¹ Hasa Daud tani limu sawa kulu rujal al iktaru ta Israel , Teletiin alf. ² Daud gum wa ruah ma kulu rujal towo al kan ma huwo fi Baalah fi Yahuza ashan jibu min hinak Tabut al ahat ta Allah , al bi nadia ma isim ta Yahweh ta jesh , al gaid fi kursi fok al Malaika ³ Humon kutu al Tabut al hat ta Allah fi Karlo lisa jedid . Humon jibu Karlo de bara min bed ta Abinadab fi jebel . Uzzah wa Ahio , aulat towo gi hafisu al Karlo aljedid de . ⁴ Humon jibu karlo de min bed ta Abinadab al fok fi jebel ma Tabut al ahat ta Allah fogo . Ahio kan gi douru gidam ta Tabut al ahat . ⁵ Yala Daud ma kulu bed ta Israel bada alabu gidam Yahweh ,gi iktefil ma allaat amulu min kashaap , adungu ,kosh kosh , rababa , nungara . ⁶ Wokit humon ja le nezilla ta Nakon , al Tor de hizu , wa Uzzah alagu ma yeden towo ashan gobudu Tabut al ahat ta Allah de ,huwo amsuku kulu . ⁷ Yala zalan ta Yahweh bada wala did Uzzah . Allah hajimu huwo did katiya towo . Uzzah mutu hinak fi jambu Tabut al ahat ta Allah . ⁸ Daud tala zalan lianu Yahweh hajimu Uzzah , wa huwo nadi isim ta mahal de Perez Uzzah. mahal dak gi nadi Perez Uzzah lahaidi yom allela. ⁹ Daud kan kafu min Yahweh yom dak . Huwo kelim,“ kef al Tabut al ahat ta¬ yahweh bi jibu le ana“ . ¹⁰ Yala Daud ma indu niya le shilu Tabut al ahat ta Yahweh ma huwo le medina ta Daud , bel ax , huwo kutu fi jambi fi bed ta Obed –Edom al Gittite. ¹¹ Al Tabut al ahat fadulu fi bed ta Obed-Edom al min Gittite le muda talata shuhur. yala Yahweh bariku huwo wa kulu bed towo. ¹² Hasa Daud wori le huwo,’’ Yahweh bariku bet ta Obed-Edom ma kulu haja al tabi le huwo ashan Tabut al ahat ta Allah.’’ Biga Daud ruah wa jibu al Tabud al ahat ta Allah min bed ta Obed-Edom le medina ta Daud ma farah. ¹³ wokit del algi arfa Tabut al ahat ta Yahweh ruah sita katuat ,huwo gedim zebiha Tor wa ijil al semin. ¹⁴ Biga alabu gidam ta Yahweh ma kulu guwa towo ; huwo kan libisu bes shurwal gitan. ¹⁵ yala Daud wa kulu bed Israel jibu Tabud al ahat ta Yahweh ma shuraak wa shot ta gurun Korufan. ¹⁶ Hasa ze al Tabut al ahat ta Yahweh ja fi dakil medina ta Daud , Michal ,bina ta Shaul ,inu bara min shubak .Hia shaf Daud gi nutu fok wa alabu gidam Yahweh . yala hia alisu huwo min gelba ta hia . ¹⁷ Humon jibu al Tabut al ahat ta Yahweh wa kutu fi mahal towo , fi nus ta kema al Daud amulu le huwo . Yala Daud haragu zebiha wa gedim zebiha ta isterekiya gidam Yahweh . ¹⁸ wokit Daud kalasu tekdima ta zebiha al mahruk ,huwo bariku nas be isim ta Yahweh ta jesh. ¹⁹ biga huwo gesimu fi nus nas kulu , kulu mujtama ta Israel, le rujal wa nasawiin, aesh ,ma laham ,wa biscowit. yala kulu nas fertek ; kulu wahid rija le bed towo. ²⁰ yala biga Daud rija bariku usra towo .Michal bina ta Shaul ja ashan limu ma Daud wa kelimu , “ kef al melik al muktaram ta Israel allele ,bi kun arian gidam ena ta banat al abid fi nus kadamiin, ze wahid al muntee budun fadiha fi nefsu ’’ ²¹ Daud juwabu le Michal “Ana amulu de gidam Yahweh, al iktar ana fok Abu taki wa fok kulu usra towo ,al hazilu ana kaaid fok nas ta Yahweh ,fok Israel. Gidam ta Yahweh ana bikun farhan. ²² ana bi kun budun kima aktar min de ,wa ana bikun befadiha fi ena tai lakin le banaat al abit ze ita kelim anu ,ana bi iktaramu “ ²³ yala Michal ,bina ta shaul ,ma indu jena lahaidi yom ta mutu towo .