¹ Kelimu le Yoab, Asuma, al melik gi kore wa howo hazinan ashan weled tuo abshalom, ² Ashan keda bidalu nas bi amulu ihtifal fi yom dak biga jesh kulu hawilu le huzun. Le zol al asuma fi yom dak kelim, “al melik gi kore ashan jena tuo” ³ Fi yom dak asakiir kan biga gi sirigu nefsa tomon biraha le juwa medina, zi nas al indu fadiya ashan homon jere min medan ta harib. ⁴ Melik kati wasa tuo wa kore bi sut aali, “jena tai Abshalom, jena tai, jena tai!” ⁵ Biga Yoab jaa fi biet ta melik wa keli le howo alella inta amulu fadiya le asakiir taki kulu, al angizu haya taki alella, wa haya ta awlad taki wa haya ta banat taki, wa haya ta nuswan taki, wa haya ta nuswan ta khadamii taki, ⁶ Ashan inta deel al bi akrahu inta, wa inta akrahu deel al bi hibu inta. Leanu alella inta asbitu gal enu Ruasaa wa asa kiir deel ma ayi haja le inta. Alella and sidek enu Abshalom iza kan fi hai wa nina kulu mutu, kan yahu inta bi kun muksut. ⁷ Ashan keda hasa keli inta gum fok wa tala bara wa wonusu bi teriga al kwes le asakiir deel, ashan ana bi halifu bi Yahwah, iza kan inta ma ruwa alella de mafi wahid min asakiir bi fadulu ma inta. Wa de bi kun karisa al batal shedid min kulu hajat al batal al hasil le inta min wokit al inta lisa shab hata hasa” ⁸ Biga al melik gum fok wa geni fi bab ta medina, wa wori le nas kulu gal, “ainu, al melik yahu dak gi geni fi bab” wan as kulu kan jaa gidam ta al melik. Biga Israel jere, kulu zol jere le biet tuo. ⁹ Nas kulu kan gi nagishu ma baad tomon min ghabael ta Israel kulu gal, “al melik angizu nina min ida ta aada ta nina, wa how angizu nina min ida (saitara) ta phalastineen, lakin hasa howo jere bara min beled ashan Abshalom. ¹⁰ Hasa Abshalom, al nina ikhtaru howo ghaed le nina, howo mutu fi harib, biga malu intum ma bi fekiri ashan bi raja al melik wara?” ¹¹ Al melik Daud rasulu le kahana al sadok wa abiatar kelim gal, “wonusu le sheyokh (nas kubar) ta Yahudiya gal, leh intum yahu akiir nas al bi rejau al melik wara le al kwes melik, ashan bi rejau melik le ghasiri tuo? ¹² Intum akuwana tai, min laham wa adam tai biga malu intum akiir nas al deru rejau al melik? ¹³ Kaman kelim le amasa, hal inta ma laham wa adom tai? Allah amulu le ana keda, wa Kaman aktar min keda, kan inta ma yahu reis ta jesh tai fi mahal ta Yoab min hasa. ¹⁴ Howo aksab gulub ta nas ta Yahudiya zi gelba ta zol wahid. Homon rasulu le melik kelima, rejaa inta wa rujal taki kulu. ¹⁵ Biga melik rejaa wa huwo jaa le Urdun, Wa rujal ta Yahudiya jaa le Gilgal ashan humon bi jaa gabilu ma al melik wa humon bi gata nahar al urdun. ¹⁶ Shimei jena ta Gera, min usra ta Benjemite, al kan min Bahurim, Jere tehet ma nas ta Judah ashan gabelu Melik Daud ¹⁷ Kan fi rujal min usura ta Benjiman ma humon, wa Ziba al kadam ta Saul,wa hamistaryara yal to wa saba wosirin hadam ma huwo. Humon wruwa be terek ta Jordan fi ojut ta malik. ¹⁸ Humon wruwa ashan jibu usura ta melik wa amulu hai haja al huwo ayinu kwes. Shimei jena ta Gera dengiri tehet gidam melik, hubal huwo gata nahar ta Jordan. ¹⁹ Shimie kelim le melik, "ya said tai, ma keli inta, ainu katiya aw ma keli inta zikiiri galat ta khadam taki al huwo amulu fi yom al said tai al melik kan sibu urshelim, min fadlak, keli melik ma shilu fi gelba. ²⁰ Ashan khadim taki arufu enu ana amulu katiya. Asuma, ashan keda ana jaa alella a wel min usura ta Yousif kulu ana jaa ashan bi gabilu said tai al melik. ²¹ Lakin abishai jena ta serviah juubu wa kelim, “kan keli hakumu shimie bi mutu, ashan huwo laanu mumsah (zol al barikuo) ta Yahweh? ²² Biga Daud kelim, ana amulu le intum shunu, ya iyal ta seruiah, ashan intum bi tala adu tai alella? Hal fi zol bi hakumu bi katulu alella fi Israel? Ashan alella ana hakim ta