¹ Kan fi jiyan fi zaman ta Daud le muda talata sinin wara baad, wa daud asalu wusa ta Yahwa. Biga Yahwa kelim, “jiyan de ja le intakum ashan shaul wa usura bito al bi katulu nas, wa ashan huwo katulu nas ta Jabaun.” ² Min hinak melik nadi nas ta Jabaun wa wonusu ma humon, wan as ta Jabaun del humon ma min nas ta Israel: humon min nas ta Amorin al fadulu. Shaab ta Israel halifu ashan ma bi katulu humon, lakin shaul kan bi hawil ashan bi katulu humon kulu be waja geliba bito le nas ta Israel wa Yahuza. ³ Daud kelim le humon, “kede ana amulu shunu le intakum? Ana bi amulu kafara kef, lahadi intakum bi bariku shaab ta Yahwa, al worisu shokol kuwes wa waad bito? ⁴ Nas ta Jabaun Juwabu huwo, “de ma musklia ta fida wole ta dahab beina nina was haul an ma usru bito. Wa be nefu teriga ma ashan nina bi katulu ai zol fi Israel. Daud juwabu, “intakum bi kelim, ashan kede ana amulu shunu? ⁵ Humon juwabu le Melik, “zol al bi hawil ashan bi katulu nina kulu, wa bi amulu muamara did nina, lahadi biga berijlu nina wa nina ma ligo mahal fi nus ta hudud ta Israel. ⁶ Kede selimu le nina saha rujal min iyal bito, wa nina bi senegu humon gidam Yahwa fi jiba ta Shaul, al Yahwa yau hazilu.” Melik bada kelim, “ana bi wodi humon le intakum.” ⁷ Meskin ta Melik amsuku mafibushis jena ta yonasan jena ta shaul, ashan halifa ta Yahwa beina humon, bina Daud wa Yonasan jen ta Shaul. ⁸ Lakin melik gum shilu itnin iyal ta Risfa biniya ta Aya, iyal al huwo weledu le Shaul iyal del asami tomon kan Armoni wa mafi bushis; wa Kaman Daud shilu kamsa iyal ta merab biniya ta Shaul, al huwo weledu le Adruil jena ta Barzilai al min mehawodi. ⁹ Huwo selimu humon fi idan ta nas Jabaun humon gum senegu humon fi jebel gidam ta Yahwa, wa humon kulu saha mutu sawa katulu humon fi zaman ta hasad, fi bidaya ta zaman gasad ta sheir. ¹⁰ Biga Risfa, biniya ta Aya, gum shilu milaya wa fersu fi Jebel le nefsa bito janbu nas al mutu mutu del, min bidaya ta hasad lahadi motoro nezil min sama tehet le humon, huwo ma sibu ashan kede tiyur ta sama karabu jisim ta del al mutu mutu be nahar wole haiwanat be bilel. ¹¹ Wori le Daud kulu hajat al Risfa, biniya ta Aya, habib ta Shaul amulu. ¹² Daud biga ruwa wa shilu udam ta Shaul wa udam ta Yonasan jena bito min nas ta Yabish jelaad, al humon kan seregu min midan ta bet shan, fi mahal al nas Falastinin kan haligu humon fogo dak, baad ma Falastinin katulu shaul fi Jelbo. ¹³ Daud shilu udam ta Shaul wa udam ta Yonasan jena bito bara min hinak, wa humon limu sawa ma udam ta saba nas al seregu hinak de. ¹⁴ Wa humon dofunu udam ta Shaul wa udam ta Yonasan jena bito fi beled ta Binyamin fi sela, fi magabir ta keis abu bito. Humon amulu be kulu talimat al melik wodi baad dak Allah Juwabu salawat tomon al humon seli be kalam wata tomon. ¹⁵ Nas Falastinin rija tani mara fi hatb ma nas Israel. Wa Daud nezil tehet ma kadamin bito ashan bi shakil ma nas Falastinin. Wa min tab ta harb Daud agder gilibu. ¹⁶ Wishbi-BEnob wahid min iyal ta Rafa, wozin ta harba bito tultu miya shakel, huwo kan musalah wa indu sef jedid, kan bi hawil ashan bi katulu Daud. ¹⁷ Lakin Abishai jena serawiya alagu Daud, huwo hujumu Falastinin. Wa katulu. Nas ta Daud gum halifu le humo, gali, “inta ma bi ruwa fi harb tani mara ma nina, ashan inta kede ma batulu lamba ta Israel” ¹⁸ Baad dak Kaman hasil harb tani ma Falastinin fi Job, sebkai al min Hushi katulu saf, kan wahid min iyal ta Rafa. ¹⁹ Wa Kaman harb tani hasil ma nas Falastinin fi Job, Alhanan jena ta Yaara min Bel-laham katulu juliyat ta je ti al kan asaya ta harba bito ze jinah ta sogur. ²⁰ 20. Wa Kaman fi harb tani gum fi jet fi fogo zol towil indu sita asabi fi idanat wa kura bito kulu, idu kulu adad bito arba wa ishirin. Huwo Kaman min iyal ta Rafa ²¹ Huwo alisu Israel, Yonasan jena ta Shemei, aku ta Daud, gum katulu huwo. ²² Del kulu iyal ta Rafa fi Jet, wa katulu humon kulu fi idan ta Daud wa be idan ta Kadamin bito.