¹ Baad de ja gal Daud gelibu alfalastiniin wa setar lom ,ya Daud shilu Matheg Ammah min setara le Falastiniin. ² Biga huwo gelibu Moab wa aburu humon be wasad kutu rujal tomon fi kat wa naimu fi wata tehed. huwo aburu bara ethnen kaat ashan kutu le mut, wa wahid kat le de al deiru hai. Yala nas Mobitiin tala abid ta Daud wa bada dafa le huwo deriba. ³ Daud yala gelibu Hadadezer jena ta Rehob, al melik ta Zobah, ze Hadadezer kan mashi ashan rija hokum towo fi mugta bahar Euphrates . ⁴ Daud gobudu min huwo 1,700 Hasasin wa isriin alf musha. Daud demiru kulu kulu al hasasin del ,lakin sibu alkifaya miya minum. ⁵ Wokit al arameans ta Damascus ja ashan saidu Hadadezer melik ta Zobah, Daud katulu ethnen wa isriin alf rujal arameans. ⁶ yala Daud kutu muaskar fi Aram ta Damascus ,wa Arameans biga kadamiin ta Daud wa gi dafa le huwo deriba. Yahweh gi wodi intishar le Daud fi aiya mahal al huwo gi ruah. ⁷ Daud shilu aldaraga al dahap al kan le Kadamiin ta Hadadezer wa jibu humon le Orshelim. ⁸ Min Tebah wa Berothai, mudun ta Hadadezer, Melik Daud shilu nehas ketir. ⁹ Wokit Tou, Melik ta Hamath , asuma gal Daud gelibu kulu Jesh ta Hadadezer, ¹⁰ Tou rasulu Hadoram weledu le Melik Daud ashan selimu wa bariku, ashan Daud shakil did Hadadezer wa seitar le huwo, Lianu Hadadezer kan haribu did Tou .Hadoram jibu mahu Fida, Dahab, wa Nihas ¹¹ Melik Daud gedimu kulu hajat de le Yahweh, sawa ma Fida wa Dahab al huwo gedimu, alja min kulu umam al humon seitar fogo – ¹² Min Aram, Moab, nas ta Amon, al falatiniin,wa Amalek sawa ma kulu al ketir ta Hadadezer jena ta Rehob, al melik ta Zobah. ¹³ Isim ta Daud maaruf kalis wokit huwo rija min seitara ta Arameans fi jaduel ta mile, ma tamantashar alf rujalum. ¹⁴ Huwo kutu Muaskar fi kulu mahalat ta Edom, wa kulu al Edomiin biga kadamiin towo. Yahweh wodi intishar le Daud fi kulu mahal alhuwo ruah. ¹⁵ Daud hukumu fi kulu Israel, wa huwo hokum ma adalla wa hak le kulu nas towo. ¹⁶ Joab weled ta Zeruiah kan kaaid ta Jesh ,wa Jehoshaphat weled ta Ahilud mushejil. ¹⁷ Zadok weled ta Ahitub wa Ahimelek weled ta Abiathar Gasausa,wa Seraiah kan katib. ¹⁸ Benaiah weled ta Jehoiada kan fi musuliya ta Kerethites wa Pelethites, wa aulat Daud kan Gasausa .