⁶ Intum bi agder wodi abid ze del ze wirasa baad intum le iyal bitakum. ashan umon bi amsuku ze mumtalakat, wa kutu umon abid le muda haya, lakin intum lazim kede ma hakumu akwana bitakum bein shab bita Israel be teriga kaab ⁴⁷ Izakan ajnabi au zol tani al gaid ma intum muakat tala ghani, wa izakan wahid min zol bitakum Israeli tala meskin(fahir) wa biyu nefu le ajnabi dak, au le udu ta asira bita ajnabi, ⁴⁸ Baad zol bitakum al Israeli isteru, bi isteru huwo wara. Zol tani min usra bitou bi damanu huwo. ⁴⁹ Huwo bikun khal ta zol de, au weled bita khal tou, al bi damanu huwo, au ai zol al fi asira tou. izakan huwo biga (tala) ghani, huwo bi damanu nefsu. ⁵⁰ Huwo bi tafik ma zol al istara huwo; umon bi asibu sinin min sena al huwo biyu nefsu le zol al isteru huwo lahadi sena bita Yubil. Ser (taman) bita damana lazim bikun godur haja al bi dafau le zol al ajiru de, le adad bita sinin huwo bi istemir ashan bi istakal le zol al istera huwo. ⁵¹ Izakan sinin lisa ketir lahadi sena bita Yubil, huwo lazim bi dafa ze taman le damana tou adad bita gurus al bikun ze adad bita sinin dak. ⁵² Izakan sinin de besit le sena bita Yubil, Bad dak huwo lazim bi tafik ma zol al istara huwo yekun adad bita sinin al sibu gubal sena bita Yubil, wa huwo lazim kede dafa le damana to be hifis ma adad ta sinin. ⁵³ Bi wodi le huwo sokol ze zol al ajiru kulu sena. Intum lazim kede it-akat ma amulu huwo be teriga kaab. ⁵⁴ Izakan ma damanu huwo be teriga de, huwo bi istakal (khaimu) lahadi sena bita Yubil, huwo ma iyal tou. ⁵⁵ Le ana Shab bita Israel khudam. Umon khudam bitai al Ana jibu min ardi bita Masir. Ana Yahuwa Allah bitakum."'