¹ Wa Kaman fi nefsu al makan fii zol ta izaaj (amulu mashakil) kan esim tuo sheba jena ta bikri, howo min Benyamin, how afuku turumbita wa kelim, nina ma indu hak fi Daud, wele nina indu hak fi worisa ta jena ta Yesse, ayi zol keli rejaa le mahal tuo, ya Israel. ² Big nas kulu sibu Daud wa ruwa wara sheba jena ta Bikiri. Lakin rujal ta Yahudiya ruwa gerib wara melik tomon, min Urdon towali le Urshelim. ³ Zaman Daud wasulu fi ghasir tuo fi urshelim, huwo shilu ashara nuswan ta khudam tuo al kan huwo sibu ashan bi harisu al ghasir, wa huwo kutu homon fi biet tehet hirasa-huwo wodi le homon ayi haja homon deeru. Lakin huwo ma num ma homn Kaman. Gufulu homon hinak lahadi yom tomon ta mutu, homon gi resh zi homon aramil ⁴ Biga al melik kelim le amasa, fi khilal talata yom; limu rujal ta yohudiya, wa inta keli jaa, Kaman” ⁵ Biga amasa ruwa wa nadi rujal ta yahudiya, lakin huwo akhir aketiir min zaman al melik kan hadidu le huwo. ⁶ Wa Daud kelim le Abishai, “hasa sheba jena ta Bikiir bi auwgu nina aktar min al kan Abishalom amulu. Shilu khadamiin ta said taki, asakiir tai, wa turudu huwo, ashan huwo kan ligu madun al gowiin de wa huwo bi woduru min ena ta nina” ⁷ Biga rujal ta Yoab bada turudu huwo, sawa ma al jeladeen (kere thirteen) wa al saayoen(petethiteen) wa kulu muharibeen al goween homon sibu urshedim wa ruwa turudu sheba jena ta Bikiiri. ⁸ Zaman homon wosulu hajeer (sakhra) al kebiir fi gibeon, amasa jaa gabilu gash rubatu fi batna tuo wa sief dakalu fogu wa zama huwo gi ruwa le gedam, seif de bada (waga) bara. ⁹ Wa Yoab keli le Amasa, “hal inta kwes, Aku tai? Yoab amsuku Amasa min dekeen tuo bi ida tuo al yemin ashan bi (selimu) ghabily huwo. ¹⁰ Amasa ma ainu sekiin (Khanjar) al kan fi ida ta Yoab al yemin. Yoab bada atanu Amasa fi batna tuo kubu tehet fi wata (ardi) Yoab bada ma atanu huwo tani mara, wa Amasa mutu. Biga Yoab ma Abishai aku tuo turudu sheba jena ta Bikiri. ¹¹ Biga wahid min rujal ta Yoab jaa wogif jambu Amasa, wa huwo kelim, “Ayi zol al gi aidu Yoab, wa zol al tabi le Daud, keli huwo ruwa wara Yoab” ¹² Amasa kan naim fi juwa doom tuo fi nus ta sika. Zaman zol de ainu kulu gi wogif, huwo arfau Amasa bara min sika wa wadi huwo fi gaba. Huwo jada gumash fi jesim tuo, laanu huwo ainu aui zol al jaa gi wogif. ¹³ Baad shilu Amasa bara min sika. Rujal deel kulu bada ruwa wara Yoab ashan bi turudu sheba jena ta Bikiri. ¹⁴ Sheba ruwa min kulu ghbal ta Israel lahadi Abel biet maaka, wa min kulu aradi ta Bikireen al homon Kaman limu sawa wa bada turudu sheba. ¹⁵ Humon wosulu huwo wa hasiru (gurdonu) fi Abel biet maaka. Humon abinu sur wa amulu hesar fi heta ta medina. Asakiir kulu al kan ma Yoab bada dugu hete ashan bi kasuru tehet. ¹⁶ Biga kan fii mara indu hikma kore shedid fi medina, wa kelim, “asuma, min fadlak asuma takum, ya Yoab! Taal gerib jambu ana ashan ana bi agdeer wonusu ma inta”. ¹⁷ Wa Yoab jaa gerib ma hiya, wa mara de kelim, hal inta Yoab? Huwo juwabu, naam de ana” hiya kelim le huwo, asuma le kalam ta khadim taki” huwo juwabu, ana gi asuma. ¹⁸ Biga hiya bad wonusu, zaman bederi nas gi wonusu gal, fetish Irshad fi Abel; wa Irshad de bi aliju mushkila. ¹⁹ Nina medina min wahid modun al indu salam wa iman akta fi Israel. Inta deeru demiru medina al uma fi Israel leh inta deeru demiru (woduru) worisa ta Yahweh? ²⁰ Yoab juwabu wa kelim, bied, min ana, ashan ana bi woduru aw bi demiru. ²¹ De ma hagiga. Lakin fii zol min jebel Ephraim, Isim tuo sheba jena ta Bikiri Itmarad deed al melik, Daud. Wodi takum huwo bes le nina, wa ana bi tala min medina de” mara de kelim le Yoab, nina bi jada le inta ras tuo min fok heta” ²² Wa mara al hakima ruwa wonusu ma nas kulu bi bikma. Homon gata ras ta sheba jena ta Bikiri. Wa jadau ras tuo le Yoab. Biga huwo afuku turumbita wa rujal ta Yoab tala bara min medina. Ayi zol huwo le mahal tuo, wa Yoab rejaa le urshelim le melik ²³ Wa kan Yoab biga musaul (reis) ta jesh ta Israel, wa benaiah jenata yehuida kan (reis) musaul min jeladeen (keretitee) wa asuaa (peletiteen) ²⁴ Wa kan adaniram reis (musaul) min rujal al Abied, wa yahoshapat jena ta Ahilud kan zol al gi sejeel. ²⁵ Wa sheaf kan katib wa sadok wa Abiatar kan homon khahana. ²⁶ Wa Ira al min yaira kan reis al wozaraa ta Daud.