Israel?” ²³ Biga melik kelim le shimmie, inta ma bi mutu,” biga al melik waadu huwo bi halifa. ²⁴ Mephibosis jena ta Saul jaa ashan bi gabilu ainu al melik. Min wokit al melik sibu medina lahdi yom al huwo rejaa bi salam, Mephibosis ma nedifu kuraa tuo, aw haligu dekeen tuo, aw kasulu gumashat tuo. ²⁵ Biga zaman al huwo jaa min urshelim ashan bi ainu (gabilu) al melik, melik kelim le howo, ya Mephibsis, malu kan inta ruwa ma ana?” ²⁶ Huwo juwabu, ya said tai al melik, khadim tai kabasu ana, ashan ana kelim, ana jeeru jahizu humar ashan ana bi arkab fogu wa ruwa ma al melik. Leanu kadim taki abu kura. ²⁷ Khadim tai ziba karabu isim tai, ana khadim taki, le said tai al melik, lakin said tai al melik zi malaika ta Allah, ashan keda, keli inta amulu haja al kwes fi ena taki. ²⁸ Leanu Ahal tai kulu bi istehik ashan said tai al melik bi hukumu homon bi mutu, lakin inta ikhtar khadim taki ashan bi kun wahid min al bi akulu ma inta fi teribiza taki, ashan keda, ana ma indu hak al bi kore le melik ashan bi amulu ayi haja tani? ²⁹ Biga al melik kelim le howo, lei inta bi ashrahu taniin a ktar? Ana ghariru enu inta wa siba bi gesimu mahal zara.” ³⁰ Mephibosis juwaabu le al melik, Naam, keli huwo shilu mahal zara de kulu, ashan said tai al melik, rejaa le beled tuo bi salam.” ³¹ Barzillai al min gilaad jaa min Ragilim huwo bi gata nahar urdan ma melik. Wa ruwa ma al melik le al Urdon. ³² Wa barzillai kan rajil ajus, umur tuo kan tamaniin sina (80) sina, huwo wodi le melik (mauna) hajat ta akill fi zaman al melik kan fi mahanaim. Ashan huwo kan zol ghaniyan shedid. ³³ Melik bada kelim le barzillai, “keli inta ruwa ma ana wa ana bi jahizu le inta mahal al inta bi geni fogo.” ³⁴ Barzillai juwabu le al melik, fadulu kan min umur tai, ashan ana bi ruwa ma al melik le urshelim? ³⁵ Umur tai biga (80)sina Tamaniin sina. Ana bi agdeer ferigu biena shunu al kwes wa shunu al batal? Hal ana bi agdeer arufu taam ta haja al ana bi akulu wa haja al ana bi ashrabu? Ana tani ma bi agdeer asuma sut ta nuswan al bi guna aw rujal al bi guna? Big leh khadam taki bi jebu humulla tegeel le said tai al melik? ³⁶ Khadam taki bes deeru ruwa le urdan ma al melik. Mlu melik deeru dafa le ana makafaa zi de? ³⁷ Min falak keli khadam taki reja wara le biet, ashan keli ana ruwa mutu fi medina tai jambu turuba ta abu ma uma tai. Lakin asuma, yahu khadim taki kimhan, keli huwo ruwa ma said tai al melik, wa amulu ayi haja le huwo al inta gi ainu huwo kwes le inta” ³⁸ Melik juwabu, “Chimham bi ruwa ma ana, wa ana bi amulu le huwo haja al ana bi ainu kwes le inta, wa ayi haja al inta deeru min ana, wa ana bi amulu le inta” ³⁹ Biga shaab kulu gata Urdon, wa al melik gata, wa melik selimu (ghabilu) Barzillai wa Bariku huwo. Yala Barzillai rejaa le biet tuo. ⁴⁰ Wa al melik ruwa le gilgal, wa Chimham ruwa ma huwo, asakiir ta Yahudiya kulu wa nus ta asakiir ta Israel Kaman kan gedimu (jebu) al melik. ⁴¹ Baad shuiya ked rujal ta Israel bada jaa le al melik wa kelim le melik, leh akuwana ta nina, rujal ta Yahudiya, serigu wa jebu al melik wa usura tuo min nahar Urdon, wa kulu rujal ta Daud kan ma huwo?” ⁴² Biga rujal ta Yahudiya juwabu le shaab ta Israel, “ashan itaka ta nina gerib shedid la al melik. Big malu intum tala zalaaniin ma kalam de? Hal nina akulu haja al kan melik deeru dafa le intum?. Hal huwo wodi le nina hadaya?” ⁴³ Biga rujal ta Israel juwabu le rujal ta yahudiya, nina indu ashara (10) ghabael al indu ilaks ma al melik, ashan keda nina indu hak le Daud aktar min intum-malu intum bi hagiru nina? Leanu fekira ta nina ashan nina bi rejau al melik kan yahu jaa fi bedaya wa asumau?” lakin kelimat ta rujal ta yahudiya kan gowi shedid min kelimat ta rujal ta Israel.